ଭୁବନେଶ୍ବର: କେନ୍ଦ୍ରାପଡ଼ା ଜିଲା ରାଜନଗର ବ୍ଲକ୍‌ ଅଞ୍ଚଳର ଚାଷୀ ତ୍ରିଲୋଚନ ନାୟକଙ୍କ ହୃଦ୍‌ଘାତରେ ମୃତ୍ୟୁ ହୋଇଛି। ଧାନ ବିକ୍ରି ନିମନ୍ତେ ମଣ୍ଡିରେ ୩ଦିନ ଧରି ଜଗି ରହିବା କାରଣରୁ ମୃତ୍ୟୁ ହୋଇଥିବା ନେଇ ବିରୋଧୀଙ୍କ ଅଭିଯୋଗ ଭିତ୍ତିହୀନ। ଏଥିରେ ୧ ପ୍ରତିଶତ ସତ୍ୟତା ନାହିଁ ବୋଲି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଆଜି ବିଧାନସଭାରେ ସ୍ପଷ୍ଟ କରିଛନ୍ତି। ଖାଦ୍ୟ ସୁରକ୍ଷା ବ୍ୟବସ୍ଥା ବାଟବଣା ଏବଂ ହିତାଧିକାରୀଙ୍କୁ ଅତିରିକ୍ତ ଚାଉଳ ନ ମିଳିବା ପ୍ରସଙ୍ଗରେ ବିଜେଡି ଏବଂ କଂଗ୍ରେସ ପକ୍ଷରୁ ଗୃହରେ ଆଗତ ମୁଲବତୀ ପ୍ରସ୍ତାବ ଉପରେ ମନ୍ତ୍ରୀ ଶ୍ରୀ ପାତ୍ର ଉତ୍ତର ରଖି କହିଛନ୍ତି, ସ୍ବର୍ଗତ ତ୍ରିଲୋଚନ ନାୟକ ୪୦ କୁଇଣ୍ଟାଲ ଧାନ ବିକ୍ରି କରିଛନ୍ତି।

ଫେବୃଆରୀ ୧୮ରେ ତାଙ୍କ ବ୍ୟାଙ୍କ ଖାତାକୁ ୧.୨୦ ଲକ୍ଷ ଟଙ୍କା ଯାଇଛି। ସେ ବ୍ୟାଙ୍କରୁ ୧୯ରେ ୨ ହଜାର ଏବଂ ୨୦ରେ ୧୦ ହଜାର ଟଙ୍କା ଉଠାଣ କରିଛନ୍ତି। ଫେବୃଆରୀ ୨୫ରେ ହୃଦ୍‌ଘାତରେ ତାଙ୍କର ମୃତ୍ୟୁ ହୋଇଛି। ମୃତ୍ୟୁର କାରଣ ଜାଣିବା ପାଇଁ ସମବାୟ ଏବଂ ଖାଦ୍ୟ ସୁରକ୍ଷା ଓ ଖାଉଟି କଲ୍ୟାଣ ବିଭାଗ ପକ୍ଷରୁ ଯୁଗ୍ମ ତଦନ୍ତ ହୋଇଛି ବୋଲି ଶ୍ରୀ ପାତ୍ର କହିଛନ୍ତି।
ମନ୍ତ୍ରୀ କହିଛନ୍ତି, ଗତବର୍ଷ ସରକାର ଖରିଫରେ ୭୩.୪୫ଲକ୍ଷ ଟନ୍ ଏବଂ ରବିରେ ୧୯.୧୯ଲକ୍ଷ ଟନ୍ ଧାନ କିଣିଥିଲେ। ଖରିଫ ଏବଂ ରବି ମିଶି ମୋଟ ୯୨.୬୪ ଲକ୍ଷ ଟନ୍ ଧାନ କ୍ରୟ ହୋଇଥିଲା। ସେଥିରୁ ୬୨.୮୨ ଲକ୍ଷ ଟନ୍ ଚାଉଳ ହୋଇଥିଲା। ତନ୍ମଧ୍ୟରୁ ଏଫ୍‌ସିଆଇ ୨୬.୭୫ଲକ୍ଷ ଟନ୍ ଚାଉଳ ଉଠାଣ କରିଥିଲା। ସରକାର ପିଡିଏସରେ ୩୧.୬୫ଲକ୍ଷ ଟନ୍ ଚାଉଳ ବଣ୍ଟନ କରିଛନ୍ତି। ବଳକା ୪.୯୫ଲକ୍ଷ ଟନ୍ ଚାଉଳ ସରକାରୀ ଏବଂ ମିଲର୍ସଙ୍କ ଗୋଦାମରେ ଗଚ୍ଛିତ ଥିଲା। ସରକାରୀ ଗୋଦାମରେ ୩.୭୯ଲକ୍ଷ ଟନ୍ ଏବଂ ମିଲର୍ସଙ୍କ ଗୋଦାମ ଗୃହ‌େ‌ର ୧.୧୮ଲକ୍ଷ ଟନ୍ ଚାଉଳ ଗଚ୍ଛିତ ଥିଲା। ଏଫ୍‌ସିଆଇ ଚାଉଳ ଉଠାଇବା ପାଇଁ ରାଜ୍ୟ ସରକାର କେନ୍ଦ୍ର ସହିତ କଥାବାର୍ତ୍ତା କରିଛନ୍ତି। ଖୁବ୍‌ଶୀଘ୍ର ଏଫ୍‌ସିଆଇ ୧.୫ଲକ୍ଷ ଟନ୍ ଚାଉଳ ଉଠାଣ କରିବ। ଗୋଦାମ ଗୃହ ଖାଲି ହୋଇଯିବ ଏବଂ କ୍ରୟ ଖରିଫ ଧାନ ରଖାଯିବ। ପୂର୍ବ ସରକାର ଅମଳରେ ୧୦ କେଜି ପର୍ଯ୍ୟନ୍ତ କଟନି-ଛଟନି ହେଉଥିଲା। ବିଜେପି ସରକାରରେ କଟନି-ଛଟନି ହେଉନାହିଁ। ସରକାରଙ୍କ ଆଭିମୁଖ୍ୟ ଶୂନ କଟନି-ଛଟନି ବୋଲି ମନ୍ତ୍ରୀ ସ୍ପଷ୍ଟ କରିଛନ୍ତି।
ଶ୍ରୀ ପାତ୍ର ଆହୁରି କହିଛନ୍ତି, ବିଜେପି ସରକାର ଆସିଲା ପରେ ଇ-କେୱାଇସି ଯାଞ୍ଚ ପ୍ରକ୍ରିୟା କରିଥିଲେ। ଅଦ୍ୟାବଧି ୭ଲକ୍ଷ ୭୨ହଜାର ୯୬୫ ଜଣ ମୃତବ୍ୟକ୍ତିଙ୍କୁ ଚିହ୍ନଟ କରାଯାଇ ଯୋଜନାରୁ ବାଦ୍ ଦିଆଯାଇଛି।

