ବଲାଙ୍ଗିର: ବଲାଙ୍ଗିର ଜିଲାରେ ଚାଷୀଙ୍କ ସମସ୍ୟା ସୁଧୁରିବା ନାଁ ଧରୁ ନାହିଁ। ଖରିଫ ଧାନ ବିକ୍ରି ପୂର୍ବରୁ ପ୍ୟାକ୍ସରେ ପଞ୍ଜୀକୃତ ଚାଷୀଙ୍କ ମୃତ୍ୟୁ ପରେ ଟୋକନ ମିଳିଥିଲେ ହେଁ ପରିବାର ଲୋକେ କଷ୍ଟ ଉପାର୍ଜିତ ଧାନ ପ୍ୟାକ୍ସରେ ବିକ୍ରି କରି ନ ପାରି କ୍ଷତିଗ୍ରସ୍ତ ହୋଇଛନ୍ତି। ଟୋକନ ଅବଧି ସରିଯିବା ପରେ ବାଧ୍ୟ ହୋଇ କମ୍‌ ଦରରେ ଦଲାଲ ହାତରେ ଟେକି ଦେଇ ୨.୫ ଲକ୍ଷ ଟଙ୍କା କ୍ଷତି ସହିଥିବା ଅଭିଯୋଗ ହୋଇଛି। ଆଗଲପୁର ବ୍ଲକ ବକଟି ଗାଁରେ ଏଭଳି ଏକ ଘଟଣା ଘଟିଥିବା ଲୋକଲୋଚନକୁ ଆସିଛି। ଏହାକୁ ନେଇ ଚାଷୀ ମହଲରେ ଉଦ୍‌ବେଗ ପ୍ରକାଶ ପାଇଛି। ପ୍ରକାଶ ଯେ ବକଟି ଗାଁର ବିପିନ ବିହାରୀ ହୋତାଙ୍କ ପୁଅ ସୁଧାଂଶୁ ଶେଖର ହୋତା(୪୭) ପ୍ରାୟ ୧୦ ଏକର ଧାନ ଚାଷ କରିଥିଲେ। ୧୮୦ କ୍ବିଣ୍ଟାଲ ଧାନ ବିକ୍ରି ପାଇଁ ନିର୍ଦ୍ଧାରିତ ସମୟରେ ବକଟି ପ୍ୟାକ୍ସରେ ପଞ୍ଜୀକରଣ କରିଥିଲେ। ଗତ ଅଗଷ୍ଟ ୧୧ରେ ହୃଦଘାତରେ ସୁଧାଂଶୁଙ୍କ ପରଲୋକ ହୋଇଯାଇଥିଲା। ଶୁଦ୍ଧିକ୍ରିୟା ପରେ ପରିବାର ଲୋକେ ଅମଳ ଧାନ ବିକ୍ରି ପାଇଁ ବକଟି ପ୍ୟାକ୍ସ ସମ୍ପାଦକଙ୍କ ଦ୍ବାରସ୍ଥ ହୋଇଥିଲେ। ଟୋକନ ଆସିବା ପରେ ପ୍ୟାକ୍ସରେ ଧାନ ବିକ୍ରି କରିପାରିବେ ବୋଲି କୁଆଡ଼େ ପ୍ୟାକ୍ସ ସମ୍ପାଦକ ବିପିନଙ୍କୁ କହିଥିଲେ। ଇତିମଧ୍ୟରେ ୧୮୦ କ୍ବିଣ୍ଟାଲ ଧାନ ବିକ୍ରି ପାଇଁ ଯୋଗାଣ ବିଭାଗ ପକ୍ଷରୁ ସୁଧାଂଶୁଙ୍କ ନାମରେ ୩ଟି ଟୋକନ ଆସିଥିଲା। ପ୍ୟାକ୍ସରେ ବ୍ୟବସ୍ଥା ଅନୁଯାୟୀ ମୃତ ଚାଷୀ ସୁଧାଂଶୁଙ୍କ ବାପା ଓ ପତ୍ନୀଙ୍କ ଆଧାର ଯାଞ୍ଚରେ ଧାନ ବିକ୍ରି ପାଇଁ ଅନୁମତି ମିଳି ନ ଥିଲା। ପରିବାର ଲୋକେ ପ୍ୟାକ୍ସ ସମ୍ପାଦକଙ୍କଠାରୁ ଏଆର୍‌ସିଏସ୍‌, ଡିଆର୍‌ସିଏସ୍‌, ଜିଲା ଯୋଗାଣ ବିଭାଗର ଦ୍ବାରସ୍ଥ ହୋଇଥିଲେ।

ଟୋକନ ଅନ୍ୟ ବ୍ୟକ୍ତିଙ୍କ ନାଁରେ ସ୍ଥାନାନ୍ତର ବ୍ୟବସ୍ଥା ନ ଥିବାରୁ ସୁଧାଂଶୁଙ୍କ ନାଁରେ ମିଳିଥିବା ଟୋକନରେ
ପରିବାର ଲୋକେ ଧାନ ବିକ୍ରି କରିପାରି ନ ଥିଲେ। ଥରେ ଟୋକନ ଅବଧି ବାତିଲ ହେବା ପରେ ଏହାକୁ ୧୫ ଦିନ ପାଇଁ ଅବଧି ବୃଦ୍ଧି କରାଯାଇଥିଲା। ସମସ୍ୟା ସମାଧାନ ପାଇଁ ମୃତ ଚାଷୀଙ୍କ ପରିବାର ଭୁବନେଶ୍ବର ଯୋଗାଣ ବିଭାଗ ନିର୍ଦେଶାଳୟର ମଧ୍ୟ ଦୃଷ୍ଟି ଆକର୍ଷଣ କରିଥିଲେ। ତଥାପି ସମସ୍ୟା ସମାଧାନ ନ ହେବାରୁ ଶେଷରେ ବୃଦ୍ଧ ବିପିନ ବିହାରୀ ଓ ମୃତ ଚାଷୀ ସୁଧାଂଶୁଙ୍କ ସ୍ତ୍ରୀ ବାଧ୍ୟ ହୋଇ ନିଜ ବର୍ଷକର ପରିଶ୍ରମ, କଷ୍ଟ ଉପାର୍ଜିତ ୧୮୦ କ୍ବିଣ୍ଟାଲ ଧାନ ଦଲାଲ ହାତରେ ବିକ୍ରି କରିଥିବା ଅଭିଯୋଗ କରିଛନ୍ତି। ପ୍ୟାକ୍ସରେ ସରକାରୀ ଦର ପ୍ରାୟ ୩୧ଶହ ଟଙ୍କା ହୋଇଥିବା ବେଳେ ପୀଡ଼ିତ ପରିବାର କ୍ବିଣ୍ଟାଲ ପ୍ରତି ୧୭ରୁ ୧୮ଶହ ଟଙ୍କା ଦରରେ ଦଲାଲ୍‌ ହାତରେ ଧାନ ଟେକିଦେବାକୁ ବାଧ୍ୟ ହୋଇଥିବାରୁ ପ୍ରାୟ ୨.୫ ଲକ୍ଷ ଟଙ୍କାରୁ ଅଧିକ କ୍ଷତି ହୋଇଥିବା ବିପିନ ବିହାରୀ ଅଭିଯୋଗ କରିଛନ୍ତି।

Powered by Froala Editor