'କିସ-କିସ କୋ ପ୍ୟାର୍‌ କରୁଁ' ଓ 'ଫିରଙ୍ଗି' ଭଳି ଫିଲ୍ମରେ କାମ କରିବା ପରେ ଏବେ ପୁଣି ଏକ ଫିଲ୍ମ କରିବାକୁ ଯାଉଛନ୍ତି କପିଲ ଶର୍ମା । ଭେଟେରାନ ଫିଲ୍ମ ନିର୍ମାତା ନନ୍ଦିତା ଦାସ ଓ କପିଲ ଶର୍ମାଙ୍କ ମିଳିତ ସହଯୋଗରେ ଏହି ଫିଲ୍ମ ତିଆରି ହେବାକୁ ଯାଉଛି। ଏନେଇ ଜଣାଶୁଣା ଚଳଚ୍ଚିତ୍ର ସମାଲୋଚକ ତାରନ ଆଦର୍ଶ ଟ୍ୱିଟ୍ କରି ଏହି ସୂଚନା ଦେଇଛନ୍ତି। ତାରନ ଆଦର୍ଶଙ୍କ ଟ୍ୱିଟ୍ ଅନୁଯାୟୀ, କପିଲ ଶର୍ମା ପୁନର୍ବାର ଅଭିନୟରେ ପ୍ରବେଶ କରିବାକୁ ଯାଉଛନ୍ତି। ଏହି ଫିଲ୍ମରେ କପିଲ ଶର୍ମା ଏଭଳି କିଛି ଚରିତ୍ରରେ ଅଭିନୟ କରିବାକୁ ଯାଉଛନ୍ତି, ଯାହା ପୂର୍ବରୁ କେବେ ସେ କରିନାହାନ୍ତି। 

ସୂଚନାଯୋଗ୍ୟ, ନିକଟରେ କପିଲ ଶର୍ମା ସୋସିଆଲ ମିଡିଆରେ ଏକ ପୋଷ୍ଟ ଶେୟାର କରି ଏହି ସହଯୋଗିତା ବିଷୟରେ ପ୍ରଶଂସକଙ୍କୁ ସୂଚନା ଦେଇଛନ୍ତି। ଏହି ଫିଲ୍ମରେ କପିଲ ଫୁଡ୍‌ ଡେଲିଭରୀ ବୟ ଭୂମିକାରେ ନଜର ଆସିବେ। ଆଉ କପିଲଙ୍କ ବିପକ୍ଷରେ ସୁହାନା ଗୋସ୍ବାମୀଙ୍କୁ ଦେଖିବାକୁ ମିଳିବ। ସେ କପିଲଙ୍କ ପତ୍ନୀ ଭୂମିକାରେ ନଜର ଆସିବେ। ସବୁଠାରୁ ବିଶେଷ କଥା ହେଲା ଚଳିତ ମାସ ଶେଷରେ ଓଡିଶାର ଭୁବନେଶ୍ୱରରେ ଏହି ଫିଲ୍ମର ସୁଟିଂ ଆରମ୍ଭ ହେବ। ଅନ୍ୟପଟେ ନନ୍ଦିତା ଦାସ ଏହି ଫିଲ୍ମ ବିଷୟରେ ନିଜର ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ସାଧାରଣ ଲୋକଙ୍କ ଆଖିରେ ଲୁଚି ରହିଥିବା କଥାକୁ ସେ ଏହି ଫିଲ୍ମ ମାଧ୍ୟମରେ ଦର୍ଶାଇବାକୁ ଚେଷ୍ଟା କରିଛନ୍ତି। ଅପରପକ୍ଷେ ନନ୍ଦିତା ଓ କପିଲଙ୍କ ସହ କାମ କରିବା ପାଇଁ ସୁହାନା ବେଶ୍‌ ଉତ୍ସାହିତ ଅଛନ୍ତି। 

Powered by Froala Editor