ଗୁପ୍ତଧନ ପାଇବା ଆଶାରେ ନିଜ ବାପାଙ୍କୁ ବଳିଦେବାକୁ ଉଦ୍ୟମ କରିବା ଭଳି ହୀନ କାମ କରିଛି ପୁଅ । ଖବର ପାଇ ପୋଲିସ ପହଞ୍ଚି ବାପାଙ୍କୁ ଉଦ୍ଧାର ବେଳେ ଲହୁଲୁହାଣ ହେବାକୁ ପଡିଛି। ଏ ଅଭାବନୀୟ ଘଟଣା କଳାହାଣ୍ଡି ଜିଲା ଜୟପାଟଣା ଥାନା ଅଧୀନ କଲମପୁର ବେଲପଡ଼ାରେ ଦେଖିବାକୁ ମିଳିଛି।

ସୂଚନା ମୁତାବକ, ବେଲପଡ଼ାର ବଳଦେବ ଭୋଇଙ୍କ ପୁଅ ଲିଙ୍ଗରାଜ ଭୋଇ କିଛି ବର୍ଷ ତଳେ ମାନସିକ ରୋଗରେ ଆକ୍ରାନ୍ତ ହୋଇଥିଲେ। ପରିବାର ଲୋକେ ତାଙ୍କୁ ଚିକିତ୍ସା କରାଇଥିଲେ ମଧ୍ୟ ସେ ସମ୍ପୂର୍ଣ୍ଣ ଆରୋଗ୍ୟ ହୋଇପାରି ନଥିଲେ। ଏଭଳି ସ୍ଥିତିରେ ଲିଙ୍ଗରାଜ ରାଜପୁର ଗ୍ରାମର ଜଣେ ସାଧକଙ୍କ ସହ ମିଶିଥିଲେ। ଗୁପ୍ତଧନ ପାଇବା ଆଶାରେ ଲିଙ୍ଗରାଜ ସାଧକଙ୍କ ଉପସ୍ଥିତିରେ ଶନିବାର ତାଙ୍କ ବାପାଙ୍କୁ ଘରେ ନୂଆ ଲୁଗା ପିନ୍ଧାଇ ବେକରେ ଫୁଲମାଳ ପକାଇ ବଳି ଦେବାକୁ ଉଦ୍ୟମ କରୁଥିଲେ।

ଖବର ପାଇ ସ୍ଥାନୀୟ ଫାଣ୍ଡି ପୋଲିସ ପହଞ୍ଚି ବଳଦେବଙ୍କୁ ଉଦ୍ଧାର କରିବାକୁ ଉଦ୍ୟମ କରିଥିଲା। ହେଲେ ଲିଙ୍ଗରାଜ ଏକ ମାରଣାସ୍ତ୍ରରେ ପୋଲିସ କର୍ମଚାରୀଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରିଥିଲେ। ଫଳରେ ଗ୍ରାମରଖି ଗଙ୍ଗାରାମ ବାଗ ଆହତ ହୋଇଛନ୍ତି। ଜୟପାଟଣା ଏସ୍‌ଆଇ ବିନୟ ବାରାଲ, ଏସ୍‌.ଏନ୍‌. ପାତ୍ର, ନୀତି ଚତୁର୍ବେଦୀ, କଲମପୁର ଫାଣ୍ଡି ଅଧିକାରୀ ବିପିନ କିଶୋର ଝରିଆ, ଚକାଡୋଳା ବାଗଙ୍କ ସହ ପୋଲିସ କର୍ମଚାରୀ ପହଞ୍ଚି ବଳଦେବଙ୍କୁ ଉଦ୍ଧାର କରିଥିଲେ। ପୋଲିସ ମାମଲା ରୁଜୁ କରି ସାଧକ ଏବଂ ଲିଙ୍ଗରାଜଙ୍କୁ ଗିରଫ କରିଛି। ବଳଦେବଙ୍କୁ କଲମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା କରାଯାଉଛି।

Powered by Froala Editor