'ସ୍ଲିପର ବଦଳାଇବାକୁ ବି ସମୟ ନଥିଲା'
ନୂଆଦିଲ୍ଲୀ: ତାଲିବାନମାନେ ସମଗ୍ର ଆଫଗାନିସ୍ତାନକୁ ନିଜ ନିୟନ୍ତ୍ରଣକୁ ନେବା ପୂର୍ବରୁ ରାଷ୍ଟ୍ରପତି ଅସରଫ ଘନି ଦେଶ ଛାଡ଼ି ପଳାୟନ କରିଥିଲେ । ଏଥିପାଇଁ ଦେଶ ଭିତରେ ଓ ବାହାରେ ତାଙ୍କୁ କଡ଼ା ସମାଲୋଚନାର ଶିକାର ହେବାକୁ ପଡ଼ିଛି । ୟୁଏଇରେ ଆଶ୍ରୟ ନେଇଥିବା ଘନି ହଠାତ ଦେଶ ଛାଡ଼ି କାହିଁକି ପଳାୟନ କଲେ ତା’ର କାରଣ ଦର୍ଶାଇଛନ୍ତି । ଘନି କହିଛନ୍ତି, କାବୁଲକୁ ରକ୍ତପାତ ଏବଂ ବିନାଶରୁ ରକ୍ଷା କରିବା ପାଇଁ ସେ ଆଫଗାନିସ୍ତାନ ଛାଡ଼ିଥିଲେ । ଏକ ଭିଡିଓ ବାର୍ତ୍ତା ଜାରି କରି ଘନି କହିଛନ୍ତି, ପୂର୍ବତନ ରାଷ୍ଟ୍ରପତି ମହମ୍ମଦ ନଜିବୁଲ୍ଲାଙ୍କୁ ୧୯୯୬ରେ ତାଲିବାନମାନେ ଯେଉଁଭଳି ଭାବେ ହତ୍ୟା କରି ଟ୍ରାଫିକ ଲାଇଟରେ ଝୁଲାଇ ଦେଇଥିଲେ ତାଙ୍କୁ ମଧ୍ୟ ସେହିଭଳି ଭାବେ ଫାଶୀ ଦେବାକୁ ତାଲିବାନ ଯୋଜନା କରିଥିଲା । ଏନେଇ ଘନିଙ୍କ ସୁରକ୍ଷାକର୍ମୀ ସତର୍କ କରାଇ ଦେବାପରେ ସେ ତୁରନ୍ତ ଦେଶ ଛାଡ଼ିଥିଲେ ଏବଂ ସାଙ୍ଗରେ କୌଣସି ଅର୍ଥ କିମ୍ବା ସାମଗ୍ରୀ ନେଇନଥିଲେ । ଏପରିକି ସ୍ଲିପର ବଦଳାଇବାକୁ ମଧ୍ୟ ସମୟ ପାଇନଥିଲି ବୋଲି ଘନି କହିଛନ୍ତି ।
Powered by Froala Editor
