ଆସନ୍ତା ୩୦ ତାରିଖରେ ନୂଆଦିଲ୍ଲୀର କନଷ୍ଟିଚ୍ୟୁସନ କ୍ଲବରେ ଇଣ୍ଡିଆ ବ୍ଲକର ଏକ ବୈଠକ ଅନୁଷ୍ଠିତ ହେବାକୁ ଯାଉଛି । ଏହି ବୈଠକରେ ମୁଖ୍ୟ ନିର୍ବାଚନ କମିଶନର (ସିଇସି) ଜ୍ଞାନେଶ କୁମାରଙ୍କୁ ହଟାଇବା ଲାଗି ଚୂଡାନ୍ତ ରଣନୀତି ପ୍ରସ୍ତୁତ କରାଯିବ ।  ଜ୍ଞାନେଶ କୁମାରଙ୍କୁ ହଟାଇବା ଲାଗି ଏହା ବିରୋଧୀଙ୍କ ତୃତୀୟ ଉଦ୍ୟମ । ବୈଠକରେ ମହାଭିଯୋଗ ପ୍ରସ୍ତାବରେ ସ୍ୱାକ୍ଷର ମଧ୍ୟ କରାଯିବ ।

ନିଜ ଇଚ୍ଛା ଅନୁସାରେ ଜ୍ଞାନେଶ କୁମାର ଏକତରଫା ଭାବେ ଏସ୍ଆଇଆର କରାଇଥିଲେ ବୋଲି ଗତ ୨୩ ତାରିଖରେ ରିପୋର୍ଟ ପ୍ରକାଶ ପାଇବା ପରେ ତାଙ୍କୁ ହଟାଇବାକୁ ବିରୋଧୀ ଦଳ ଆନ୍ଦୋଳନ ଆରମ୍ଭ କରିଛନ୍ତି । ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (ଏସ୍ଆଇଆର)କୁ ଉପରେ ଅନ୍ୟ ଦୁଇ ନିର୍ବାଚନ କମିଶନର ସୁଖବୀର ସିଂହ ସାନ୍ଧୁ ଓ ବିବେକ ଯୋଶୀ ଗତ ୧୦ମାସ ଭିତରେ ୧୪ଥର ଆପତ୍ତି ଉଠାଇଥିଲେ ମଧ୍ୟ ସିଇସି ଜ୍ଞାନେଶ କୁମାର ସେମାନଙ୍କ କଥାକୁ ଗୁରୁତ୍ୱ ଦେଇନଥିଲେ । କଂଗ୍ରେସ ଏହି ଆନ୍ଦୋଳନର ମଙ୍ଗ ଧରିଛି ।

କଂଗ୍ରେସ ନେତା ରାହୁଲ ଗାନ୍ଧୀ, ସୋନିଆ ଗାନ୍ଧୀ ଓ ମଲିକାର୍ଜୁନ ଖଡ୍‌ଗେ, ଟିଏମ୍‌ସି ନେତା ମମତା ବାନାର୍ଜୀ ଓ ଅଭିଷେକ ବାନାର୍ଜୀ, ସପା ନେତା ଅଖିଳେଶ ଯାଦବ ଓ ଶିବସେନା (ୟୁବିଟି) ନେତା ଉଦ୍ଧବ ଠାକ୍ରେ ପ୍ରମୁଖ ବୈଠକରେ ଯୋଗଦେବେ । ବୈଠକରେ ମୁଖ୍ୟତଃ ୩ଟି ପ୍ରସଙ୍ଗ ଉପରେ ଆଲୋଚନା ହେବ । ପ୍ରଥମତଃ ଜ୍ଞାନେଶ କୁମାରଙ୍କୁ ହଟାଇବା ଲାଗି ସଂସଦରେ ମହାଭିଯୋଗ ଆଣିବାକୁ ରଣନୀତି ପ୍ରସ୍ତୁତ କରିବା । ଦ୍ୱିତୀୟତଃ କୁମାରଙ୍କ ଇସ୍ତଫା ଦାବି ସହ ସେ ନେଇଥିବା ନିଷ୍ପତ୍ତିର ନିରପେକ୍ଷ ତଦନ୍ତ କରିବା । ତୃତୀୟରେ ଦେଶବ୍ୟାପୀ ବିଶେଷକରି ନିର୍ବାଚନ ହେବାକୁ ଥିବା ପଞ୍ଜାବ, ଉତ୍ତରପ୍ରଦେଶ ଓ ଉତ୍ତରାଖଣ୍ଡରେ ଆନ୍ଦୋଳନ ଜାରି ରଖିବା । ଆସନ୍ତା ୨୯ରେ କଂଗ୍ରେସର କାର୍ଯ୍ୟକାରିଣୀ କମିଟି (ସିଡବ୍ଲ୍ୟୁସି) ବୈଠକ ଅନୁଷ୍ଠିତ ହେବ । 

Powered by Froala Editor