ଝାରସୁଗୁଡ଼ା: ପରକୀୟା ପ୍ରୀତି ସନ୍ଦେହରେ ଝାରସୁଗୁଡ଼ାରେ ହତ୍ୟାକାଣ୍ଡ ଘଟିଛି। ଦୁଇ ଭାଇ ଓ ଜଣେ ସହଯୋଗୀ ମିଶି ସୁନ୍ଦର ରୋହିଦାସ (୪୮)ଙ୍କୁ ସାଇକଲ ହ୍ୟାଣ୍ଡଲ ରଡ଼ରେ ପିଟି ହତ୍ୟା କରିଛନ୍ତି। ପୁଲିସ ହତ୍ୟା କରିଥିବା ଦୁଇ ଭାଇ ହିତେଶ ରୋହିଦାସ (୧୯), ଲିଙ୍ଗରାଜ ରୋହିଦାସ (୨୦) ଏବଂ ସହଯୋଗୀ ମଙ୍ଗଲ ସାହୁ (୧୮)ଙ୍କୁ ଗିରଫ କରିବା ସହିତ ସାଇକଲ ହ୍ୟାଣ୍ଡଲ ଜବତ କରିଛି।
ସୂଚନା ଅନୁଯାୟୀ; ଝାରସୁଗୁଡ଼ା ଜିଲା ସଦର ଥାନା ଅନ୍ତର୍ଗତ ସରବାହାଲ ନୂଆଁପଡ଼ାରେ ସୁନ୍ଦର ରୋହିଦାସ ରହୁଥିଲେ। ତାଙ୍କ ପଡ଼ୋଶୀ ଭାବେ ମୁଖ୍ୟ ଅଭିଯୁକ୍ତ ହିତେଶ, ଲିଙ୍ଗରାଜ ଏବଂ ତାଙ୍କ ମା’ ରହୁଥିଲେ। ହିତେଶଙ୍କ ବୟାନ ଅନୁଯାୟୀ ତାଙ୍କ ମା’ଙ୍କ ସହିତ ସୁନ୍ଦରଙ୍କର କିଛି ଦିନ ହେବ ଅନୈତିକ ସମ୍ପର୍କ ଗଢ଼ିଉଠିଥିଲା। ଏ ବିଷୟରେ ହିତେଶ ଜାଣିବା ପରେ ଭାଇ ଲିଙ୍ଗରାଜ ଓ ସହଯୋଗୀ ମଙ୍ଗଲ ସହ ମିଶି ସୁନ୍ଦରଙ୍କୁ ମଙ୍ଗଳବାର ବିଳମ୍ବିତ ରାତିରେ ସାଇକଲ ହ୍ୟାଣ୍ଡଲ ରଡ଼ରେ ପିଟି ପିଟି ହତ୍ୟା କରିଥିଲେ। ସଦର ଥାନା ପୁଲିସ ଘଟଣାସ୍ଥଳରେ ପହଞ୍ଚି ସୁନ୍ଦରଙ୍କୁ ଝାରସୁଗୁଡ଼ା ମୁଖ୍ୟ ଚିକିତ୍ସାଳୟ ନେଇଥିବାବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଜିଲା ଆରକ୍ଷୀ ଅଧୀକ୍ଷକ ଗୁଣ୍ଡାଲା ରେଡ୍ଡୀ ରାଘବେନ୍ଦ୍ର ମଧ୍ୟ ଘଟଣାସ୍ଥଳରେ ପହଞ୍ଚି ତଦନ୍ତ କରିଛନ୍ତି। ମୁଖ୍ୟ ଅଭିଯୁକ୍ତ ହିତେଶ ମା’ର ପରକୀୟା ପ୍ରୀତି ପାଇଁ ଏହି ହତ୍ୟା କରିଛନ୍ତି ବୋଲି ପୁଲିସ ଆଗରେ ସ୍ବୀକାର କରିଛନ୍ତି। ୩ ଅଭିଯୁକ୍ତଙ୍କୁ ପୁଲିସ ଗିରଫ କରିଛି।

Powered by Froala Editor