ଖାଲି ହେଉଥିବ‌ା ସ୍ଥାନରେ ସରକାର ନୂଆ ହିତାଧିକାରୀଙ୍କୁ କାର୍ଡ ବଣ୍ଟନ କରୁଛନ୍ତି। ଏଥିପାଇଁ ସରକାରଙ୍କ ପାଖକୁ ୧୭ ଲକ୍ଷ ୩୮ହଜାର ୯୪୬ଟି ଆବେଦନପତ୍ର ଆସିଥିଲା। ୯ଲକ୍ଷ ୮୩ ହଜାର ୯୦୦ ପରିବାର ସଦସ୍ୟଙ୍କୁ ତାଲିକାରେ ଅନ୍ତର୍ଭୁକ୍ତ କରି ରେସନ କାର୍ଡ ଦିଆଯାଇଛି। ୮ଲକ୍ଷ ୫୮ହଜାର୬୫୪ଟି ଅଯୋଗ୍ୟ ଆବେଦନକୁ ଅଗ୍ରାହ୍ୟ କରି ଦିଆଯାଇଛି। ଏବେ ୩ଲକ୍ଷ ୮୩ହଜାର ୩୭୩ଟି ସଦ୍ୟ ହସ୍ତଗତ ଆବେଦନପତ୍ର ଗୁଡିକୁ ବ୍ଲକ ଏବଂ ପୌରାଞ୍ଚଳରେ ତର୍ଜମା କରାଯାଉଛି। ବଳକା ଚାଉଳ ପ୍ରଥମ ପର୍ଯ୍ୟାୟରେ ୧୧ଟି ଜିଲାରେ ୨୭ଲକ୍ଷ ୩୮ହଜାର ୮୨୯ ହିତାଧିକାରୀ ପରିବାର ଏବଂ ଦ୍ବିତୀୟ ପର୍ଯ୍ୟାୟରେ ୧୯ଟି ଜିଲାରେ ୭୦ଲକ୍ଷ ୪୭ହଜାର ୪୧୮ ହିତାଧିକାରୀ ପରିବାରଙ୍କୁ ତିନି ମାସ ପାଇଁ ଅତିରିକ୍ତ ୫କେଜି ଲେଖାଏଁ ଚାଉଳ ମାଗଣାରେ ବଣ୍ଟନ ହୋଇଛି। ତୃତୀୟ ପର୍ଯ୍ୟାୟରେ ୧୪ଟି ଆଦିବାସୀ ଅଧ୍ୟୁଷିତ ଜିଲାରେ ୨୭ଲକ୍ଷ ୩୪ହଜାର ୪୯୭ ହିତାଧିକାରୀ ପରିବାରକୁ ୪ମାସ ପାଇଁ ଅତିରିକ୍ତ ୧୦କେଜି ଲେଖାଏଁ ମାଗଣା ଚାଉଳ ବଣ୍ଟନ ହୋଇଛି। ଏବାବଦରେ ସମୁଦାୟ ୧୧୧୫କୋଟି ୬୮ଲକ୍ଷ ୭୨ହଜାର ୧୯୨ ଟଙ୍କା ବ୍ୟୟବରାଦ ରାଜ୍ୟ ସରକାର ବହନ କରିଛନ୍ତି। ୯୭% ଇ-କେୱାଇସି ସରିଛି। ଅଦ୍ୟାବଧି ୧୦.୪୭ଲକ୍ଷ ହିତାଧିକାରୀ ଇ-କେୱାଇସି କରିନାହାନ୍ତି; କିନ୍ତୁ ସରକାର ସେମାନଙ୍କ ଚାଉଳ କାଟିନାହାନ୍ତି ବୋଲି ବିଭାଗୀୟ ମନ୍ତ୍ରୀ ଗୃହରେ ଉତ୍ତର ରଖିଛନ୍ତି। ତେବେ ମନ୍ତ୍ରୀଙ୍କ ଉତ୍ତରରେ ଅସନ୍ତୋଷ ପ୍ରକାଶ କରି ବିରୋଧୀ କଂଗ୍ରେସ ଓ ବିଜେଡ଼ି ସଦସ୍ୟଗଣ କକ୍ଷତ୍ୟାଗ କରିଛନ୍ତି।

Powered by Froala Editor