ମହାରାଷ୍ଟ୍ରରେ ବାଣ ଦ୍ବାରା ହେଉଥିବା ପ୍ରଦୂଷଣ ଉପରେ ବମ୍ବେ ହାଇକୋର୍ଟ କଠୋର ଆଭିମୁଖ୍ୟ ଗ୍ରହଣ କରିଛନ୍ତି । ଜଷ୍ଟିସ ଗିରୀଶ ଏସ୍ କୁଲକର୍ଣ୍ଣି ଏବଂ ଜଷ୍ଟିସ ନୀଲା ଗୋଖଲେଙ୍କ ଖଣ୍ଡପୀଠ ମୁମ୍ବାଇ,ପୁନେ,ଥାନେ,ନଭି ମୁମ୍ବାଇ,କଲ୍ୟାଣ-ଡୋମ୍ବିଭିଲି ପ୍ରଭୃତି ସ୍ଥାନରେ ବାୟୁ ପ୍ରଦୂଷଣର ସ୍ତର ନେଇ ଉଦବଗ ପ୍ରକାଶ କରିଥିଲେ । 

ଖଣ୍ଡପୀଠ କହିଥିଲେଯେ, ନିକଟରେ ମୁମ୍ବାଇର କିଛି ସ୍ଥାନରେ ବାୟୁ ଗୁଣବତ୍ତା ସୂଚକାଙ୍କ(ଏକ୍ୟୁଆଇ) ୪୨୫ ଛୁଇଁଯାଇଥିଲା । ଦୀପାବଳି ପୂର୍ବରୁ ଏମିତି ସ୍ଥିତି ନିଶ୍ଚିତ ଭାବେ ଚିନ୍ତାଜନକ । ଏଭଳିକ୍ଷେତ୍ରରେ ବାଣ ଫୁଟାଇବା ଦ୍ୱାରା ବାୟୁରେ ବିଷାକ୍ତ ପଦାର୍ଥର ମାତ୍ରା ବୃଦ୍ଧି ପାଇବ । ଏହାଦ୍ୱାରା ଲୋକଙ୍କ ପାଇଁ ନିର୍ମଳ ବାୟୁରେ ଶ୍ୱାସକ୍ରିୟା ଏବଂ ଦୈନନ୍ଦିନର କାର୍ଯ୍ୟ ସମ୍ପାଦନ କରିବା କଷ୍ଟକର ହୋଇପଡ଼ିବ । ତେଣୁ ଗଣେଶୋତ୍ସବ ସମୟରେ ସାର୍ବଜନୀନ ରାସ୍ତାରେ ବାଣ ଫୁଟାଇବା ଉପରେ ଲଗାଯାଇଥିବା ନିଷେଧାଦେଶ କେବଳ ଗୋଟିଏ ପର୍ବ ଯାଏ ସୀମିତ ରହିବ ନାହିଁ । ଏହା ନବରାତ୍ରୀ, ଦୀପାବଳି, କ୍ରିସମାସ୍ ଏବଂ ଅନ୍ୟ ପର୍ବପର୍ବାଣୀ ଉପରେ ବର୍ଷ ସାରା ଲାଗୁ ରହିବ । 

ରାଜ୍ୟର ସର୍ବକାଳୀନ ସଡ଼କ, ଗଳିକନ୍ଦି ଏବଂ ଫୁଟଫାଥରେ ବାଣ ଫୁଟାଇବା ଉପରେ ଲଗାଯାଇଥିବା ନିଷେଧଦେଶ ବର୍ଷ ସାରା ଲାଗୁ ରହିବ ବୋଲି ହାଇକୋର୍ଟ ଗୁରୁବାର ସ୍ପଷ୍ଟ କରିଛନ୍ତି । କୋର୍ଟ ମହାରାଷ୍ଟ୍ର ସରକାର, ବିଏମ୍ସି ଏବଂ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ(ଏମ୍ପିସିବି) କୁ ଏଥିଲାଗି ସଚେତନତାମୂଳକ ଅଭିଯାନ ଚଳାଇବା ସହ ଅଭିଯୋଗର ବ୍ୟବସ୍ଥା ଆରମ୍ଭ କରିବାକୁ କହିଛନ୍ତି । ଅବଶ୍ୟ ଏହି ସମୟରେ ବାଣର ପ୍ରସ୍ତୁତି ଏବଂ ବିକ୍ରି ଉପରେ ରୋକ ରହିବ ନାହିଁ । ମାମଲାର ପରବର୍ତ୍ତୀ ଶୁଣାଣି ନଭେମ୍ବର ୨୫ରେ ହେବ ।

Powered by Froala Editor