ଦେଶରେ ଶିଶୁ କନ୍ୟା ହତ୍ୟା ଯୋଗୁଁ ପୁରୁଷଙ୍କ ତୁଳନାରେ ମହିଳାଙ୍କ ମାତ୍ରା ବହୁତ କମ୍ ଥିଲା । ଏଥିପାଇଁ ପରିବାର ନିୟୋଜନ ଯୋଜନା କରାଯିବା ସହ ଲିିଙ୍ଗ ନିରୂପଣକୁ ବେଆଇନ ଘୋଷଣା କରାଗଲା । ସବୁଠି ଲୋକ ସଚେତନତା କରାଗଲା । ଯାହାର ପରିଣାମ ସ୍ୱରୂପ ଆଜି ପ୍ରଥମ ଥର ପାଇଁ ପୁରୁଷଙ୍କ ତୁଳନାରେ ମହିଳାଙ୍କ ସଂଖ୍ୟା ଅଧିକ ହୋଇଛି । ଜାତୀୟ ପରିବାର ଓ ସ୍ୱାସ୍ଥ୍ୟ ସର୍ବେକ୍ଷଣର ସର୍ଭେ-୫ ବା NFHS ପକ୍ଷରୁ ଏହି ସୂଚନା ପ୍ରକାଶ ପାଇଛି।

ନୂତନ ସର୍ଭେ ଅନୁଯାୟୀ ଏବେ ଭାରତରେ ପ୍ରତି ଏକ ହଜାର ପୁରୁଷରେ ମହିଳାଙ୍କ ସଂଖ୍ୟା ହଜାରେ କୋଡିଏ ରହିଛି। କେନ୍ଦ୍ର ସ୍ୱାସ୍ଥ୍ୟମନ୍ତ୍ରାଳୟ ରିଲିଜ୍ କରିଥିବା ଏହି ସର୍ବେକ୍ଷଣ ରିପୋର୍ଟ ଅନୁଯାୟୀ ଏଇ ତଥ୍ୟ ପ୍ରକାଶ ପାଇଛି।

ଏହା ପୂର୍ବରୁ ୨୦୧୫-୧୬ରେ NFHS ଚତୁର୍ଥ ପର୍ଯ୍ୟାୟ ସର୍ବେକ୍ଷଣରେ ପ୍ରତି ୧ହଜାର ପୁରୁଷରେ ୯୯୧ ଜଣ ମହିଳା ଥିଲେ। ଏଥର କିନ୍ତୁ ପ୍ରଥମ ଥର ପାଇଁ ପୁରୁଷଙ୍କ ତୁଳନାରେ ମହିଳାଙ୍କ ସଂଖ୍ୟା ବୃଦ୍ଧି ପାଇଛି।

ଉପରୋକ୍ତ ସର୍ବେକ୍ଷଣ ରିପୋର୍ଟ ଅନୁସାରେ, ଏବେ ଆଉ ଭାରତକୁ ‘ନିରୁଦ୍ଦିଷ୍ଟ ମହିଳା’ ଦେଶ କୁହାଯିବ ନାହିଁ। ୧୯୯୦ରେ ‘ନ୍ୟୁୟର୍କ ରିଭ୍ୟୁ ଅଫ୍ ବୁକ୍ସ୍‌’ରେ ପ୍ରକାଶିତ ଏକ ପ୍ରବନ୍ଧରେ ନୋବେଲ୍‌ ବିଜୟୀ ଅର୍ଥନୀତିଜ୍ଞ ଅମର୍ତ୍ତ୍ୟ ସେନ ପ୍ରଥମ ଥର ପାଇଁ ‘ନିରୁଦ୍ଦିଷ୍ଟ ମହିଳା’ ଶବ୍ଦ ବ୍ୟବହାର କରିଥିଲେ। ସେତେବେଳେ ଭାରତରେ ପ୍ରତି ୧୦୦୦ଜଣ ପୁରୁଷରେ ୯୨୭ ମହିଳା ଥିଲେ। ୨୦୦୫-୦୬ରେ ହୋଇଥିବା ‘ଏନ୍‌ଏଫ୍‌ଏଚ୍‌ଏସ୍‌-୩’ ସର୍ବେକ୍ଷଣ ରିପୋର୍ଟ ଅନୁସାରେ, ପୁରୁଷ ଓ ମହିଳାଙ୍କ ଅନୁପାତ ସମାନ ବା ୧୦୦୦:୧୦୦୦ ଥିଲା। କିନ୍ତୁ, ୨୦୧୫-୧୬ ‘ଏନ୍‌ଏଫ୍‌ଏଚ୍‌ଏସ୍‌-୪’ ସର୍ବେକ୍ଷଣରେ ତାହା ହ୍ରାସ ପାଇ ୯୯୧:୧୦୦୦ ‌ହୋଇଥିଲା। କିନ୍ତୁ, ଏଥର ପ୍ରଥମ ଥର ପାଇଁ ପୁରୁଷଙ୍କ ତୁଳନାରେ ମହିଳାଙ୍କ ସଂଖ୍ୟା ବୃଦ୍ଧି ପାଇଛି। ସେହିପରି ଦେଶରେ ଜନ୍ମହାର ମଧ୍ୟ ହ୍ରାସ ପାଇଛି । ଯାହା ଜନସଂଖ୍ୟା ବୃଦ୍ଧିକୁ ଦର୍ଶାଇଥାଏ। ଜନ୍ମହାର ୨ ପ୍ରତିଶତକୁ ଖସି ଆସିଛି। ପୂର୍ବରୁ ୨୦୧୫-୧୬ରେ ଏହା ୨.୨% ଥିଲା।

Powered by Froala Editor