ପଶ୍ଚିମବଙ୍ଗର ବୀରଭୂମିରେ ୮ ଜଣଙ୍କୁ ଜୀବନ୍ତ ଜାଳି ହତ୍ୟା କରିବା ଘଟଣାକୁ ନେଇ ଆଜି ରାଜ୍ୟସଭାରେ ବିଜେପି ସାଂସଦ ରୂପା ଗାଙ୍ଗୁଲି କାନ୍ଦି ପକାଇଛନ୍ତି। ରୂପା ଗାଙ୍ଗୁଲି ମଧ୍ୟ ବୀରଭୂମିର ସାଂସଦ। ତେଣୁ ସେ ଏହି ପ୍ରସଙ୍ଗରେ ମତ ରଖିବା ବେଳେ ସର୍ବସମ୍ମୁଖରେ କାନ୍ଦି ପକାଇଥିଲେ। ପଶ୍ଚିମବଙ୍ଗର କ୍ଷମତାସୀନ ଟିଏମସି ସରକାରଙ୍କ ଅପାରଗତା ପାଇଁ ଏତେ ବଡ଼ ଘଟଣା ଘଟିଲା ବୋଲି ମଧ୍ୟ ସେ କହିଛନ୍ତି। ଏହା ସହ ରାଜ୍ୟରେ ରାଷ୍ଟ୍ରପତି ଶାସନ ପାଇଁ ଦାବି କରିଛନ୍ତି।

ରାଜ୍ୟସଭାରେ ବୀରଭୂମ ହିଂସାକାଣ୍ଡ ବିଷୟରେ କହିଲା ବେଳେ ସେ କହିଲେ, ଭୟରେ ଲୋକେ ପଶ୍ଚିମବଙ୍ଗ ଛାଡ଼ି ପଳାଉଛନ୍ତି। ପଶ୍ଚିମବଙ୍ଗରେ ଆମେ ରାଷ୍ଟ୍ରପତି ଶାସନ ଦାବି କରୁଛୁ। ସେଠାରେ ଗଣସଂହାର ଚାଲିଛି। ଲୋକେ ଘରବାଡ଼ି ଛାଡ଼ି ପଳାଉଛନ୍ତି। ରାଜ୍ୟରେ ଆଉ ରହିବା ଭଳି ପରିସ୍ଥିତି ନାହିଁ।

ଏହାପରେ ଗୃହ ବାହାରେ ସେ କହିଛନ୍ତି, “ପଶ୍ଚିମବଙ୍ଗରେ ଲୋକମାନେ ଭୟରେ ମୁହଁ ଖୋଲୁ ନାହାନ୍ତି। ସରକାର ହତ୍ୟାକାରୀମାନଙ୍କୁ ସୁରକ୍ଷା ଯୋଗାଇ ଦେଉଛନ୍ତି। ନିର୍ବାଚନ ଜିତିବା ପରେ କୌଣସି ରାଜ୍ୟର ସରକାର ଲୋକମାନଙ୍କୁ ହତ୍ୟା କରିବା କେବେ ହେଲେ ଘଟିନାହିଁ। ଆମେ ସମସ୍ତେ ମଣିଷ। ଆମେ କେବେ ହେଲେ ନିଷ୍ଠୁର ରାଜନୀତି କରୁନୁ।”

ସୂଚନାଯୋଗ୍ୟ, ମାର୍ଚ ୨୨ ତାରିଖରେ ଘରେ ନିଆଁ ଲଗାଇ ପଶ୍ଚିମବଙ୍ଗର ବୀରଭୂମର ରାମପୁରହାଟ ଅନ୍ତର୍ଗତ ବୋଗତୁଇ ଗ୍ରାମରେ ୮ଜଣ ଲୋକଙ୍କୁ ଜିଅନ୍ତା ପୋଡ଼ି ମାରି ଦିଆଯାଇଥିଲା। ମୃତ ବ୍ୟକ୍ତିମାନଙ୍କ ମଧ୍ୟରେ ୩ଜଣ ମହିଳା ଏବଂ ୨ଜଣ ଶିଶୁ ଥିଲେ । ଏହି ଘଟଣାର ଦିନକ ପୂର୍ବରୁ ‘ତୃଣମୂଳ କଂଗ୍ରେସ’ର ଜଣେ ନେତାଙ୍କୁ ହତ୍ୟା କରାଯାଇଥିଲା। ଘଟଣା ପରେ ପରେ ସ୍ଥାନୀୟ ବାସିନ୍ଦାମାନେ ବୋଗତୁଇ ଗାଁ ଛାଡ଼ି ଚାଲିଯାଉଥିବା ଖବର ମିଳିଥିଲା।

Powered by Froala Editor