ସୋମବାରଠୁ ସବୁ ରୁଟ୍ରେ ଚାଲିବ ‘ମୋ ବସ୍’
ଭୁବନେଶ୍ୱର: କରୋନା କଟକଣା ଲାଗି ବନ୍ଦ ଥିବା ମୋ ବସ୍ ସେବା ପୁଣି ଥରେ ସ୍ୱାଭାବିକ ହେବାକୁ ଯାଉଛି । ସଂକ୍ରମଣ କମିବା ପରେ ଏବେ ସବୁ ରୁଟ୍ରେ ବସ୍ ଚାଳଚଳ କରିବ । ସୋମବାରଠୁ ୨୫ଟି ରୁଟ୍ରେ ୧୯୪ଟି ବସ୍ ଗଡ଼ିବ । ଏନେଇ ଗଣମାଧ୍ୟମକୁ ସୂଚନା ଦେଇଛନ୍ତି କ୍ୟାପିଟାଲ୍ ରିଜନ ଅର୍ବାନ୍ ଟ୍ରାନ୍ସପୋର୍ଟ (କ୍ରୁଟ୍) ଜେନେରାଲ୍ ମ୍ୟାନେଜର ଦୀପ୍ତି ମହାପାତ୍ର ।
ସେ କହିଛନ୍ତି ଯେ, ରାଜ୍ୟ ସରକାରଙ୍କ କୋଭିଡ୍ ଗାଇଡ୍ଲାଇନ୍କୁ କଡ଼ାକଡ଼ି ଭାବେ ପାଳନ କରାଯିବ । ସୋମବାରରୁ ସମସ୍ତ ୨୫ଟି ରୁଟରେ ସକାଳ ୭ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ‘ମୋ ବସ୍’ ଚାଲିବ । ଏହି ସେବା କେବଳ ସୋମବାରରୁ ଶୁକ୍ରବାର ପର୍ଯ୍ୟନ୍ତ ଜାରି ରହିବ । ସାପ୍ତାହିକ ଶଟଡାଉନ୍ ଯୋଗୁ ଶନିବାର ଓ ରବିବାର ବସ୍ ସେବା ବନ୍ଦ ରହିବ । ତେବେ ପୂର୍ବଭଳି ସଟଲ୍ ସେବା ଜାରି ରହିବ । ଅର୍ଥାତ୍ ରେଳ ଷ୍ଟେସନ ଓ ଏୟାରପୋର୍ଟରୁ କଟକ ଓ ଖୋର୍ଦ୍ଧା ପର୍ଯ୍ୟନ୍ତ ସୀମିତ ବସ୍ ଉପଲବ୍ଧ ହେବ । ରାଜ୍ୟ ବାହାରୁ ଆସୁଥିବା ଲୋକଙ୍କ ସୁବିଧା ପାଇଁ ଶନିବାର ଓ ରବିବାର ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ଯାତ୍ରୀମାନଙ୍କୁ ବସ୍ରେ ଛିଡ଼ା ହୋଇ ଯିବା ପାଇଁ ସୁଯୋଗ ମିଳିବ ନାହିଁ । କେବଳ ଉପଲବ୍ଧ ସିଟ୍ ଅନୁସାରେ ଯାତ୍ରୀଙ୍କୁ ନିଆଯିବ । ସେହିଭଳି ମାସ୍କ ନଥିଲେ ଯାତ୍ରା କରିବାକୁ ସୁଯୋଗ ମିଳିବ ନାହିଁ । ଏଥିସହିତ ଯାତ୍ରୀମାନେ ନିଜ ପାଖରେ ସାନିଟାଇଜର୍ ରଖିବାକୁ ପରାମର୍ଶ ଦିଆଯାଇଛି । ମୋ ବସ୍ରେ ଯାତ୍ରା ସମୟରେ ଯାତ୍ରୀମାନେ ନିଜ ଆଡ଼ୁ ସତର୍କମୂଳକ ପଦକ୍ଷେପ ନିଅନ୍ତୁ ବୋଲି କ୍ରୁଟ୍ ପକ୍ଷରୁ ଅନୁରୋଧ କରାଯାଇଛି ।
Powered by Froala Editor
