ରାୟପୁର ରେଳ ଷ୍ଟେସନ୍ରେ ବିସ୍ଫୋରଣ: ୬ ଯବାନ ଆହତ
ରାୟପୁର: ଛତିଶଗଡ଼ର ରାୟପୁର ରେଳ ଷ୍ଟେସନ୍ରେ ଘଟିଛି ଅଘଟଣ । ଦୁଇ ନମ୍ବର ପ୍ଲାଟ୍ଫର୍ମରେ ବିସ୍ଫୋରଣ ହୋଇଛି । ଏଥିରେ ୬ ଜଣ ସିଆର୍ପିଏଫ୍ ଯବାନ ଆହତ ହୋଇଛନ୍ତି । ଗୁରୁତର ଅବସ୍ଥାରେ ସେମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି । ସେଠାରେ ସେମାନଙ୍କ ସ୍ୱାସ୍ଥ୍ୟାବସ୍ଥା ସଙ୍କଟାପନ୍ନ ଥିବା ଜଣାପଡ଼ିଛି ।
ସକାଳ ପ୍ରାୟ ସାଢ଼େ ୬ଟା ବେଳେ ବିସ୍ଫୋରଣ ହୋଇଥିଲା । ସିଆର୍ପିଏଫ୍ ୧୨୨ ବାଟାଲିଅନ୍ର ଯବାନମାନେ ଏକ ସ୍ୱତନ୍ତ୍ର ଟ୍ରେନ୍ ଯୋଗେ ଜମ୍ମୁ ଯାଉଥିଲେ । ଟ୍ରେନ୍ଟି ରାୟପୁର ଷ୍ଟେସନ୍ରେ ପହଞ୍ଚିବା ପରେ ଯବାନମାନେ ବିସ୍ଫୋରଣ ସାମଗ୍ରୀ ଗୋଟିଏ ବଗିରୁ ଅନ୍ୟ ବଗିକୁ ସ୍ଥାନାନ୍ତର ବେଳେ ଗୋଟିଏ ବାକ୍ସ ଚଟାଣରେ ଖସି ପଡ଼ିଥିଲା । ଯାହାକି ବିସ୍ଫୋରଣର ମୂଳ କାରଣ ବୋଲି କୁହାଯାଉଛି । ତେବେ ବିସ୍ଫୋରଣ ପରେ ସ୍ଥାନୀୟ ଲୋକେ ଭୟଭୀତ ହୋଇ ଯାଇଥିଲେ । ତୁରନ୍ତ ଆର୍ପିଏଫ୍ ଯବାନମାନେ ପହଞ୍ଚି ଅନୁସନ୍ଧାନ କରିବା ସହିତ ଆହତଙ୍କୁ ଉଦ୍ଧାର କରିଥିଲେ ।
ଏହି ଅଘଟଣ ପରେ ରେଲୱେର ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଥିଲେ । ତୁରନ୍ତ ଏହାର ତଦନ୍ତ କରି ରିପୋର୍ଟ ପ୍ରଦାନ କରିବାକୁ କୁହାଯାଇଛି ।
Powered by Froala Editor
