ସିଜରିଆନ ପରେ  ମହିଳା ଏକ ସୁସ୍ଥ ନବଜାତକ ଜନ୍ମ ଦେଲେ । ମାଆ ହେବାର ଖୁସି ପରେ ହଠାତ୍ ହୋଇଥିଲା ଯନ୍ତ୍ରଣା। ସିଜରିଆନ୍ ଅପରେସନ୍‌ର ମାତ୍ର କିଛି ଦିନ ପରେ ଆରମ୍ଭ ହେଲା ପ୍ରବଳ ପେଟ ଯନ୍ତ୍ରଣା। କାହିଁକି ଏପରି ହେଲା ସମସ୍ତ ଦ୍ୱନ୍ଦରେ ପଡିଯାଇଥିଲେ । ଏହାପରେ ଯାହା ସାମ୍ନାକୁ ଆସିଲା ସମସ୍ତ ଆଶ୍ଚର୍ଯ୍ୟ । ମହିଳାଙ୍କ ପେଟରେ ଥିଲା ଗ୍ଲୋଭ୍ସ ଏବଂ କାଗଜ ରୁମାଲ ବା ନାପକିନ୍ । ଡାକ୍ତରଙ୍କ ଅବହେଳା ନେଇ ଏପରି ହୋଇଥିବା ମହିଳାଙ୍କ ପରିବାର ଅଭିଯୋଗ କରିଛନ୍ତି । 

ସୂଚନା ଅନୁସାରେ, ୧୯ ବର୍ଷୀୟା ସନ୍ଧ୍ୟା ସୂରଜ ଗାୟକୱାଡଙ୍କର ଗତ ୧ ଅଗଷ୍ଟରେ ବୀଡ୍ ଜିଲ୍ଲା ହସ୍ପିଟାଲରେ ସିଜେରିଆନ୍ ଅପରେସନ୍ ହୋଇଥିଲା। ଅପରେସନ୍‌ର ଚାରି ଦିନ ପରେ ତାଙ୍କୁ ହସ୍ପିଟାଲରୁ ଡିସ୍‌ଚାର୍ଜ କରାଯାଇଥିଲା।

କିନ୍ତୁ ଘରକୁ ଫେରିବା ପରେ ସନ୍ଧ୍ୟାଙ୍କର ପ୍ରବଳ ପେଟ ଯନ୍ତ୍ରଣା ଆରମ୍ଭ ହୋଇଥିଲା। ଯନ୍ତ୍ରଣା ନ କମିବାରୁ ତାଙ୍କୁ ଏକ ଘରୋଇ ହସ୍ପିଟାଲକୁ ନିଆଯାଇଥିଲା। ସେଠାରେ ପରୀକ୍ଷା ପରେ ପେଟ ଭିତରେ କୌଣସି ଅଜଣା ବସ୍ତୁ ଥିବା ସନ୍ଦେହ ପ୍ରକାଶ ପାଇଥିଲା। ପରିବାରଙ୍କ ଅଭିଯୋଗ ଅନୁସାରେ ଡାକ୍ତର ସିଜରିଆନ ବେଳେ ମହିଳାଙ୍କ ପେଟରେ ଗ୍ଲୋଭ୍ସ ଏବଂ ନାପକିନ ଛାଡି ଦେଇଛନ୍ତି । କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି । 

ସନ୍ଧ୍ୟାଙ୍କ ସ୍ୱାମୀ ସୂରଜ ଗାୟକୱାଡ ଅଭିଯୋଗ କରିଛନ୍ତି ଯେ, ଡାକ୍ତରମାନଙ୍କ ଅବହେଳା ଯୋଗୁଁ ତାଙ୍କ ପତ୍ନୀଙ୍କ ଅବସ୍ଥା ଏପରି ହୋଇଛି । ସେପଟେ ସନ୍ଧ୍ୟାଙ୍କ ମାଙ୍କ କହିବା ଅନୁସାରେ, ତାଙ୍କ ଝିଅ ନିଜ ଶିଶୁକୁ ଜନ୍ମ ଦେଇଥିଲେ ମଧ୍ୟ ଏବେ ତାଙ୍କ ପାଖରେ ଶିଶୁଟିକୁ କୋଳରେ ଧରିବା ପାଇଁ ମଧ୍ୟ ଶକ୍ତି ନାହିଁ । ତଦନ୍ତ ପରେ ହେବ ଆକ୍ସନ- ଘଟଣା ସାମ୍ନାକୁ ଆସିବା ପରେ ସ୍ୱାସ୍ଥ୍ୟ ବିଭାଗ ମଧ୍ୟ ତତ୍ପର ହୋଇଛି । 

Powered by Froala Editor