ମଦ ଓ ବ୍ରାଉନଦସୁଗାର ବେପାରକୁ ନେଇ ରକ୍ତରଞ୍ଜିତ ହୋଇଛି ରାଜଧାନୀ । ଦିନ ଦି’ପହରେ ରାଜଧାନୀ ଭୁବନେଶ୍ୱରର ମାଷ୍ଟରକ୍ୟାଣ୍ଟିନ ଛକରେ ବୁଲିଛି ଖଣ୍ଡା ଏବଂ ଲୁହା ରଡ୍ ।  ୧୨ ଅସାମାଜିକ ଯୁବକ କମିଶନରେଟ୍ ପୁଲିସକୁ ଚ୍ୟାଲେଞ୍ଜ ଦେଇ ସମସ୍ତଙ୍କ ସମ୍ମୁଖରେ ୩ ଯୁବକଙ୍କୁ ଆକ୍ରମଣ କରି ଚମ୍ପଟ ମାରିଥିଲେ ।

ଜନଗହଳିପୂର୍ଣ୍ଣ ମାଷ୍ଟରକ୍ୟାଣ୍ଟିନ ଛକରେ ହଠାତ୍ ୧୨ ଜଣ ଯୁବକ ଖଣ୍ଡା ଓ ଲୁହା ରଡ୍ ଧରି ୩ ଜଣଙ୍କୁ ଗୋଡାଇ ଗୋଡାଇ ଆକ୍ରମଣ କରିଥିଲେ । ଅଧଘଣ୍ଟାରୁ ଅଧିକ ସମୟ ଧରି ଆତଙ୍କରାଜ ଚଳାଇଥିଲେ । ଆଉ ତା’ପରେ ସେଠାରୁ ଚମ୍ପଟ ମାରିଥିଲେ । ଖବର ପାଇ କମିଶନରେଟ ପୁଲିସ ସେଠାରେ ପହଞ୍ଚି ୩ ଜଣଙ୍କୁ ଉଦ୍ଧାର କରି କ୍ୟାପିଟାଲ ମେଡିକାଲ୍‌ରେ ଭର୍ତ୍ତି କରିଥିଲେ । ଏ ପର୍ଯ୍ୟନ୍ତ ପୁଲିସ ସେମାନଙ୍କୁ ଧରିବାରେ ସଫଳ ହୋଇନାହିଁ । ଆକ୍ରମଣରେ ବ୍ୟବହାର ହୋଇଥିବା ଲୁହା ରଡ୍‌କୁ ପୁଲିସ ଜବତ କରିଛି । 

ଏହି ଆକ୍ରମଣ ମୁଖ୍ୟ ଅଭିଯୁକ୍ତ କୁହାଯାଉଥିବା ରାଜାକୁ ଅଟକ ରଖି ପଚରାଉଚରା କରୁଛି ପୁଲିସ।  ପୁଲିସ ପଚରାଉଚରା କରିବାପରେ ଜଣାପଡ଼ିଛି ଯେ, ରାଜା ମାଷ୍ଟରକ୍ୟାଣ୍ଟିନରେ ମଦ ଓ ବ୍ରାଉନସୁଗାର ବେପାର କରୁଥିଲା । ଯାହାକୁ କି ଅନ୍ୟ ଦୋକାନୀମାନେ ବିରୋଧ କରିଥିଲେ । ଏନେଇ ରାଜା ଏବଂ ଅନ୍ୟ ଦୋକାନୀଙ୍କ ଭିତରେ ଗଣ୍ଡଗୋଳ ହୋଇଥିଲା । ଏହିଥିରୁ ପୁଲିସ ଅନୁମାନ କରିଛି ଯେ ପୂର୍ବ ଶତ୍ରୁତାରୁ ଏହି ଆକ୍ରମଣ ହୋଇଥାଇପାରେ । ପୁଲିସ ରାଜାକୁ ଅଟକ ରଖି ପଚରାଉଚରା କରିଛି ଏବଂ ଅନ୍ୟ ଅଭିଯୁକ୍ତଙ୍କୁ ଧରିବା ପାଇଁ ଚେଷ୍ଟା ଜାରି ରଖିଛି ।  

Powered by Froala Editor