ଭୁବନେଶ୍ୱର : ନିରଞ୍ଜନଙ୍କୁ ନିଶାନା ସାଧିବା ପରେ ବରିଷ୍ଠ କଂଗ୍ରେସ ନେତା ନରସିଂହ ମିଶ୍ରଙ୍କ ସମ୍ପର୍କରେ ବିସ୍ଫୋରକ ମନ୍ତବ୍ୟ ଦେଇଛନ୍ତି କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି । ଆଗକୁ ବିଧାନସଭା ଥିବାବେଳେ ତାରାଙ୍କ ଏହି ମନ୍ତବ୍ୟ ବେଶ ଚର୍ଚ୍ଚା ସୃଷ୍ଟି କରିଛି  ।

ସେ କହିଛନ୍ତିଯେ, କଂଗ୍ରେସ ବିଧାୟକ ଦଳ ନେତା ତଥା ବଲାଙ୍ଗୀର ବିଧାୟକ ନରସିଂହ ମିଶ୍ରଙ୍କର ବିଜୁ ଜନତା ଦଳ ସହ ସମ୍ପର୍କ ରହିଛି । ସେ ଶାସକ ଦଳ ସପକ୍ଷରେ ପରୋକ୍ଷରେ ରହି କାର୍ଯ୍ୟ କରୁଛନ୍ତି । କେବଳ ନରସିଂହ ନୁହେଁ, ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କୁ ବି ନିଶାଣରେ ନେଇଛନ୍ତି ତାରା । କିଛି ମାସ ତଳେ କଣ୍ଟାବାଞ୍ଜି ବିଧାୟକ ସନ୍ତୋଷ ସିଂହ ସାଲୁଜା ସେହି ସମାନ ଅଭିଯୋଗ କରିଥିଲେ । କଂଗ୍ରେସର କିଛି ନେତା ଦଳୀୟ ସ୍ୱାର୍ଥ ବଦଳରେ ନିଜସ୍ୱ ସ୍ୱାର୍ଥ ଦେଖୁଛନ୍ତି । ବିଧାୟକ ଶ୍ରୀ ସାଲୁଜା ସିଧାସଳଖ ବିଧାୟକ ଶ୍ରୀ ମିଶ୍ରଙ୍କ ଉପରେ ଅଙ୍ଗୁଳି ଉଠାଇଥିଲା ବେଳେ ଏବେ ଶ୍ରୀ ବାହିନୀପତିଙ୍କ ବୟାନ ରୋଚକ ମୋଡ ନେଇଛି । ଏକଦା କଂଗ୍ରେସ ବିରୋଧୀ ଦଳ ଆସନରେ ବସିଥିବା ବେଳେ ଏବେ ଦଳର ବିଧାୟକ ସଂଖ୍ୟା ୯କୁ ଖସି ଆସିଛି । ପିସିସି ସଭାପତିଙ୍କ ମନୋମୁଖୀ କାର୍ଯ୍ୟ ଓ ପ୍ରାର୍ଥୀ ମନୋନୟନ ଯୋଗୁଁ ଦଳ ଅବସ୍ଥା ଶୋଚନୀୟ ହୋଇଛି । 

ବିଧାୟକ ବାହିନୀପତି ତାଙ୍କ ବୟାନରେ କହିଥିଲେ ଯେ, ବିଜେଡିର ବି ଟିମ ଭଳି ବଲାଙ୍ଗୀର ବିଧାୟକ ନରସିଂହ ମିଶ୍ର କାର୍ଯ୍ୟ କରୁଥିବା ସାଂସଦ ସପ୍ତଗିରି ଉଲ୍ଲାକା ତାଙ୍କୁ କହିଥିଲେ । ଯାହାର ଫୋନ ରେକର୍ଡିଂ ତାଙ୍କ ପାଖରେ ରହିଛି । କଂଗ୍ରେସ ଯୁବ ନେତା ରାହୁଲ ଗାନ୍ଧୀଙ୍କ ସହ ଓଡ଼ିଶା କଂଗ୍ରେସ ଦାୟିତ୍ୱରେ ଥିବା ଚେଲା କୁମାର ମଧ୍ୟ ଏ ସମ୍ପର୍କରେ ଅବଗତ ବୋଲି ବିଧାୟକ ବାହିନୀପତି ଅଭିଯୋଗ କରିଛନ୍ତି । ଏ ନେଇ ଏଆଇସିସି ମୁଖ୍ୟ ସୋନିଆ ଗାନ୍ଧି ଓ ରାହୁଲ ଗାନ୍ଧିଙ୍କୁ ସାକ୍ଷାତ କରି ଜଣାଇବେ ବୋଲି କହିଛନ୍ତି ବାହିନୀପତି । ଏ ସମ୍ପର୍କରେ ବିଧାୟକ ଶ୍ରୀ ମିଶ୍ରଙ୍କୁ ପଚାରିବାରୁ ମୁଁ ସେ ବିଷୟରେ ଜାଣି ନାହିଁ, ଲୋକେ ଏହାର ଜବାବ ଦେବେ ବୋଲି କହିଛନ୍ତି । ଏଭଳି ଅଭିଯୋଗକୁ ନିରାଧାରା ଓ ଭିତ୍ତିହୀନ ତଥା ଗୁରୁତ୍ୱ ଦିଏ ନାହିଁ କହିଛନ୍ତି ବିଧାୟକ ଶ୍ରୀ ମିଶ୍ର ।

Powered by Froala Editor