ଦଶମ ଶ୍ରେଣୀ (ଏସ୍‌ଓଏସ୍‌ସି) ପରୀକ୍ଷାରେ ବି-୨ ଗ୍ରେଡ୍‌ ରଖି ପାସ୍ କରିଛନ୍ତି ସୋରଡା ବିଧାୟକ ପୂର୍ଣ୍ଣଚନ୍ଦ୍ର ସ୍ୱାଇଁ । ରେଜଲ୍ଟରେ ବିଧାୟକ ୫୦୦ରୁ ୩୪୦ ମାର୍କ ରଖିଛନ୍ତି ।ମାଟ୍ରିକ୍‌ ଉତ୍ତୀର୍ଣ୍ଣ ହୋଇ ବିଧାୟକ ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି । ନିଜ ପ୍ରତିକ୍ରିୟାରେ ସେ କହିଛନ୍ତି ଯେ- ପାଠ ପଢା ଆଗରେ ବୟସର ତାରତମ୍ୟ ନଥାଏ । ଦୃଢ ମନୋବଳ ଆଗରେ ସବୁ କିଛି ହାର ମାନେ ବୋଲି ସେ କହିଛନ୍ତି । 

ବିଧାୟକ ପୂର୍ବରୁ ଅନେକ ଥର ମାଟ୍ରିକ ପରୀକ୍ଷା ଦେବା ପାଇଁ ଚେଷ୍ଟା କରିଥିଲେ ମଧ୍ୟ ପାରିବାରିକ, ରାଜନୈତିକ ବ୍ୟସ୍ତତା ସହ ଲୋକଙ୍କ ଭିତରେ ରହି ପରୀକ୍ଷା ଦେବାର ସୁଯୋଗ ପାଇ ପାରିନଥିଲେ। ଚଳିତ ବର୍ଷ ପରୀକ୍ଷା ଦେବା ପାଇଁ ମନ ବଳାଇଥିବା ବେଳେ ପରୀକ୍ଷା ଦେବା ସମୟରେ ସେ ତାଙ୍କର ସ୍ବାସ୍ଥଗତ ସମସ୍ୟା ଥିବାରୁ ବିଦ୍ୟାଳୟ ପକ୍ଷରୁ ସ୍ବତନ୍ତ୍ର ଆଇସୋଲେସନ୍ କକ୍ଷରେ ଜଣେ ମାତ୍ର ପରୀକ୍ଷାର୍ଥୀ ଭାବେ ସେ ପରୀକ୍ଷା ଦେଇଥିଲେ। ସେ ଇଂରାଜୀ, ଓଡ଼ିଆ, ସାମାଜିକ ବିଜ୍ଞାନ, ଗୃହ ବିଜ୍ଞାନ ଓ ପେଣ୍ଟିଂ ପରୀକ୍ଷା ଦେଇଥିଲେ। ପେଣ୍ଟିଂ ପରୀକ୍ଷାରେ ସର୍ବାଧିକ ୮୫ ମାର୍କ ରଖିଥିବା ବେଳେ ଇଂରାଜୀରେ ସର୍ବନିମ୍ନ ୪୪ ମାର୍କ ରଖିଛନ୍ତି। ବିଧାୟକ ଶ୍ରୀ ସ୍ବାଇଁ ଓଡ଼ିଶା ରାଜ୍ୟ ମୁକ୍ତ ବିଦ୍ୟାଳୟ ସାର୍ଟିପିକେଟ୍ ଅଧୀନରେ ଦଶମ ଶ୍ରେଣୀ ପାଇଁ ସୋରଡ଼ା ସରକାରୀ ବାଳିକା ଉଚ୍ଚ ବିଦ୍ୟାଳୟରେ ପରୀକ୍ଷା ଦେଇଥିଲେ। 

Powered by Froala Editor