ବାରିପଦା: ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ)କୁ ଝଟକା । ପୂର୍ବତନ ରାଜ୍ୟ ସଭାପତି ତଥା ବର୍ତ୍ତମାନ ଉପସଭାପତି ଦାୟିତ୍ୱରେ ଥିବା ମହେଶ ହେମ୍ବ୍ରମ ଦଳରୁ ଇସ୍ତଫା ଦେଇଛନ୍ତି । ରାଜ୍ୟରେ ଜେଏମଏମର ନେତୃତ୍ୱ ନେଉଥିବା ସୁଦାମ ମାରାଣ୍ଡି ଇସ୍ତଫା ଦେଇ ବିଜେଡିରେ ଯୋଗ ଦେବା ପରେ ମହେଶ ଦଳର ମଙ୍ଗ ଧରିଥିଲେ । ରାଜ୍ୟ ବିଶେଷକରି ମୟୂରଭଞ୍ଜ ଜିଲ୍ଲାରେ ଜେଏମଏମ ସଂଗଠନକୁ ସୁଦୃଢ଼ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ । ଏପରି ସ୍ଥଳେ ମହେଶଙ୍କୁ ରାଜ୍ୟ ସଭାପତି ପଦରୁ ହଟାଇବା ପରେ ଶିବୁ ସୋରେନଙ୍କ କନ୍ୟା ତଥା ପୂର୍ବତନ ମୟୂରଭଞ୍ଜ ସାଂସଦ ପ୍ରାର୍ଥୀ ଅଞ୍ଜନୀ ସୋରେନ ରାଜ୍ୟ ସଭାପତି ଭାବେ ଦାୟିତ୍ୱ ଗ୍ରହଣ କରିଥିଲେ । ଦଳୀୟ ସଂଗଠନରେ ପରିବର୍ତ୍ତନ ସହ ମହେଶଙ୍କୁ ଉପସଭାପତି ପଦକୁ ଖସାଇ ଦିଆଯିବା ସହିତ ଦଳ ମଧ୍ୟରେ କୋଣଠେସା କରାଗଲା, ଯାହାକୁ ନେଇ ସେ ଅସନ୍ତୁଷ୍ଟ ଥିଲେ । ଏହା ପରେ ପୂର୍ବତନ ସାଂସଦ ରାମଚନ୍ଦ୍ର ହାଁସଦା ଦଳରେ ଯୋଗଦାନ କରି ତାଙ୍କର ଅସନ୍ତୋଷକୁ ବଢ଼ାଇ ଦେଇଥିଲା । ଏପରିକି ଦଳୀୟ ନେତୃତ୍ୱଙ୍କ ନିଷ୍ପତିକୁ ସେ ବାରିପଦାଠାରେ ଏକ ଆୟୋଜିତ ସାମ୍ବାଦିକ ସମ୍ମିଳନୀକୁ ଖୋଲା ବିରୋଧ କରିଥିଲେ । ସେହି ସମୟରେ ବି ମହେଶ ଜେଏମଏମ ପରିତ୍ୟାଗ କରି ବିଜେଡିରେ ଯୋଗ ଦେଇଥିବା ନେଇ ଚର୍ଚ୍ଚା ହୋଇଥିଲା । ଏହି ଚର୍ଚ୍ଚାର କିଛି ଦିନ ପରେ ସେ ଦଳରୁ ଇସ୍ତଫା ଦେଇଛନ୍ତି । ଅନ୍ୟ ପକ୍ଷରେ ମହେଶଙ୍କ ଇସ୍ତଫା ଦଳର ସାଂଗଠନିକ କାର୍ଯ୍ୟକ୍ରମ ଉପରେ କୌଣସି ପ୍ରଭାବ ପକାଇବ ନାହିଁ ବୋଲି ଜେଏମଏମ ମୟୂରଭଞ୍ଜ-୧ ଜିଲ୍ଲା ସଭାପତି ପ୍ରଭୁଦାନ ମାର୍ଣ୍ଡି କହିଛନ୍ତି ।

Powered by Froala Editor