ଭୁବନେଶ୍ୱର : ବେଆଇନ କାର୍ଯ୍ୟରେ ଗାଡ଼ି ନିୟୋଜିତ କରୁଥିବା ବ୍ୟକ୍ତି ଆଇନର ହାତରୁ ଖସିପାରିବେ ନାହିଁ। ଗାଡ଼ି ପଞ୍ଜୀକରଣଠାରୁ ଆରମ୍ଭ କରି ମାଲିକାନା ପରିବର୍ତ୍ତନ, ଡିଏଲ୍‌ରେ ଠିକଣା ପରିବର୍ତ୍ତନ ଭଳି କାର୍ଯ୍ୟ ପାଇଁ ଆଧାରକାର୍ଡ ବାଧ୍ୟତାମୂଳକ ହେବ। ଗାଡ଼ି ମାଲିକଙ୍କ ଠିକଣା, ପରିଚୟ ଓ ଆରଟିଓ ସୀମା ଆଦିର ଯାଞ୍ଚ କଡ଼ାକଡ଼ି ହେବ। ଏନେଇ ପରିବହନ ଆୟୁକ୍ତ ସମସ୍ତ ଆର୍‌ଟିଓ ଏବଂ ଏଆରଟିଓମାନଙ୍କୁ ପତ୍ର ଲେଖି ନିର୍ଦ୍ଦେଶର ଅନୁପାଳନ କରିବା ପାଇଁ କହିଛନ୍ତି। ଏଥିରେ କୁହାଯାଇଛି ଯେ ଗାଡ଼ି ପଞ୍ଜୀକରଣ, ମାଲିକାନା ଓ ଡିଏଲ୍‌ରେ ଠିକଣା ପରିବର୍ତ୍ତନ,
ହାଇପୋଥିକେସନ୍ ବାତିଲ, ପରମିଟ୍‌, ଡିଏଲ୍‌ ଆଦି ପାଇଁ ଆବେଦନଗୁଡ଼ିକ ଉପଯୁକ୍ତ ଯାଞ୍ଚ ବିନା ପ୍ରକ୍ରିୟା କରାଯାଉଥିବା ବିଭାଗର ଦୃଷ୍ଟିକୁ ଆସିଛି। ଫଳରେ ଭବିଷ୍ୟତରେ କୌଣସି କାରଣବଶତଃ ଗାଡ଼ି ମାଲିକଙ୍କୁ ନୋଟିସ୍ ପଠାଇବା, ଟିକସ/ଜୋରିମାନା ଆଦାୟ କରିବା, ଦୁର୍ଘଟଣା ତଦନ୍ତ ଏବଂ ଅନ୍ୟ ଆଇନଗତ କାର୍ଯ୍ୟ ସମୟରେ ସମସ୍ୟା ଦେଖାଦେଉଛି। ପରିଚୟପତ୍ରରେ ଗୋଟିଏ ଠିକଣା ରହିଥିବା ବେଳେ ଆରଟିଓରେ ଦାଖଲ ହୋଇଥିବା କାଗଜପତ୍ରରେ ଅନ୍ୟ ଠିକଣା ରହୁଛି। ଏହାକୁ ଦୃଷ୍ଟିରେ ରଖି ଆବେଦକଙ୍କ ପରିଚୟ ଓ ଠିକଣା କଡ଼ାକଡ଼ି ଯାଞ୍ଚ ପାଇଁ ନିର୍ଦ୍ଦେଶ ଦିଆଯାଉଛି। ନିଷ୍ପତ୍ତି ଅନୁସାରେ, ଏଣିକି ଗାଡ଼ି କ୍ରେତାଙ୍କ ରହୁଥିବା ଠିକଣା ଅବା ତାଙ୍କ ବ୍ୟବସାୟ ସ୍ଥାନ ଯାଞ୍ଚ କରାଯିବ। ସବୁପ୍ରକାର କାମ ପାଇଁ ଆଧାରକାର୍ଡ ଯାଞ୍ଚ ବାଧ୍ୟତାମୂଳକ ହେବ। ଯଦି ଆବେଦନପତ୍ର ଓ ପରିଚୟପତ୍ରରେ ନାମ, ପିତାଙ୍କ ନାମ, ଫୋନ୍ ନମ୍ବର, ଠିକଣା, ଜନ୍ମ ତାରିଖ, ଫଟୋରେ କିଛି ଅସମାନତା ଥାଏ, ତା’ହେଲେ ତାଙ୍କ ଆବେଦନ ଖାରଜ କରାଯିବ। ପରିବହନ ଗାଡ଼ି ପାଇଁ ଏହି ନିୟମ ଅଧିକ କଡ଼ାକଡ଼ି କରାଯାଇଛି। ମାଲିକାନା ପରିବର୍ତ୍ତନ ସମୟରେ କ୍ରେତାଙ୍କ କାଗଜପତ୍ର ଭଲ ଭାବେ ଯାଞ୍ଚ କରିବା ପାଇଁ ନିର୍ଦ୍ଦେଶ ଦିଆଯାଇଛି। ହାଇପୋଥିକେସନ୍ ବାତିଲ ପାଇଁ ଋଣଦାତାଙ୍କଠାରୁ ଆପତ୍ତିବିହନୀ ପ୍ରମାଣପତ୍ର ଆଣିବା ଜରୁରୀ। ଡ୍ରାଇଭିଂ ଲାଇସେନ୍ସ ପାଇଁ ଆବେଦନକାରୀଙ୍କ ଠିକଣା ଓ ପରିଚୟ ଆରଟିଓ ଯାଞ୍ଚ କରିବେ। ସେ ରହୁଥିବା ସ୍ଥାନର ଠିକଣା ପ୍ରମାଣପତ୍ର ଦାଖଲ କରିବା ଜରୁରୀ। ଯଦି ଆର୍‌ଟିଓ ପଠାଇଥିବା ନୋଟିସ୍‌କୁ ଗାଡ଼ି ମାଲିକ ଗ୍ରହଣ କରୁନାହାନ୍ତି, ତାହେଲେ ସେହି ମାମଲାକୁ ତୁରନ୍ତ ବନ୍ଦ ନ କରି ସ୍ଥାନୀୟ କର୍ତ୍ତୃପକ୍ଷଙ୍କ ସହାୟତାରେ ତାଙ୍କର ସନ୍ଧାନ କରାଯିବ। ବାରମ୍ବାର ଟ୍ରାଫିକ୍ ନିୟମ ଉଲ୍ଲଂଘନ କରୁଥିବା ଗାଡ଼ି ଚାଳକଙ୍କୁ ଖୋଜି ବାହାର କରାଯିବା ସହ ଆଇନ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଉପଯୁକ୍ତ ଯାଞ୍ଚ ବିନା ଆବେଦନପତ୍ର ଅନୁମୋଦନ କରୁଥିବା ଆରଟିଓ ଅଧିକାରୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଯଦି କୌଣସି ଗାଡ଼ି ମାଲିକଙ୍କ ଠିକଣା ଭୁଲ ଥିବା ଜଣାପଡ଼େ, ତା ହେଲେ ଅନୁମୋଦନ କରିଥିବା ଅଧିକାରୀଙ୍କୁ ଉତ୍ତରଦାୟୀ କରାଯିବ।

Powered by Froala Editor