ପୁସ୍ତକ ମେଳାରୁ ଚୋରି କରୁଥିଲେ ପର୍ସ, ଗିରଫ ହେଲେ ଅଭିନେତ୍ରୀ
କୋଲକାତାରେ ଚାଲିଥିବା ଅନ୍ତର୍ଜାତୀୟ କୋଲକାତା ପୁସ୍ତକ ମେଳାରୁ ଚୋରି କରିଥିବା ଅଭିଯୋଗରେ ଅଭିନେତ୍ରୀ ରୂପା ଦତ୍ତାଙ୍କୁ ଗିରଫ କରାଯାଇଛି । ବିଧାନ ନଗର ନର୍ଥ ଥାନାର ଜଣେ ଅଫିସର କହିଛନ୍ତି, ରୂପା ଦତ୍ତା ପୁସ୍ତକ ମେଳାରେ ଡଷ୍ଟବିନ୍ରେ ପର୍ସ ଫିଙ୍ଗୁ ଥିବା ବେଳେ ଜଣେ ପୁଲିସ୍ କର୍ମଚାରୀ ଦେଖିଥିଲେ। ଏହା ପରେ ତାଙ୍କୁ ଅଟକ ରଖାଯାଇ ପଚରାଉଚରା କରାଯାଇଥିଲା। ହେଲେ ତାଙ୍କ ଉତ୍ତରରେ ତାଳମେଳ ରହି ନଥିଲା। ଏହା ପରେ ସେ ଧରିଥିବା ବ୍ୟାଗ୍କୁ ଯାଞ୍ଚ କରାଯାଇଥିଲା। ବ୍ୟାଗ୍ ଭିତରୁ ଅନେକ ପର୍ସ ସହିତ ନଗଦ ୭୫ ହଜାର ଟଙ୍କା ମିଳିଥିଲା। ସେ ପୁସ୍ତକ ମେଳାରେ ପକେଟ୍ ମାର୍ କରିଥିଲେ ବୋଲି ସ୍ପଷ୍ଟ ହୋଇଥିଲା।
ଅଧିକାରୀ କହିଛନ୍ତି, ମହିଳାଙ୍କ ଠାରୁ ପକେଟ ମାର ମାମଲାରେ ତାଙ୍କୁ ଗିରଫ କରାଯାଇଛି ଏବଂ ତାଙ୍କ ସହ ଏହି ଅପରାଧରେ ଅଧିକ ଲୋକ ଏହି ଅପରାଧ ସହିତ ଜଡିତ କି ନାହିଁ ତାହା ଜାଣିବା ପାଇଁ ପୁଲିସ ପକ୍ଷରୁ ଅଧିକ ଅନୁସନ୍ଧାନ ଚାଲିଛି।
ଉଲ୍ଲେଖଯୋଗ୍ୟ, ଏକାଧିକ ଟେଲିଭିଜନ ସିରିଏଲରେ ଅଭିନୟ କରିଛନ୍ତି ରୂପା ଦତ୍ତା । ପୂର୍ବରୁ ଚଳଚ୍ଚିତ୍ର ନିର୍ମାତା ଅନୁରାଗ କଶ୍ୟପଙ୍କ ଉପରେ ଯୌନ ଉତ୍ପୀଡ଼ନ ଅଭିଯୋଗ ଆଣିବା ପରେ ରୂପା ଦତ୍ତା ଚର୍ଚ୍ଚାରେ ରହିଥିଲେ।
Powered by Froala Editor
