ଆମେରିକା-ଇରାନ ଯୁଦ୍ଧକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ଏକ ବିଶେଷ ନିବେଦନ କରିଛନ୍ତି । ସେ ପେଟ୍ରୋଲ ଏବଂ ଡିଜେଲ ବ୍ୟବହାରକୁ କମ୍ କରିବାକୁ ଅପିଲ୍ କରିଛନ୍ତି । ସେ ଘରୁ କାମ କରିବାକୁ ମଧ୍ୟ କହିଛନ୍ତି । ଘରୋଇ ମୁଦ୍ରା ସଂରକ୍ଷଣ ପାଇଁ ଯେତେ ସମ୍ଭବ ହୁଏ ଗୋଟିଏ ବର୍ଷ ପାଇଁ ସୁନା ନ କିଣିବାକୁ ପରାମର୍ଶ ଦେଇଛନ୍ତି । 

'ୱାର୍କ ଫ୍ରମ ହୋମ୍', କାର୍ ପୁଲିଂ, ମେଟ୍ରୋର ବ୍ୟବହାର ଏବଂ ଅନଲାଇନ୍ ମିଟିଂକୁ ପ୍ରାଥମିକତା ଦେବାକୁ ପରାମର୍ଶ ଦେଇଛନ୍ତି। ସେ କହିଛନ୍ତି ଯେ, ବର୍ତ୍ତମାନ ଭାରତ ଅନେକ ଚ୍ୟାଲେଞ୍ଜର ସମ୍ମୁଖୀନ ହେଉଛି। ବିଗତ ଦୁଇ ମାସ ଧରି ଆମ ପଡ଼ୋଶୀ ଦେଶରେ ଏକ ବଡ଼ ଯୁଦ୍ଧ ଚାଲିଛି, ଯାହାର ପ୍ରଭାବ ସାରା ବିଶ୍ୱ ଉପରେ ପଡ଼ିଛି। ଭାରତ ମଧ୍ୟ ଏହା ଦ୍ୱାରା ଗମ୍ଭୀର ଭାବେ ପ୍ରଭାବିତ ହୋଇଛି। ଭାରତ ପାଖରେ ବଡ଼ ବଡ଼ ତୈଳ କୂପ ନାହିଁ, ତେଣୁ ଆମକୁ ନିଜ ଆବଶ୍ୟକତାର ପେଟ୍ରୋଲ, ଡିଜେଲ ଏବଂ ଗ୍ୟାସ୍ ଦୁନିଆର ଅନ୍ୟ ଦେଶରୁ ମଗାଇବାକୁ ପଡ଼ୁଛି।

ପ୍ରଧାନମନ୍ତ୍ରୀଙ୍କ ଏହି ଅପିଲ ପରେ ଦେଶରେ ପୁଣି ଲକଡାଉନ୍ ଭଳି ପରିସ୍ଥିତି ଆସିବାକୁ ଯାଉଛି କି ନାହିଁ ତାକୁ ନେଇ ବତର୍କ ଆରମ୍ଭ ହୋଇଛି । ତେବେ କଣ ସତରେ ଦେଶରେ ପୁଣି ଫେରିବ ଲକ୍‌ଡାଉନ୍ ? 

କୋଭିଡ୍ ୧୯ ମହାମାରୀ ସମୟରେ ଆମେ ଅନେକ ନିୟମ ପାଳନ କରିଛୁ ଯାହାକୁ ପାଳନ କରିବା କଷ୍ଟକର ନୁହେଁ । ଦେଶବାସୀଙ୍କୁ ବିଦେଶୀ ମୁଦ୍ରା ସଂରକ୍ଷଣରେ ସହଯୋଗ କରିବାକୁ ନିବେଦନ କରିଛନ୍ତି ପ୍ରଧାନମନ୍ତ୍ରୀ । ବିଦେଶ ଯାତ୍ରା ସ୍ଥଗିତ କରିବାକୁ ପଡିବ । 

ପ୍ରଧାନମନ୍ତ୍ରୀ ଆହୁରି କହିଛନ୍ତି, ''ସୁନା କିଣିବା ହେଉଛି ଆଉ ଏକ ଦିଗ ଯାହା ପ୍ରଚୁର ବିଦେଶୀ ମୁଦ୍ରା ଖର୍ଚ୍ଚ କରେ । ଗୋଟିଏ ସମୟ ଥିଲା ଯେତେବେଳେ ଲୋକମାନେ କୌଣସି ସଙ୍କଟ କିମ୍ବା ଯୁଦ୍ଧ ହେଲେ ସୁନା ଦାନ କରୁଥିଲେ । ଆଜି ଦାନ କରିବାର କୌଣସି ଆବଶ୍ୟକତା ନାହିଁ, କିନ୍ତୁ ଦେଶର ସ୍ୱାର୍ଥ ପାଇଁ ଆମକୁ ନିଷ୍ପତ୍ତି ନେବାକୁ ପଡିବ ଯେ କୌଣସି କାର୍ଯ୍ୟକ୍ରମ କିମ୍ବା ଘଟଣା ହେଉ,  ଆମେ ସୁନା ଅଳଙ୍କାର କିଣିବାକୁ ନାହିଁ । 

ସେ ଆହୁରି ମଧ୍ୟ କହିଛନ୍ତି, "ପେଟ୍ରୋଲ ଓ ଡିଜେଲର ବ୍ୟବହାର କମ୍ କରିବାକୁ ହେବ। ସହରରେ ଯେଉଁଠି ମେଟ୍ରୋ ସୁବିଧା ଅଛି, ସେଠାରେ ଆମେ ମେଟ୍ରୋ ବ୍ୟବହାର କରିବାକୁ ନିଷ୍ପତ୍ତି ନେବା ଉଚିତ।  କେଉଁଠାକୁ ମାଲ୍ ପଠାଇବାର ଥିଲେ ରେଳବାଇର ଗୁଡ୍ସ ଟ୍ରେନ୍ ବ୍ୟବହାର କରନ୍ତୁ, କାରଣ ଟ୍ରେନ୍ ଇଲେକ୍ଟ୍ରିକ୍ ହୋଇଥିବାରୁ ଏଥିରେ ପେଟ୍ରୋଲ-ଡିଜେଲର ଆବଶ୍ୟକତା ପଡ଼େ ନାହିଁ। ଯେଉଁମାନଙ୍କ ପାଖରେ ଇଲେକ୍ଟ୍ରିକ୍ ଭାଇକିଲ୍ (EV) ଅଛି, ସେମାନେ ତାହାର ଅଧିକରୁ ଅଧିକ ବ୍ୟବହାର କରନ୍ତୁ।"

Powered by Froala Editor