ନଭେମ୍ବରରୁ ଡିସେମ୍ବରରେ ୫୨ ଲକ୍ଷ ବିବାହ !
ନଭେମ୍ବର ୨୧ରୁ ଡିସେମ୍ବର ୧୫ ମଧ୍ୟରେ ଦେଶରେ ପ୍ରାୟ ୫୨ ଲକ୍ଷ ବିବାହ ହେବାର ଆକଳନ କରିଛି ସର୍ବଭାରତୀୟ ବ୍ୟବସାୟୀ ମହାସଂଘ (ସିଏଆଇଟି)। ଏହି ବିବାହ ଋତୁରେ ପ୍ରାୟ ୭.୫ ଲକ୍ଷ କୋଟି ଟଙ୍କାର ବ୍ୟବସାୟ ହେବ । ଏହାଦ୍ୱାରା ପ୍ରାୟ ୧.୨୫ କୋଟି ଲୋକଙ୍କ ପାଇଁ ଅସ୍ଥାୟୀ ଓ ଋତୁକାଳୀନ ନିଯୁକ୍ତି ସୁଯୋଗ ସୃଷ୍ଟି ହେବାର ସମ୍ଭାବନା ରହିଛି।
ସିଏଆଇଟି ଅନୁଯାୟୀ, କେବଳ ଦିଲ୍ଲୀ-ଏନ୍ସିଆର୍ରେ ପ୍ରାୟ ୫ ଲକ୍ଷ ବିବାହ ହେବ ଏବଂ ଏଥିରୁ ୨.୫ ଲକ୍ଷ କୋଟି ଟଙ୍କାର ବ୍ୟବସାୟ ହେବା ଆଶା ରହିଛି। ବିବାହ ଋତୁରେ ଟେଣ୍ଟ, ସାଜସଜ୍ଜା, ରୋଷେଇ, ହୋଟେଲ, ପରିବହନ, ସୌନ୍ଦର୍ଯ୍ୟ ସେବା ଓ ଫଟୋଗ୍ରାଫି ସହ ଜଡ଼ିତ ଲୋକଙ୍କୁ ମଧ୍ୟ କାମ ମିଳିବ।
ମୋଟ ବ୍ୟବସାୟ ମଧ୍ୟରୁ ୪.୦୫ ଲକ୍ଷ କୋଟି ଟଙ୍କାର ସାମଗ୍ରୀ ଓ ଖୁଚୁରା ସାମଗ୍ରୀ କିଣାବିକା ହେବ। ଅବଶିଷ୍ଟ ୩.୪୫ ଲକ୍ଷ କୋଟି ଟଙ୍କା ବିଭିନ୍ନ ସେବା କ୍ଷେତ୍ରରୁ ଆସିବ। ଅର୍ଥାତ୍ ମୋଟ ବ୍ୟବସାୟର ୫୪ ପ୍ରତିଶତ ସାମଗ୍ରୀ କିଣାବିକା ଓ ୪୬ ପ୍ରତିଶତ ସେବା କ୍ଷେତ୍ରରୁ ଆସିବା ଆଶା କରାଯାଉଛି। ବିବାହ ଋତୁରେ ସବୁଠାରୁ ଅଧିକ କାରବାର ଗହଣା ଓ ମୂଲ୍ୟବାନ ଧାତୁ କ୍ଷେତ୍ରରେ ହେବାର ଆକଳନ କରାଯାଇଛି। ଏହି କ୍ଷେତ୍ରରେ ପ୍ରାୟ ୧.୨୦ ଲକ୍ଷ କୋଟି ଟଙ୍କାର ବ୍ୟବସାୟ ହେବା ଆଶା କରାଯାଉଛି।
ପୋଷାକ, ଶାଢ଼ି ଓ ଅନ୍ୟାନ୍ୟ ବସ୍ତ୍ର କ୍ଷେତ୍ରରେ ୯୦ ହଜାର କୋଟି ଟଙ୍କାର କାରବାର ଆଶା ରହିଛି। ସେବା କ୍ଷେତ୍ରରେ କ୍ୟାଟରିଂ ଓ ଖାଦ୍ୟ ଯୋଗାଣରୁ ୭୫ ହଜାର କୋଟି ଟଙ୍କା ଏବଂ ମ୍ୟାରେଜ୍ ହଲ୍, ବ୍ୟାଙ୍କ୍ୱେଟ୍ ହଲ୍ ଓ ହୋଟେଲରୁ ୬୦ ହଜାର କୋଟି ଟଙ୍କାର ବ୍ୟବସାୟ ହେବା ସମ୍ଭାବନା ରହିଛି।
Powered by Froala Editor