ଡେରାଡୁନ: ପ୍ରତିବର୍ଷ ଲକ୍ଷାଧିକ ପିଲା କଠିନ ପରିଶ୍ରମ କରି ଡାକ୍ତରୀ ପ୍ରବେଶିକା ପରୀକ୍ଷା ନିଟ୍ ପାଇଁ ପ୍ରସ୍ତୁତ ହେଉଛନ୍ତି। ବର୍ଷ ବର୍ଷ ଧରି ପିଲା କୋଚିଂ ନେଇ ଦିନରାତି ପଢ଼ି କିଛି ମାର୍କ ପାଇଁ ଡାକ୍ତରୀ ପଢ଼ିବାରୁ ବଞ୍ଚିତ ହୁଅନ୍ତି। ହେଲେ ଏପରି କିଛି ଧନୀକ ଶ୍ରେଣୀର ପିଲା ଅଛନ୍ତି ଯୋଉମାନେ ଟଙ୍କା ଦେଇ ବିନା ପରିଶ୍ରମରେ ଏହି ଡାକ୍ତରୀ ସିଟ ହାତେଇ ମେଧାବୀଙ୍କ ଜୀବନକୁ ନଷ୍ଟ କରିଦେଉଛନ୍ତି। ଆଉ ଚାକିରି ପାଇବା ପରେ ଲୋକଙ୍କ ଜୀବନ ସହ ଖେଳୁଛନ୍ତି। ଉତ୍ତରାଖଣ୍ଡରୁ ଏଭଳି ଏକ ଚାଞ୍ଚଲ୍ୟକର ମାମଲା ସାମନାକୁ ଆସିଛି। ଏକ ଗ୍ୟାଙ୍ଗ ପିଲାଙ୍କଠାରୁ ଟଙ୍କା ନେଇ ଜାଲ ପ୍ରମାଣପତ୍ର ଦେଇ ଏମବିବିଏସ ନାମ ଲେଖାରେ ସହଯୋଗ କରୁଥିଲା। ମାମଲାର ତଦନ୍ତରୁ ଭୟଙ୍କର ରିପୋର୍ଟ ସାମନାକୁ ଆସିଛି। ଏହି ନେଟୱର୍କ ଦେଶର ଅନ୍ୟ ରାଜ୍ୟକୁ ବ୍ୟାପୀ ଥିବା ଜଣାପଡ଼ିଛି। ଜାଲ୍ ସ୍ୱାଧୀନତା ସଂଗ୍ରାମୀ ପ୍ରମାଣପତ୍ର ସହାୟତାରେ ଏହି ଗୋଲକଧନ୍ଦା ଚାଲିଥିଲା। ଏହି ପ୍ରମାଣପତ୍ର ମାଧ୍ୟମରେ ଏମବିବିଏସରେ ନାମଲେଖାର ୪ଟି ମାମଲା ସାମ୍ନାକୁ ଆସିବା ପରେ ତଦନ୍ତ ଜୋରଦାର ହୋଇଛି। ଏହି ତଦନ୍ତରୁ ଜାଲ୍ ପ୍ରମାଣପତ୍ର ପ୍ରସ୍ତୁତ କରି ମେଡିକାଲରେ ନାମଲେଖାଇବା ପାଇଁ ସହଯୋଗ କରୁଥିବା ନେଟୱର୍କର ରହସ୍ୟ ଉନ୍ମୋଚନ ହୋଇଛି। ଏହି ନେଟୱର୍କ ଉତ୍ତରାଖଣ୍ଡରେ ଗୋଟିଏ ମେଡିକାଲ୍ ସିଟ୍ ପାଇଁ ୪୫ ଲକ୍ଷ ଟଙ୍କା ନେଉଥିଲା। ପ୍ରଥମ କିସ୍ତିରେ ୨୦ ଲକ୍ଷ ଟଙ୍କା ନିଆଯାଉଥିଲା। ଟଙ୍କା ମିଳିବା ପରେ ଜାଲିଆତି