୭୫ତମ ସ୍ଵାଧୀନତା ଦିବସ ପାଳନ ପୂର୍ବରୁ ଦେଶର ବୀର ଯବାନଙ୍କୁ ବିଭିନ୍ନ ସମ୍ମାନରେ ସମ୍ମାନିତ କରାଯିବ। ଆଜି ଗୃହ ମନ୍ତ୍ରାଳୟ ପକ୍ଷରୁ ବିଭିନ୍ନ ପଦକ ଲାଗି ମନୋନୀତ ପୁଲିସ କର୍ମଚାରୀଙ୍କ ନାମ ପ୍ରକାଶ କରାଯାଇଛି।

ବୀରତା ପଦକ ପାଇଁ ଓଡ଼ିଶାରୁ ୬୭ଜଣଙ୍କୁ ମନୋନୀତ କରାଯାଇଥିବା ବେଳେ ଉତ୍ତମ ସେବା ପାଇଁ ୧୧ଜଣ ପୁଲିସ କର୍ମଚାରୀଙ୍କୁ ସମ୍ମାନିତ କରାଯିବ ବୋଲି ଜଣାପଡ଼ିଛି। ଏହା ସହ ଚଳିତ ବର୍ଷ ଓଡ଼ିଶାରୁ ମାତ୍ର ୨ଜଣ ରାଷ୍ଟ୍ରପତି ପଦକ ପାଇବା ପାଇଁ ମନୋନୀତ ହୋଇଛନ୍ତି। ସେ ମଧ୍ୟରେ ରହିଛନ୍ତି  ଭୁବନେଶ୍ବରର ଡିଏସପି ଉମାଶଙ୍କର ପଣ୍ଡା ଏବଂ କଟକ ଭିଜିଲାନ୍ସ ନିର୍ଦ୍ଦେଶାଳୟର ଭାଗିରଥୀ ତ୍ରିପାଠୀ। ଉଲ୍ଲେଖନୀୟ ସେବା ପାଇଁ ଓଡ଼ିଶାର ୭ଜଣଙ୍କୁ ରାଷ୍ଟ୍ରପତିଙ୍କ ହୋମ୍ ଗାର୍ଡ ଏବଂ ସିଭିଲ୍ ଡିଫେନ୍ସ ପଦକ ମିଳିବ ବୋଲି ଗୃହ ମନ୍ତ୍ରାଳୟ ପକ୍ଷରୁ ଘୋଷଣା କରାଯାଇଛି । 

ଏହି କ୍ରମରେ ଓଡିଶାର ୨ ଯବାନଙ୍କୁ ମରଣୋତ୍ତର ଶୌର୍ଯ୍ୟ ଚକ୍ର ସମ୍ମାନ ମିଳିଛି। ସହିଦ ୨ ଏସଓଜି ଯବାନଙ୍କୁ ମିଳିବ ଶୌର୍ଯ୍ୟ ଚକ୍ର ସମ୍ମାନ। କମାଣ୍ଡର ସୁଧୀର ଟୁଡୁ ଓ ଦେବାଶିଷଙ୍କୁ ସାହସିକତା ଓ ବୀରତ୍ଵ ପାଇଁ ଏହି ସ୍ଵତନ୍ତ୍ର ସମ୍ମାନ ମିଳିବ। ମାଓବାଦୀଙ୍କ ସହ ଗୁଳି ବିନିମୟରେ ଓଡିଶାର ଏହି ଦୁଇ ବୀର ଯବାନ ୨୦୨୦ ସେପ୍ଟେମ୍ବର ୯ରେ ସହିଦ ହୋଇଥିଲେ। କଳାହାଣ୍ଡି ଜିଲ୍ଲା ସିକ୍ରି ଗାଁ ନିକଟ ଜଙ୍ଗଲରେ ଗୁଳି ବିନିମୟ ହୋଇଥିଲା। ଏହି ଘଟଣାରେ ସୁଧୀର ଓ ଦେବାଶିଷ ବୀରତ୍ଵର ସହ ମାଓବାଦୀଙ୍କ ସହ ମୁକାବିଲା କରି ସହିଦ ହୋଇଥିଲେ। ଏହା ଓଡିଶା ପାଇଁ ଗର୍ବର ବିଷୟ ବୋଲି ପୋଲିସ ମହାନିର୍ଦ୍ଦେଶକ ଅଭୟ କହିଛନ୍ତି। ଦୁଇ ଓଡିଆ ସହିଦ ଶୌର୍ଯ୍ୟ ଚକ୍ର ପାଇବା ଆମ ପାଇଁ ଗର୍ବର ବିଷୟ। 

ଏହାଛଡ଼ା ଆସାମର ୪,  ଛତିଶଗଡ଼ର ୫, ଦିଲ୍ଲୀର, ୫, ଗୁଜୁରାଟର ୬, କର୍ଣ୍ଣାଟକର ୬, ମଧ୍ୟପ୍ରଦେଶର ୩, ପଞ୍ଜାବର ଜଣେ, ହିମାଚଳ ପ୍ରଦେଶର ୨, ମେଘାଳୟର ୨, ତ୍ରିପୁରାର ୨ ଓ ତାମିଲନାଡ଼ୁର ୩ ଜଣଙ୍କୁ ରାଷ୍ଟ୍ରପତିଙ୍କ ହୋମ୍ ଗାର୍ଡ ଏବଂ ସିଭିଲ୍ ଡିଫେନ୍ସ ପଦକ ମିଳିବ। 

Powered by Froala Editor