ଚିନ୍ତାରେ ଶିଶୁ ଆକ୍ରାନ୍ତ, ପ୍ରତି ୨୦ ଆକ୍ରାନ୍ତଙ୍କ ମଧ୍ୟରୁ ଜଣେ ଶିଶୁ । ନୂଆଦିଲ୍ଲୀ: କରୋନା ପଞ୍ଝାରେ ସାରା ବିଶ୍ୱ । ଆତଙ୍କ ଖେଳାଉଛି ମହାମାରୀ କରୋନ । କରୋନା ଭାଇରସ ଦ୍ରୁତ ଗତିରେ ବ୍ୟାପିବାରେ ଲାଗିଛି । ପୂର୍ବ ଲହରୀ ତୁଳନାରେ ଦ୍ୱିତୀୟ ଲହରୀରେ ଶିଶୁ ସଂକ୍ରମିତଙ୍କ ସଂଖ୍ୟା ଅଧିକ ରହିଛି, ଏହା ଚିନ୍ତାର କାରଣ ପାଲଟିଛି । ଦେଶରେ ପ୍ରତି ୨୦ ଜଣ ସଂକ୍ରମିତଙ୍କ ମଧ୍ୟରୁ ଜଣେ ଶିଶୁ ସଂକ୍ରମିତ ହେଉଥିବା ଜଣାପଡ଼ିଛି । ନ୍ୟାସନାଲ ସେଣ୍ଟର ଫର ଡିଜିଜ କଣ୍ଟ୍ରୋଲ ମୁତାବକ, ମୋଟ ସଂକ୍ରମିତଙ୍କ ୪.୪୨% ୧୦ ବର୍ଷରୁ କମ ବୟସ୍କ ରହିଛନ୍ତି । ସେହିପରି ୧୧ ବର୍ଷରୁ ୨୦ ବର୍ଷ ବୟସ ମଧ୍ୟରେ ୯.୭୯% ସଂକ୍ରମିତ ରହିଛନ୍ତି । ପ୍ରଥମ ଲହରୀରେ ଏହି ସଂଖ୍ୟା ଅପେକ୍ଷାକୃତ କମ୍ ଥିଲା । ବିଶେଷଜ୍ଞଙ୍କ ମୁତାବକ, ପୂର୍ବରୁ ଯେଉଁ ସଂକ୍ରମିତ ଚିହ୍ନଟ ହେଉଥିଲେ ସେମାନଙ୍କ ନିକଟରେ ସେତେଟା କରୋନା ଲକ୍ଷଣ ନଥିଲା । କିନ୍ତୁ ଏବେ ଯେଉଁ ଶିଶୁମାନେ ସଂକ୍ରମିତ ଚିହ୍ନଟ ହେଉଛନ୍ତି ସେମାନଙ୍କ ନିକଟରେ ପେଟ ଦରଜ, ଗଳା ଦରଜ, ଥକାପଣ ଏବଂ ମୁଣ୍ଡବିନ୍ଧା ଭଳି ଲକ୍ଷଣ ଦେଖାଯାଉଛି । ଏପରି ସ୍ଥିତିରେ ଶିଶୁମାନଙ୍କୁ କେବେ ଟିକା ଦିଆଯିବ ଏ ନେଇ ଦ୍ୱନ୍ଦ୍ୱ ବଢ଼ିବାରେ ଲାଗିଛି ।