ଆରମ୍ଭ ହେଉଥିଲା। ବାକି ଟଙ୍କା ନାମଲେଖା ପରେ ନିଆଯାଉଥିଲା। ପିଲାଙ୍କ ଯେତେ କମ୍ ନମ୍ବର ଆସିଥାଉ ନା କାହିଁକି, ତାକୁ ଏମବିବିଏସ୍ ସିଟ୍ କାଉନସେଲିଂରେ ବସିବା ଭଳି ଯୋଗ୍ୟ କରାଇ ଦିଆଯାଉଥିଲା। ଏହି ନେଟୱର୍କ କେବଳ ଉତ୍ତରାଖଣ୍ଡରେ ନୁହେଁ, ବରଂ ବିହାର, ପଶ୍ଚିମବଙ୍ଗ, ମଧ୍ୟପ୍ରଦେଶ ଓ ଗୁଜରାଟ ପରି ଅନ୍ୟାନ୍ୟ ରାଜ୍ୟରେ ମଧ୍ୟ ଚାଲିଥିଲା।
ଉତ୍ତରାଖଣ୍ଡ ପୁଲିସ ଏହି ଗ୍ୟାଙ୍ଗ୍ ସହ ଜଡ଼ିତ ତିନି ଜଣଙ୍କୁ ଗିରଫ କରିଛି। ଏବେ ଏହି ମାମଲାର ତଦନ୍ତ ଏସଆଇଟି କରୁଛି। ଏସଆଇଟି ଜେରା ସମୟରେ ମାଷ୍ଟରମାଇଣ୍ଡ ରୂପେଶ ପଣ୍ଡିତ ନେଟୱର୍କର ଗୁମର ଖୋଲି ଦେଇଛି। ସେ ମିରଟରେ ପ୍ରାୟ ୫ ବର୍ଷ ହେବ ‘ମେକୋଡୋ’ ନାମକ ଏକ ଶିକ୍ଷା ପରାମର୍ଶଦାତା ସଂସ୍ଥା ଚଲାଉଥିଲା। ଏହି କନ୍‌ସଲ୍‌ଟେନ୍ସି ମାଧ୍ୟମରେ ପ୍ରଥମେ ବିଭିନ୍ନ ପାଠ୍ୟକ୍ରମରେ ନାମଲେଖା ଯାଉଥିଲା। ଏହାପରେ ବିଭିନ୍ନ କୋଟରେ ଏମବିବିଏସ୍ ସିଟ୍ ଦେବା ଆରମ୍ଭ କରିଥିଲା। ପ୍ରାରମ୍ଭରେ ଏନଆରଆଇ କୋଟା ମାଧ୍ୟମରେ ଆଶାୟୀଙ୍କୁ ଏମବିବିଏସ୍ ସିଟ୍ ଦିଆଯାଉଥିଲା। ପରେ ଅନ୍ୟାନ୍ୟ କୋଟା ଜରିଆରେ ମଧ୍ୟ ନାମ ଲେଖାଇବା ଆରମ୍ଭ ହୋଇଥିଲା। ଯେଉଁ ପିଲା ପାଇଁ ଯେଉଁ କୋଟା (ଏସସି/ଏସଟି, ଇଡବ୍ଲୁଏସ, ବାସସ୍ଥାନ ଆଦି) ଆବଶ୍ୟକ ହେଉଥିଲା ତାହାର ବ୍ୟବସ୍ଥା କରାଯାଉଥିଲା। ତେବେ ସ୍ବାଧୀନତା ସଂଗ୍ରାମୀ କୋଟା ପାଇଁ ଏହି ମାମଲାର ରହସ୍ୟ ଉନ୍ମୋଚନ ହୋଇଥିଲା। ଏ ନେଇ ପ୍ରଥମେ ପ୍ରଦୀପ ବହୁଗୁଣା ଅଭିଯୋଗ କରିଥିଲେ।

Powered by Froala Editor