ଭୁବନେଶ୍ବର : ମହାନଦୀରେ ବନ୍ୟାଜଳ ମାଡ଼ି ଚାଲିଛି। ଦୁଇପାର୍ଶ୍ବ ନଦୀବନ୍ଧ ଖାଇ ବନ୍ୟାପାଣି ପ୍ରବାହିତ ହେଉଛି। ଏହାର ଶାଖା ପ୍ରଶାଖା ନଦୀଗୁଡ଼ିକରେ ବି ଜଳସ୍ତର ବଢ଼ିବାରେ ଲାଗିଛି। ମହାନଦୀ କୂଳିଆ ଗାଁଗୁଡ଼ିକ ବନ୍ୟାରେ ପ୍ରଭାବିତ ହୋଇଛନ୍ତି। ବିଶେଷକରି, କଟକ, ଜଗତସିଂହପୁର, କେନ୍ଦ୍ରାପଡ଼ା, ପୁରୀ ଏବଂ ଖୋରଧା ଜିଲାର କିଛି ଅଞ୍ଚଳରେ ବନ୍ୟା ଆସିଛି। ରାଜ୍ୟ ସରକାର ଏହି ୫ଟି ଜିଲା ଉପରେ ଅଧିକ ନଜର ରଖିଛନ୍ତି। ଛତିଶଗଡ଼ ଏବଂ ମଧ୍ୟପ୍ରଦେଶରେ ପ୍ରବଳରୁ ଅତି ପ୍ରବଳ ବର୍ଷା ହୋଇଥିବାରୁ ଉପରମୁଣ୍ଡରୁ ଦ୍ରୁତଗତିରେ ହୀରାକୁଦ ଜଳ ଭଣ୍ଡାରକୁ ବନ୍ୟାପାଣି ମାଡ଼ି ଆସୁଛି। ଫଳସ୍ବରୂପ ହୀରାକୁଦ ଜଳଭଣ୍ଡାର ଜଳସ୍ତର ୬୨୫.୧୫ ଫୁଟ୍‌ ଛୁଇଁଲାଣି। ଜଳଭଣ୍ଡାର ଚାପରେ ଥିବାରୁ ୨୨ଟି ଫାଟକ ଖୋଲାଯାଇ ବନ୍ୟାଜଳ ନିଷ୍କାସନ କରାଯାଉଛି। ଅନ୍ୟପଟେ, ଉତ୍ତର ଓଡ଼ିଶାରେ ବନ୍ୟା ପରିସ୍ଥିତି ଦୁର୍ବିସହ ହୋଇପଡ଼ିଛି। ଭଦ୍ରକ, ବାଲେଶ୍ବର ଏବଂ ଯାଜପୁର ସର୍ବାଧିକ ପ୍ରଭାବିତ ହୋଇଥିବା ରାଜ୍ୟ ସରକାର ସ୍ପଷ୍ଟ କରିଛନ୍ତି। ଉତ୍ତର ଓଡ଼ିଶାରେ ଜଳକା, ସାଳନ୍ଦୀ ଏବଂ ବୈତରଣୀରେ ବନ୍ୟା ଆସିଥିବା ବେଳେ ଉପକୂଳବର୍ତ୍ତୀ ଜିଲାରେ ମହାନଦୀ ବନ୍ୟା ଆଣିଛି।
ସନ୍ଧ୍ୟା ୬ଟା ସୁଦ୍ଧା ହୀରାକୁଦ ଜଳ ଭଣ୍ଡାର ଜଳସ୍ତର ୬୨୫.୧୫ଫୁଟ ଛୁଇଁଛି। ଜଳସ୍ତର ବଢ଼ୁଥିବାରୁ ଜଳଭଣ୍ଡାର ସୁରକ୍ଷାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ଶୁକ୍ରବାର ୨୦ଟି ଫାଟକ ଖୋଲାଯାଇଛି। ପୂର୍ବରୁ ଦୁଇଟି ଫାଟକ ଖୋଲାଥିଲା। ଅଦ୍ୟାବଧି ୨୨ଟି ଫାଟକ ଦେଇ ଜଳଭଣ୍ଡାରରୁ ୩ ଲକ୍ଷ ୫୬ କ୍ୟୁସେକ୍‌ ଜଳ ନିଷ୍କାସିତ ହେଉଛି। କିନ୍ତୁ ଉପରମୁଣ୍ଡରୁ ୪,୨୨୯୬୮କ୍ୟୁସେକ୍ ଜଳ ପ୍ରବେଶ କରୁଥିବାରୁ ସଂକଟ ବଢ଼ିବାରେ ଲାଗିଛି। ମହାନଦୀ ଆହୁରି ଫୁଲିବାର ସମ୍ଭାବନା ଦେଖାଦେଇଛି। କିନ୍ତୁ, ଆଗାମୀ ଦୁଇ ଦିନ ପର୍ଯ୍ୟନ୍ତ ରାଜ୍ୟରେ ବିଶେଷ ବର୍ଷାର ସମ୍ଭାବନା ନଥିବା, ଆଶ୍ବାସନା ଆଣି ଦେଇଛି। ହୀରାକୁଦ ପାଣି ମୁଣ୍ଡଳିରେ ପହଞ୍ଚିଲା ବେଳକୁ ତଳମୁଣ୍ଡରୁ ବନ୍ୟାପାଣି ଛାଡ଼ି ଯାଇଥିବ। ଯଦି ବଡ଼ଧରଣର ବର୍ଷା ହୁଏ, ପରିସ୍ଥିତିକୁ ମୁକାବିଲା କରିବା ପାଇଁ ପ୍ରସ୍ତୁତ ବୋଲି ଏସ୍‌ଆରସି ଶ୍ରୀ ପାଟିଲ କହିଛନ୍ତି।
ମହାନଦୀର ଖଇରମାଳରେ ୩.୩୦ଲକ୍ଷ କ୍ୟୁସେକ୍ ଜଳ ପ୍ରବାହିତ ହେଉଛି। ଗତକାଲି ସନ୍ଧ୍ୟା ୬ଟାରେ ୭.୭୪ଲକ୍ଷ କ୍ୟୁସେକ ପାଣି ପ୍ରବାହିତ ହେଉଥିଲା। ବରମୂଳରେ ୬.୦୨ଲକ୍ଷ କ୍ୟୁସେକ୍ ବନ୍ୟାଜଳ ପ୍ରବାହିତ ହେଉଛି। ଗତକାଲି ଏଠାରେ ୭.୭୦ଲକ୍ଷ କ୍ୟୁସେକ୍‌ ଜଳ ପ୍ରବାହିତ ହେଉଥିଲା। ଅର୍ଥାତ ଉପରମୁଣ୍ଡରୁ ପାଣି କମୁଥିବା ବେଳେ ମୁଣ୍ଡଳିରେ ବନ୍ୟାଜଳ ୮,୨୦,୮୪୩ କ୍ୟୁସେକ୍ ତଳମୁଣ୍ଡ ଆଡ଼କୁ ପ୍ରବାହିତ ହେଉଛି। ଫଳରେ ତଳମୁଣ୍ଡରେ ପ୍ରବାହିତ ଲୁଣା, କରାଣ୍ଡିଆ, ଚିତ୍ରୋତ୍ପଳା, ଦେବୀ, ପାଇକା, ଦୟା, କୁଶଭଦ୍ରା, ଭାର୍ଗବୀରେ ବନ୍ୟା ଆସିଛି। ଗତ ରାତି ୧୦ଟାରେ ମୁଣ୍ଡଳିରେ ବନ୍ୟାଜଳ ଶୀର୍ଷ ୮,୮୮,୧୪୯ କ୍ୟୁସେକ୍‌ ପ୍ରବାହିତ ହେଉଥିଲା। ଆଜି ସନ୍ଧ୍ୟାରେ ତାହା ୮,୨୦,୮୪୩ କ୍ୟୁସେକକୁ ହ୍ରାସ ପାଇଛି। ସେହିପରି, ନରାଜରେ ବିପଦ ସଙ୍କେତ ୨୬.୪୧ ମିଟର ଥିବା ବେଳେ ୨୬.୪୮ ମିଟରରେ ମହାନଦୀ ପ୍ରବାହିତ ହେଉଛି। ନରାଜରେ ବିପଦ ସଙ୍କେତ ଉପରେ ବନ୍ୟାଜଳ ପ୍ରବାହିତ ହେଉଛି।

ମହାନଦୀର ବନ୍ୟାଜଳ ଜଗତସିଂହପୁର ଜିଲାର ଅନେକ ତଳିଆ ଅଞ୍ଚଳରେ ପ୍ରଭାବ ପକାଇଛି। କୁଜଙ୍ଗ ବ୍ଲକ ବରିହାଡିଆ ଗାଁ ପାଣିଘେରରେ ରହିଛି। ବନ୍ୟା ପାଣି ଘରଦ୍ୱାର ଓ ଚାଷ ଜମିରେ ପଶିବା ଫଳରେ ଲୋକେ ସମସ୍ୟାର ସମ୍ମୁଖୀନ ହେଉଛନ୍ତି। ଯାତାୟାତଠାରୁ ଆରମ୍ଭ କରି ଦୈନନ୍ଦିନ ଜୀବନ ମଧ୍ୟ ପ୍ରଭାବିତ ହୋଇଛି। ଏହି ଅଞ୍ଚଳର ପ୍ରାୟ ୨୦୦ ପରିବାର ଚାଷ ଉପରେ ନିର୍ଭର କରି ପରିବାର ଚଳାନ୍ତି। କିନ୍ତୁ ଏବେ ବନ୍ୟାପାଣି ସେମାନଙ୍କ ଜୀବିକା ଉପରେ ପ୍ରଭାବ ପକାଇଛି। ସେହିପରି, ଭୁବନେଶ୍ବର ଉପକଣ୍ଠ ଭାର୍ଗବୀ କୂଳରେ ଥିବା ପୁବାଶାସନ ଅଞ୍ଚଳରେ ବନ୍ୟା ପାଣି ପଶିବା ପରେ ସମଗ୍ର ଗାଁ ଏବେ ଜଳମଗ୍ନ ହୋଇପଡ଼ିଛି। ପ୍ରାୟ ୧୦୦ରୁ ଅଧିକ ପରିବାର ପାଣିଘେରରେ ଫସି ରହିଛନ୍ତି। ଅନେକ ଘର ଭିତରେ ପାଣି ଜମି ରହିଛି। 

କଟକ ଜିଲା ବାଙ୍କୀ ଉପଖଣ୍ଡ ବିଭିନ୍ନ ଗାଁକୁ ସଂଯୋଗ ବିଚ୍ଛିନ୍ନ ହୋଇଛି। ବାଙ୍କୀର ପୂର୍ତ୍ତ ବିଭାଗ ଡାକବଙ୍ଗଳାଠାରେ ବିପଦ ସଙ୍କେତ ୭.୮ମିଟର ଥିବା ବେଳେ ଏହା ତଳେ ମହାନଦୀ ପ୍ରବାହିତ ହେଉଛି। ବାଙ୍କୀ ବୈଦ୍ୟେଶ୍ୱର ରାସ୍ତାର ଚନ୍ଦ୍ରପା ନାଳଠାରେ ୨ ଫୁଟ୍‌ ପାଣି ପ୍ରବାହିତ ହେଉଛି। ଫଳରେ ଯାତାୟାତ ସମ୍ପୂର୍ଣ୍ଣ ବନ୍ଦ ହୋଇଯାଇଛି। ବାଙ୍କୀ ଡମପଡ଼ା ବ୍ଲକ ଅନ୍ତର୍ଗତ ବିଲିପଡ଼ା-ତାଳବସ୍ତ ରାସ୍ତାରେ ୩ ଫୁଟ୍‌ର ପାଣି ଚାଲୁଥିବାରୁ ଯାତାୟାତ ବନ୍ଦ ରହିଛି। କଇଁମୁଣ୍ଡି ଗାଁକୁ ସଂଯୋଗ କରୁଥିବା ରାସ୍ତାରେ ବନ୍ୟାଜଳ ପ୍ରବାହିତ ହେବାରୁ କଇଁମୁଣ୍ଡିର ଶତାଧିକ ପରିବାର ଜଳବନ୍ଦୀ ଅଛନ୍ତି। ଶିମିଳିପୁର ପଞ୍ଚାୟତର ଶୁଖୁଆଖଳା ଗାଁ ଏବେ ସମ୍ପୂର୍ଣ୍ଣ ଜଳମଗ୍ନ। ବାଙ୍କୀ ବ୍ଲକ ଅନ୍ତର୍ଗତ ହୁଳୁହୁଳା ସେତୁ ଉପରେ ୫ଫୁଟ ଉଚ୍ଚରେ ପାଣି ଚାଲୁଥିବାରୁ ଲୋକେ ଜଳବନ୍ଦୀ ଅବସ୍ଥାରେ ଅଛନ୍ତି। ବିଲିପଡା ପଞ୍ଚାୟତର ପଦନପୁର ଗାଁରେ ୫ଫୁଟର ବନ୍ୟାପାଣି ଲହଡି ଭାଙ୍ଗୁଛି। ବର୍ତ୍ତମାନ ସୁଦ୍ଧା ପ୍ରଶାସନ ପହଞ୍ଚି ନଥିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ମହାନଦୀର ବନ୍ୟା ଜଳରେ କେନ୍ଦ୍ରପଡ଼ା ଜିଲାର ମାର୍ଶାଘାଇ, ଗରଦପୁର, ଡେରାବିଶ ଓ ମହାକାଳପଡ଼ା ବ୍ଲକର ଅନେକ ତଳିଆ ଅଞ୍ଚଳରେ ପାଣି ପଶିଛି। ଏହା ପ୍ରଭାବରେ ଲୁଣା, କେରାଣ୍ଡିଆ, ଚିତ୍ରୋତ୍ପଳା, ପାଇକା ଆଦି ନଦୀରେ ପାଣି ଆସିବାରୁ ନଦୀପଠାରେ ଚାଷ କରୁଥିବା ଅନେକ ଚାଷୀଙ୍କ ଫସଲ ନଷ୍ଟ ହୋଇଛି। 

Powered by Froala Editor