ଗୁଜରାଟର ମୋରବୀ ଜିଲ୍ଲାସ୍ଥିତ ବୀରପରଡ଼ା ଗାଁରେ ଗତ ୫ ଦିନ ଧରି ଗୋଟିଏ କୂଅର ପାଣି କ୍ରମାଗତ ଭାବେ ହଲଚଲ ହେଉଛି। ବୀରପରଡ଼ା ଗାଁର ପ୍ରାଣଜୀବନ ଭାଇ ସାଦରିଆଙ୍କ ମାଲିକାନାରେ ଥିବା କୂଅରେ ରବିବାରଠାରୁ ପାଣି ହଲୁଥିବା ଦେଖିବାକୁ ମିଳିଥିଲା। ଖବର ପାଇବା କ୍ଷଣି ପ୍ରଶାସନ ସକ୍ରିୟ ହୋଇଥିଲା ଏବଂ ଜିଲ୍ଲା ଭୂ-ବିଜ୍ଞାନୀ ଜେ. ଏସ୍. ୱାଧେରେ ଘଟଣାସ୍ଥଳ ପରିଦର୍ଶନ କରିଥିଲେ। ସେ ସ୍ପଷ୍ଟ କରିଛନ୍ତି ଯେ, ଏହି ଅଞ୍ଚଳରେ କୌଣସି ପ୍ରକାରର ଭୂକମ୍ପଜନିତ ଗତିବିଧି ନାହିଁ।

ତେବେ ଜିଲ୍ଲା ଭୂ-ବିଜ୍ଞାନୀ ଟିମ୍ ଘଟଣାସ୍ଥଳ ଅନୁଧ୍ୟାନ କରିବା ପରେ ଏହାକୁ ସମ୍ପୂର୍ଣ୍ଣ ଭାବେ ଏକ ପ୍ରାକୃତିକ ପ୍ରକ୍ରିୟା ବୋଲି ସ୍ପଷ୍ଟ କରିଛନ୍ତି। ଅନ୍ୟପଟେ କୌଣସି ଗୁଜବରେ ବିଶ୍ୱାସ ନକରିବାକୁ ଜିଲ୍ଲାପାଳ ଜନସାଧାରଣଙ୍କୁ ନିବେଦନ କରିଛନ୍ତି।

ଘଟଣାର କାରଣ ସମ୍ପର୍କରେ ଅଧିକାରୀମାନେ ଜଣାଇଛନ୍ତି ଯେ, କ୍ରମାଗତ ପ୍ରବଳ ବର୍ଷା ଯୋଗୁଁ ଭୂତଳ ଜଳ ସ୍ତର ବୃଦ୍ଧି ପାଉଛି । ବର୍ଷା ପାଣି ଜମି ଭିତରକୁ ଯିବା ସମୟରେ ପଥର ସନ୍ଧିରେ ଥିବା ଫାଙ୍କା ସ୍ଥାନଗୁଡ଼ିକରେ ବାୟୁ ଚାପି ହୋଇ ରହିଯାଏ ଏବଂ ପରେ ଚାପ ସହ ବାହାରକୁ ବାହାରିଥାଏ। ଏହି ବାୟୁର ଚାପ ଏବଂ ପ୍ରବଳ ପବନ ଯୋଗୁଁ କୂଅର ପାଣି ହଲୁଥିବା ଭଳି ଦେଖାଯାଉଛି। ଏହି ଘଟଣା ସମଗ୍ର ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଥିଲା। 

Powered by Froala Editor