ଦ୍ବିତୀୟ ଲହର ପରେ ଗଞ୍ଜାମ ଜିଲ୍ଲାର କରୋନା ସ୍ଥିତି ଉପରେ ନଜର ରଖାଯାଇଛି । ଏନେଇ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ । ସ୍ଥାନୀୟ ଟାଉନ୍‌ ହଲ ଠାରେ ଜିଲ୍ଲା ପ୍ରଶାସନ ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ଗଞ୍ଜାମ ଜିଲ୍ଲାପାଳ ଶ୍ରୀ କୁଲାଙ୍ଗେ ଜିଲ୍ଲାର କୋଭିଡ଼୍‌ ସ୍ଥିତି ସମ୍ପର୍କରେ ସୂଚନା ଦେଇ କହିଛନ୍ତି ଯେ, ଜନସାଧାରଣଙ୍କ ଓ ଗଣମାଧ୍ୟମର ସହଯୋଗ ଆବଶ୍ୟକ ରହିଛି । କୋଭିଡ୍-୧୯ ପ୍ରଥମ ଲହରୀ ବେଳେ ସହଯୋଗ ମିଳିଥିଲା । ଜିଲ୍ଲାରେ ବର୍ତ୍ତମାନ ୩୪୭ କୋଭିଡ୍ ସଂକ୍ରମିତ ରହିଥିବା ବେଳେ ୨୪୫ଟି ଆକ୍ଟିଭ୍ କେସ୍ ରହିଛି । ୨ ଜଣଙ୍କର ମୃତ୍ୟୁ ହୋଇଛି । ଗତବର୍ଷ ମାର୍ଚ୍ଚ ମାସଠାରୁ ବର୍ତ୍ତମାନ ପର୍ଯ୍ୟନ୍ତ ୨୨୩୨୧ଜଣ ପଜିଟିଭ୍ ଚିହ୍ନଟ ହୋଇଛନ୍ତି । ପ୍ରଥମ ଓ ଦ୍ବିତୀୟ ଲହର ମିଶି ଜିଲ୍ଲାରେ ସମୁଦାୟ କୋଭିଡ଼୍‌ ମୃତ୍ୟୁ ସଂଖ୍ୟା ୨୫୦ରେ ପହଞ୍ଚିଛି। ବ୍ରହ୍ମପୁର, ଆସିକା, ଭଞ୍ଜନଗର, ହିଞ୍ଜିଳିରେ କୋଭିଡ୍ ହସ୍ପିଟାଲ୍ ବ୍ୟବସ୍ଥା କରାଯାଇଛି । ମୋଟ୍ ୧୫୦୦ କୋଭିଡ୍ କେୟାର୍ ସେଣ୍ଟର୍ ପ୍ରସ୍ତୁତ ଅଛି । ପ୍ରତି ବ୍ଲକ୍ ରେ ୧୦୦ ଶଯ୍ୟା ବିଶିଷ୍ଟ ବେଡ୍ ପ୍ରସ୍ତୁତ ରହିଛି । ରାଜ୍ୟର ଅନ୍ୟ ଜିଲ୍ଲା ତୁଳନାରେ ଗଞ୍ଜାମରେ କରୋନା ସଂକ୍ରମଣ କମ୍‌ ରହିଛି। କିନ୍ତୁ ସଂକ୍ରମଣ ବଢିବ ନାହିଁ ବୋଲି କହିହେବ ନାହିଁ। କରୋନା ସଂକ୍ରମଣକୁ ପ୍ରତିହତ କରିବା ଲାଗି ଜିଲ୍ଲା ପ୍ରଶାସନ ବ୍ୟାପକ ପଦକ୍ଷେପ ନେଉଛି। ଏଥିଲାଗି ଜିଲ୍ଲାବାସୀଙ୍କ ସହଯୋଗ ଆବଶ୍ୟକ ବୋଲି ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ କହିଛନ୍ତି।