ଚଳିତ ବର୍ଷ ପ୍ରକୃତି ସୁନ୍ଦରୀ ଶିମିଳିପାଳ ପର୍ଯ୍ୟଟକ ମାନଙ୍କ ନିମନ୍ତେ ଖୋଲା ହେବାର ଅବ୍ୟବହିତ ପୂର୍ବରୁ ପ୍ରଥମ ଥର ପାଇଁ ଶିମିଳିପାଳ ବ୍ୟାଘ୍ର ପ୍ରକଳ୍ପ ପକ୍ଷରୁ ଶିମିଳିପାଳର ପ୍ରବେଶ ଦ୍ୱାର ଭାବେ ପରିଚିତ ପିଠାବଟା -ଲୁଲୁଙ୍ଗ ଗେଟ୍ ନିକଟରେ ଶିମିଳିପାଳ କାଫେ ଉଦଘାଟିତ ହୋଇଛି । ଶିମିଳିପାଳ କାଫେ କୁ ଆଭାସୀ ମାଧ୍ୟମରେ ଜଙ୍ଗଲ ପରିବେଶ ଓ ଜଳବାୟୁ ପରିବର୍ତ୍ତନ ତଥା ଶ୍ରମମନ୍ତ୍ରୀ ଇଂ. ଗଣେଶ ରାମ ସିଂ ଖୁଣ୍ଟିଆ ଉଦ୍ଘାଟନ କରିଥିବା ବେଳେ ଉଦଘାଟନୀ ଉତ୍ସବରେ ବାଙ୍ଗିରିପୋଷି ବିଧାୟିକା ସଞ୍ଜଳି ମୁର୍ମୁ ଏସିଏଫ୍ ପ୍ରଦୀପ ଦେ ଙ୍କ ସମେତ ବନ ବିଭାଗର ଅନ୍ୟ ଅଧିକାରୀ ମାନେ ଉପସ୍ଥିତ ଥିଲେ। 

ସୂଚନା ମୁତାବକ ପ୍ରଥମ ପର୍ଯ୍ୟାୟରେ ସ୍ଥାନୀୟ ଅଞ୍ଚଳର ବେକାର ଓ ଜଙ୍ଗଲ ଉପରେ ନିର୍ଭରଶୀଳ ବାବା ବୁଢେଶ୍ୱର ଇକୋ ଡେଭଲପମେଣ୍ଟ କମିଟିର ପାଞ୍ଚଜଣ ମହିଳାଙ୍କୁ ଭୁବନେଶ୍ୱରରେ ବିଧିବଦ୍ଧ ପ୍ରଶିକ୍ଷଣ ଦିଆଯାଇ ଏହାର ପରିଚାଳନା ଭାର ଦିଆଯାଇଛି । ଏହି କାଫେ ସକାଳ ୬ ରୁ ରାତି ୮ ଯାଏଁ ଖୋଲା ହେବ ବୋଲି ଏସିଏଫ୍ ପ୍ରଦୀପ କୁମାର ଦେ କହିଛନ୍ତି ।

ଶିମିଳିପାଳ, ଲୁଲୁଙ୍ଗ, ସୀତାକୁଣ୍ଡ, ବାଲିଡିହା ଆଦି ସ୍ଥାନକୁ ବୁଲିବାକୁ ଆସୁଥିବା ପର୍ଯ୍ୟଟକ ମାନେ ଏଠାରେ ସାମୟିକ ବିଶ୍ରାମ ସହିତ ମୟୂରଭଞ୍ଜର ପାରମ୍ପରିକ ଖାଦ୍ୟର ସ୍ୱାଦ ନେଇ ପାରିବେ । ଯେପରି ମୟୂରଭଞ୍ଜର ପ୍ରସିଦ୍ଧ ମାଂସ,ମୁଢି ସାଙ୍ଗକୁ ବିଭିନ୍ନ ପ୍ରକାର ପିଠା, ମାଣ୍ଡିଆ ପ୍ରସ୍ତୁତ ଖାଦ୍ୟ ସହିତ ଅନ୍ୟାନ୍ୟ ଖାଦ୍ୟ ପର୍ଯ୍ୟଟକଙ୍କୁ ପରସା ଯିବ । ଏଠାରେ ଶିମିଳିପାଳ ପ୍ରବେଶ ପାଇଁ ଟିକେଟ୍ ବୁକିଂ ସୁବିଧା ସହିତ କାଫେରେ ବିଶ୍ରାମ ଏବଂ ଶିମିଳିପାଳ ସଂପର୍କିତ ବନ୍ୟପ୍ରାଣୀ ପୁସ୍ତକ ଓ ଲାଇବ୍ରେରୀର ସୁବିଧା ମଧ୍ୟ ଉପଲବ୍ଧ ହେବ । ଏଠାରେ ଚାହିଁଲେ ଛୋଟ ଛୋଟ ପାର୍ଟି, ବୈଠକ ମଧ୍ୟ ଆୟୋଜନ କରାଯାଇପାରିବ । 

Powered by Froala Editor