ସୁପ୍ରିମକୋର୍ଟର ମୁଖ୍ୟ ବିଚାରପତି ଏନ୍‌.ଭି. ରମନାଙ୍କ ନାଁରେ ଫେକ୍ ଟୁଇଟର ଆକାଉଣ୍ଟ ଖୋଲାଯାଇଥିବା ଅଭିଯୋଗ ହୋଇଛି । ଏନେଇ ଏତଲା ଦେଇଛନ୍ତି ଖୋଦ୍ ଏନ୍‌.ଭି. ରମନା । ଫେକ୍‌ ଟୁଇଟର ଆକାଉଣ୍ଟରୁ ସୋସିଆଲ ମିଡିଆରେ ପୋଷ୍ଟ କରାଯାଇଥିବା ନେଇ ସେ ପୋଲିସରେ ଅଭିଯୋଗ କରିଛନ୍ତି । ଶନିବାର ନୂଆ ସିଜେଆଇ ଭାବେ ଶପଥ ଗ୍ରହଣ କରିଥିବା ରମନାଙ୍କ ଟୁଇଟର କିମ୍ବା ଅନ୍ୟ କୌଣସି ସୋସିଆଲ ମିଡିଆରେ ଆକାଉଣ୍ଟ ନାହିଁ ବୋଲି ସ୍ପଷ୍ଟ କରିଛନ୍ତି । 

ପ୍ରଧାନ ବିଚାରପତି ସ୍ପଷ୍ଟ କରିଛନ୍ତି ଯେ, ସେ କୌଶସିି ସୋସିଆଲ ମିଡିଆ ପ୍ଲାଟଫର୍ମରେ ନାହାନ୍ତି। ତାଙ୍କର କୌଣସି ସୋସିଆଲ ମିଡିଆ ଆକାଉଣ୍ଟ ନାହିଁ। ତେବେ ତାଙ୍କ ନାଁରେ କେହି ନକଲି ଟୁଇଟର ଆକାଉଣ୍ଟ ଖୋଲି ମିଥ୍ୟା ଖବର ଟୁଇଟ କରୁଥିବା ଦେଖିବାକୁ ମିଳିଥିଲା। ଏହା ଜାଣିବା ପରେ ସେ ତୁରନ୍ତ ଏତଲା ଲେଖାଇବା ସହ ସାଇବର ଟିମ ତୁରନ୍ତ @ଏନ୍‌ଭି ରମନା ନାମକ ଟୁଇଟର ଆକାଉଣ୍ଟକୁ ହଟାଇଥିବା ଜଣାପଡ଼ିଛି। ଡିଲିଟ୍‌ କରାଯାଇଥିବା ଟୁଇଟ୍‌ରେ ଉଲ୍ଲେଖ ଥିଲା, ଅଜିତ୍‌ ଡୋଭାଲଙ୍କ କୂଟନୀତି ଯୋଗୁ ଭାରତକୁ କଞ୍ଚାମାଲ ପଠାଇବାକୁ ପ୍ରସ୍ତୁତ ହୋଇଛି ଆମେରିକା। ଆମେରିକାର ଘୋଷଣା ପରେ ରବିବାର ରାତିରେ ଏହି ଟୁଇଟ୍‌ କରାଯାଇଥିଲା। 

ଉଲ୍ଲେଖଯୋଗ୍ୟ, ଗତ ଶନିବାର ସୁପ୍ରିମକୋର୍ଟର ୪୮ ତମ ମୁଖ୍ୟ ବିଚାରପତି ଭାବେ ଆଜି ଶପଥ ନେଇଥିଲେ ଜଷ୍ଟିସ୍ ଏନ୍ ଭି ରମନା । ତାଙ୍କୁ ରାଷ୍ଟ୍ରପତି ରାମନାଥ କୋବିନ୍ଦ ଶପଥପାଠ କରାଇଥିଲେ। ସେ ୨୦୨୨ ଅଗଷ୍ଟ ୨୬ ତାରିଖ ପର୍ଯ୍ୟନ୍ତ ଭାରତର ପ୍ରଧାନ ବିଚାରପତି ଦାୟିତ୍ୱରେ ରହିବେ।

Powered by Froala Editor