ଭୁବନେଶ୍ବର : ଚିଟଫଣ୍ଡ ସଂସ୍ଥା ନବ ଦିଗନ୍ତ କ୍ୟାପିଟାଲ୍ ସର୍ଭିସେସ୍ ଲିମିଟେଡ଼ର ଦୁଇ କୋଟି ୧୬ ଲକ୍ଷ ଟଙ୍କାର ଅସ୍ଥାବର ଓ ସ୍ଥାବର ସମ୍ପତ୍ତିକୁ ପ୍ରବର୍ତ୍ତନ ନିର୍ଦେଶାଳୟ (ଇଡି)  ଜବତ କରିଛି। ପ୍ରିଭେନସନ୍ ଅଫ୍ ମନି ଲଣ୍ଡରିଂ ଆକ୍ଟ (ବିଏମଏଲଏ) ଆଧାରରେ ତଦନ୍ତକାରୀ ସଂସ୍ଥା ଏହି କାର୍ୟ୍ୟାନୁଷ୍ଠାନ ଗ୍ରହଣ କରିଛି। ନବ ଦିଗନ୍ତ ଏବଂ ଏହା ସହ ସମ୍ପୃକ୍ତ କମ୍ପାନୀଗୁଡ଼ିକର ନିର୍ଦେଶକ ଅଞ୍ଜନ କୁମାର ବଳିଆରସିଂହ, ପ୍ରଦୀପ କୁମାର ପଟ୍ଟନାୟକ, କାର୍ତ୍ତିକେୟ ପରିଡ଼ା ଥିଲେ। ପୂର୍ବରୁ ଏହି ଠକେଇ ମାମଲାରେ ନିର୍ଦେଶକ ଥିବା କିଛି ପୂର୍ବତନ ବିଧାୟକ, ସାଂସଦଙ୍କୁ ସିବିଆଇ ଗିରଫ କରିଥିଲା। ଜବତ ସମ୍ପତ୍ତି ମଧ୍ୟରେ ୧୬ ଲକ୍ଷ ଟଙ୍କା ମୂଲ୍ୟର ବ୍ୟାଙ୍କ ବାଲାନ୍ସ, ଯାହାକି ଆଇଡିବିଆଇ ଏବଂ ଇଣ୍ଡିଆନ୍ ବ୍ୟାଙ୍କର ୪୮ଟିି ଆକାଉଣ୍ଟରେ ରହିଥିଲା। ପୁରୀ ଜିଲା ନରେନ୍ଦ୍ରପୁର ମଉଜା ଓ ଖୋର୍ଦ୍ଧା ଜିଲା କାଇପଦର ମୌଜାରେ ଥିବା ୨ କୋଟି ଟଙ୍କା ମୂଲ୍ୟର ଦୁଇଟି ଜମି ରହିଛି।
ସିବିଆଇ ଦ୍ୱାରା ଦାଖଲ ହୋଇଥିବା ଏଫ୍ଆଇଆର୍ ଏବଂ ଦୁଇଟି ଅଭିଯୋଗ ଫର୍ଦ (ଚାର୍ଜସିଟ) ଆଧାରରେ ଇଡି ତଦନ୍ତ ଆରମ୍ଭ କରିଥିଲା। ନବ ଦିଗନ୍ତ କ୍ୟାପିଟାଲ୍ ସର୍ଭିସେସ୍ ଲିମିଟେଡ଼ ଶତାଧିକ ଲୋକଙ୍କୁ ଅଧିକ ଲାଭ ପ୍ରଲୋଭନ ଦେଖାଇ କୋଟି କୋଟି ଟଙ୍କା ଠକି ଥିବା ତଦନ୍ତରୁ ଇଡି ଜାଣିବାକୁ ପାଇଥିଲା। ଆରବିଆଇ କିମ୍ବା ସେବିଠାରୁ ସଂସ୍ଥା ଅନୁମତି ନନେଇ ଟଙ୍କା ରସିଦ ଏବଂ ପ୍ରମାଣପତ୍ର ପ୍ରଦାନ କରି ଟଙ୍କା ସଂଗ୍ରହ କରିଥିଲା। ପରେ ଏହି ଜମା ଅର୍ଥକୁ ନବ ଦିଗନ୍ତ କ୍ୟାପିଟାଲ୍ ସର୍ଭିସେସ୍ ଲିମିଟେଡ଼, ନବ ଦିଗନ୍ତ ପ୍ରୋଜେକ୍ଟ ଲିମିଟେଡ଼ ଏବଂ ନବ ଦିଗନ୍ତ ପ୍ରପର୍ଟିଜ୍ ଲିମିଟେଡ଼କୁ ଟ୍ରାନ୍ସଫର କରି ଠକିଥିଲା।

Powered by Froala Editor