ପବିତ୍ର ମହାଶିବରାତ୍ରି ଅବସରରେ ଭୁବନେଶ୍ୱରର ପ୍ରସିଦ୍ଧ ଶ୍ରୀଲିଙ୍ଗରାଜ ମନ୍ଦିରରେ ମହାପ୍ରଭୁଙ୍କ ମହାଦୀପ ଉଠିଛି। ଗୁରୁତ୍ୱପୂର୍ଣ୍ଣ କଥା ହେଉଛି, ଚଳିତ ବର୍ଷ ପ୍ରଶାସନ ଓ ସେବାୟତଙ୍କ ସମନ୍ୱୟ ଯୋଗୁଁ ନିର୍ଦ୍ଧାରିତ ସମୟ ପୂର୍ବରୁ ମନ୍ଦିର ଚୂଡ଼ାକୁ ମହାଦୀପ ଉଠିଛି। ମହାଦୀପ ଉଠିବା ପାଇଁ ପୂର୍ବରୁ ରାତି ୧୦ଟା ସମୟ  ରଖାଯାଇଥିଲା। କିନ୍ତୁ ସମସ୍ତ ନୀତିକାନ୍ତି ଶ୍ରୀଘ ସମାପନ କରାଯାଇଥିବାରୁ ରାତି ୮ ଟା ୪୦ ରେ ଶ୍ରୀଲିଙ୍ଗରାଜ ମନ୍ଦିର ଚୂଡ଼ାକୁ ମହାଦୀପ ଉଠିଛି ।  ମହାଦୀପ ଉଠିବା ବେଳେ ଓଁ ନମଃ ଶିବାୟ ଧ୍ବନିରେ  ପ୍ରକମ୍ପିତ ହୋଇ ଉଠିଥିଲା ଚତୁଃଦିଗ ।

ମହାଦୀପ ଉଠିବା ପରେ ହଜାର ହଜାର ଶ୍ରଦ୍ଧାଳୁ “ହର ହର ମହାଦେବ” ଧ୍ୱନିରେ ଏକାମ୍ର କ୍ଷେତ୍ରକୁ ପ୍ରକମ୍ପିତ କରିଥିଲେ। ଦୀର୍ଘ ସମୟ ଧରି ଉପବାସ ରଖିଥିବା ଶ୍ରଦ୍ଧାଳୁମାନେ ମହାଦୀପ ଦର୍ଶନ ପରେ ନିଜର ବ୍ରତ ଭଙ୍ଗ କରିଛନ୍ତି।

ଶନିବାର ରାତିରୁ ଭକ୍ତମାନେ ଲିଙ୍ଗରାଜ ଦର୍ଶନ ପାଇଁ ଧାଡ଼ି ବାନ୍ଧି ଅପେକ୍ଷା କରିଥିଲେ। ଦିନତମାମା ମହାପ୍ରଭୁଙ୍କ ଦର୍ଶନ ଭକ୍ତମାନେ କରିଥିଲେ।  ସନ୍ଧ୍ୟାରେ ମନ୍ଦିର ପରିସରରେ  ଭକ୍ତମାନେ ଦୀପ ଜାଳି ଥିଲେ। ହୁଳହୁଳି, ହରିବୋଲରେ ପ୍ରକମ୍ପିତ ହୋଇ ଉଠିଥିଲା ପୂରା ମନ୍ଦିର ପରିସର । ମହାଦୀପ ମନ୍ଦିର ଶିଖରକୁ ଉଠିବା ଆଗରୁ ଅନୁଷ୍ଠିତ ହୋଇଥିଲା ହରିହର ଭେଟ । ସ୍ୱତନ୍ତ୍ର ରୀତିନୀତି ସହ ଶ୍ରୀଲିଙ୍ଗରାଜଙ୍କ ସହ ଭେଟ ହୋଇଥିଲେ ଶ୍ରୀ ଅନନ୍ତ ବାସୁଦେବ। ଏହି ଦୃଶ୍ୟକୁ ଦର୍ଶନ  କରିଥିଲେ ସେଠାରେ ଦ୍ୱୀପ ପ୍ରଜ୍ୱଳନ କରୁଥିବା ହଜାର ହଜାର ଶ୍ରଦ୍ଧାଳୁ ।

Powered by Froala Editor