ବାଲିଅନ୍ତାରେ ଜଣେ ଯୁବକଙ୍କୁ ପିଟି ପିଟି ହତ୍ୟା ଘଟଣାରେ ଏବେ ବଢୁଛି ଅସନ୍ତୋଷ। ଲୋକଙ୍କ ମାଡ଼ରେ ଓଲଟପୁର ଥାନା ମଉଜପୁର ଗାଁର ସୌମ୍ୟ ରଞ୍ଜନ ସ୍ଵାଇଁଙ୍କ ମୃତ୍ୟୁ ହୋଇଥିଲା। ଏହି ଘଟଣାରେ ପୁଲିସ ୪ ଜଣଙ୍କୁ ଗିରଫ କରିଛି । ଏଥିସହ ଅନ୍ୟ ଅଭିଯୁକ୍ତଙ୍କୁ ଧରିବା ପାଇଁ ପୁଲିସ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି। ଏହି ଘଟଣା ପରେ ବାଲିଅନ୍ତା ଥାନା ପରିସରରେ ଉତ୍ତେଜନା ଦେଖା ଦେଇଛି। ସୌମ୍ୟଙ୍କ ସମ୍ପର୍କୀୟ ବାଲିଅନ୍ତା ଥାନା ଘେରାଉ କରିଛନ୍ତି । ଏପରିକି ଥାନାରେ ପୁଲିସ –  ସୌମ୍ୟଙ୍କ ସମ୍ପର୍କୀୟ ମୁହାଁମୁହିଁ ହୋଇଛନ୍ତି। 

ଥାନା ବାହାରେ ହୋହଲ୍ଲା କରିଛନ୍ତି ମୃତକଙ୍କ ପରିବାର ଓ ଗାଁଲୋକ। ପୋଲିସ ଓ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ଲାଗି ରହିଛି। ପୋଲିସ କାଳେ ଅଭିଯୁକ୍ତଙ୍କୁ ପଚରାଉଚରା ପରେ ଛାଡିଦେବ ସେଥିପାଇଁ ଥାନା ବାହାରେ ଜଗିଛନ୍ତି ମୃତକଙ୍କ ପରିବାର ସଦସ୍ୟ। ସେପଟେ ଭିଡିଓ ଆଧାରରେ ଅନ୍ୟ ଅଭିଯୁକ୍ତଙ୍କୁ ଖୋଜୁଛି ପୋଲିସ। 

ବାଲିଅନ୍ତାରେ ୨ ଯୁବତୀଙ୍କୁ ଅସଦାଚରଣ ଅଭିଯୋଗରେ ଗ୍ରାମବାସୀ ୨ ଯୁବକଙ୍କୁ ନିସ୍ତୁକ ମାଡ ମାରିଥିଲେ। ହାତ ଗୋଡ ବାନ୍ଧି ଘୋଷାଡି ଘୋଷାଡି ମାଡ ମାରିଥିଲେ। ଏଥିରେ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଆହତ ହୋଇଛନ୍ତି। ମୃତ ଯୁବକ ଜଣେ ରେଲୱେ କନଷ୍ଟେବଲ। 

ଭୁବନେଶ୍ବର ଡିସିପି ଜଗମୋହନ ମୀନାସେ ଆହୁରି କହିଛନ୍ତି, ବର୍ତ୍ତମାନଘଟଣାର ତଦନ୍ତ ଚାଲିଛି । ଏହି ଘଟଣାରେ ତିନୋଟି ପକ୍ଷ ଅଛନ୍ତି । ଦୁଇଟି ଝିଅ ଯେଉଁମାନେ ସ୍କୁଟିରେ ଥିଲେ। ଦୁଇ ଜଣ ପୁଅ ଯିଏ ବାଇକରେ ଥିଲେ ଏବଂ ସ୍ଥାନୀୟ ଲୋକ। ମୃତକଙ୍କ ସହିତ ଥିବା ଯୁବକଙ୍କୁ ରଖି ପଚାର ଉଚରା କରୁଛୁ। ଭିଡିଓ ଜରିଆରେ ଆକ୍ରମଣକାରୀଙ୍କୁ ଚିହ୍ନଟ କରାଯାଉଛି।

Powered by Froala Editor