ଉତ୍ତରପ୍ରଦେଶର ଶିଳ୍ପନଗରୀ ନୋଏଡ଼ାରେ ଦେଖାଦେଇଥିବା ଶ୍ରମିକ ଆନ୍ଦୋଳନ ଶେଷରେ ଉଗ୍ର ରୂପ ଧାରଣ କରିଛି ।  ଗୌତମ ବୁଦ୍ଧ ନଗରରେ ଚାଲିଥିବା ପ୍ରତିବାଦ ମଧ୍ୟରେ, ଉତ୍ତର ପ୍ରଦେଶର ଯୋଗୀ ଆଦିତ୍ୟନାଥ ସରକାର ଶ୍ରମିକମାନଙ୍କ ପାଇଁ ଏକ ବଡ଼ ନିଷ୍ପତ୍ତି ନେଇଛନ୍ତି। ସରକାର ଉଭୟ କୁଶଳୀଏବଂ ଅଣକୁଶଳୀ ଶ୍ରମିକଙ୍କ ପାଇଁ ପ୍ରାୟ ୨୧% ମଧ୍ୟବର୍ତ୍ତୀକାଳୀନ ମଜୁରୀ ବୃଦ୍ଧି କରିବାକୁ ନିଷ୍ପତ୍ତି ନେଇଛନ୍ତି। ଏହା ପିଛିଲା ଭାବେ ଏପ୍ରିଲ ୧ ତାରିଖରୁ ଲାଗୁହେବ। ବିଶେଷକରି ନୋଏଡା ଏବଂ ଗାଜିଆବାଦର ଶ୍ରମିକମାନେ ଏହା ଦ୍ବାରା ଉପକୃତ ହେବେ।

ସରକାରଙ୍କ ନୂତନ ନିଷ୍ପତ୍ତି ଅନୁଯାୟୀ, ଏହି ବର୍ଦ୍ଧିତ ମଜୁରୀକୁ ତିନୋଟି ଭାଗରେ ବିଭକ୍ତ କରାଯାଇଛି । ନୋଏଡ଼ା-ଗାଜିଆବାଦ, ମହାନଗର ନିଗମ ଅଧୀନରେ ଥିବା ସହର ଏବଂ ରାଜ୍ୟର ଅନ୍ୟାନ୍ୟ ଜିଲ୍ଲା ପାଇଁ ପୃଥକ୍ ପୃଥକ୍ ହାର ସ୍ଥିର କରାଯାଇଛି । ଅଣକୁଶଳୀ ଶ୍ରମିକଙ୍କ ମଜୁରୀ ୧୧,୩୧୩ରୁ ବୃଦ୍ଧି କରି ୧୩,୬୯୦ କରାଯାଇଛି । ମୋଟ୍ ୨,୩୭୭ ବୃଦ୍ଧି କରାଯାଇଛି । ଅର୍ଦ୍ଧ-କୁଶଳୀ ୧୨,୪୪୫ରୁ ବୃଦ୍ଧି କରି ୧୫,୦୫୯ କରାଯାଇଛି । ଅନ୍ୟପଟେ କୁଶଳ ଶ୍ରମିକଙ୍କ ମଜୁରୀ ୧୩,୯୪୦ରୁ ୧୬,୮୬୮କୁ ବୃଦ୍ଧି କରାଯାଇଛି ।

ଅନ୍ୟାନ୍ୟ ନଗର ନିଗମ ଜିଲ୍ଲାଗୁଡ଼ିକରେ ଶ୍ରମିକଙ୍କ ଦରମା ୧୫ ପ୍ରତିଶତ ବୃଦ୍ଧି ଘଟିବ। ଯେତେବେଳେ ବାକି ଜିଲ୍ଲାଗୁଡ଼ିକରେ ପ୍ରାୟ ୧୦ ପ୍ରତିଶତ ମଧ୍ୟବର୍ତ୍ତୀକାଳୀନ ବୃଦ୍ଧି ଘଟିବ ବୋଲି ଘୋଷଣରେ କୁହାଯାଇଛି। ଏହି ବୃଦ୍ଧି ହାରରେ ମୂଳ ଦରମା ଏବଂ ମହଙ୍ଗା ଭତ୍ତା ଉଭୟ ଅନ୍ତର୍ଭୁକ୍ତ। 

ସୋମବାର ସକାଳୁ ନୋଏଡ଼ା ସ୍ଥିତ 'ମଦରସନ' କମ୍ପାନୀରୁ ଆରମ୍ଭ ହୋଇଥିବା ଏହି ଆନ୍ଦୋଳନ ସମଗ୍ର ସହରରେ ଦେଖାଥିଲା । ପ୍ରାୟ ୪୦୦ରୁ ଅଧିକ କମ୍ପାନୀରେ ଭଙ୍ଗାରୁଜା କରାଯାଇଥିବା ବେଳେ ପ୍ରାୟ ୧୦୦୦ରୁ ଅଧିକ ଗାଡ଼ି ନଷ୍ଟ କରାଯାଇଛି । ଉତ୍ତ୍ୟକ୍ତ ଶ୍ରମିକମାନେ ଅନେକ ଯାନବାହନରେ ନିଆଁ ଲଗାଇ ଦେଇଥିଲେ । ପରିସ୍ଥିତିକୁ ନିୟନ୍ତ୍ରଣ କରିବାକୁ ଯାଇ ଜଣେ ସବ୍-ଇନ୍ସପେକ୍ଟରଙ୍କ ସମେତ ୫ ଜଣ ପୋଲିସ କର୍ମଚାରୀ ଗୁରୁତର ଆହତ ହୋଇଛନ୍ତି । 

Powered by Froala Editor