ପ୍ରତ୍ୟେକ ପିଲା ନିଜ ବାପାଙ୍କ ସାଙ୍ଗିଆ ବା ସରନେମ୍ ବ୍ୟବହାର କରିବାକୁ ଯେପରି ଅଧିକାର ପାଇଛନ୍ତି ସେପରି ମା’ଙ୍କ ସାଙ୍ଗିଆ ମଧ୍ୟ ବ୍ୟବହାର କରିପାରିବେ । ଏଥିପାଇଁ କୌଣସି ବାପା ବାଧ୍ୟ କରିପାରିବେ ନାହିଁ । ଜଣେ ନାବାଳିକା ଝିଅର ବାପାଙ୍କ ଆବେଦନ ଉପରେ ଶୁଣାଣି କରି ଦିଲ୍ଲୀ ହାଇକୋର୍ଟ ଏଭଳି ରାୟ ଶୁଣାଇଛନ୍ତି । 

ପିତା ଜଣକ ତାଙ୍କ ପିଟିସନରେ ଦର୍ଶାଇଥିଲେ ଯେ ମା’ଙ୍କ ସାଙ୍ଗିଆ ନୁହେଁ, ବରଂ ତାଙ୍କ ନାମର ସାଙ୍ଗିଆ ଅନୁସାରେ ଝିଅର ସାଙ୍ଗିଆ ସମସ୍ତ ଦସ୍ତାବିଜ ଓ ପ୍ରମାଣପତ୍ରରେ ବ୍ୟବହାର କରିବାକୁ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯାଉ । କିନ୍ତୁ ବିଚାରପତି ରେଖା ପାଲି ଏଭଳି କୌଣସି ନିର୍ଦ୍ଦେଶ ଦେବାକୁ ମନା କରିଦେଇଛନ୍ତି । କହିଛନ୍ତି ଝିଅ କେବଳ ନିଜର ସାଙ୍ଗିଆ ବ୍ୟବହାର କରିବାକୁ ଜଣେ ପିତା ଆଦେଶ ଦେବାର ଅଧିକାର ନାହିଁ । ଯଦି ନାବାଳିକା ଝିଅ ନିଜର ସାଙ୍ଗିଆକୁ ନେଇ ଖୁସି ଅଛି, ତେବେ ପିତାଙ୍କର ଏଥିରେ ଅସୁବିଧା କାହିଁକି ହେଉଛି ବୋଲି ବିଚାରପତି ପ୍ରଶ୍ନ କରିଛନ୍ତି । ଯଦି ଜଣେ ପିଲା ନିଜ ନାମ ସହିତ ପିତାଙ୍କ ସାଙ୍ଗିଆ ବଦଳରେ ମା’ଙ୍କ ସାଙ୍ଗିଆ ବ୍ୟବହାର କରିବାକୁ ଚାହାନ୍ତି ତେବେ ତାହା କରିପାରିବେ ।

ଶୁଣାଣି ବେଳେ ବ୍ୟକ୍ତିଙ୍କ ଓକିଲ ଯୁକ୍ତି ବାଢିଛନ୍ତି ଯେ, ତାଙ୍କ ମହକିଲଙ୍କ ଝିଅ ନାବାଳିକା ଏବଂ ଏହି ଧରଣର ପ୍ରସଙ୍ଗରେ ନିଜେ ନିଷ୍ପତ୍ତି ନେଇ ପାରିବ ନାହିଁ। ନାମ ପରିବର୍ତ୍ତନରେ ବୀମା କମ୍ପାନୀରେ ବୀମାର ଲାଭ ନେବାରେ ମୁସ୍କିଲ ହେବ। କାରଣ ପଲିସି ଝିଅ ନାଁରେ ତାଙ୍କ ବାପାଙ୍କ ଉପନାମ ସହିତ ନିଆଯାଇଥିଲା। କିନ୍ତୁ ହାଇକୋର୍ଟ ଏସବୁ ଯୁକ୍ତିକୁ ଅଗ୍ରାହ୍ୟ କରିବା ସହ ପିଟିସନକୁ ଖାରଜ କରିଦେଇଥିଲେ । ଅଦାଲତ ଉକ୍ତ ବ୍ୟକ୍ତିଙ୍କୁ ନିଜ ଝିଅର ସ୍କୁଲରେ ବାପାଙ୍କ ରୂପେ ନିଜର ନାମ ଦେଖାଇବାର ଅଧିକାର ସହିତ ମାମାଲାର ସମାଧାନ କରିଛନ୍ତି।

Powered by Froala Editor