ଭୁବନେଶ୍ବର: ରାଜ୍ୟ କ୍ୟାବିନେଟର ଗୁରୁତ୍ୱପୂର୍ଣ୍ଣ ବୈଠକ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଛି । ଲୋକସେବା ଭବନ ସମ୍ମିଳନୀ କକ୍ଷରେ ଅନୁଷ୍ଠିତ ବୈଠକରେ ୮ଟି ବିଭାଗର ୧୧ଟି ପ୍ରସ୍ତାବ ଅନୁମୋଦନ ଲାଭ କରିଛି । ଶିଳ୍ପ ବିଭାଗ, ଗୃହ ବିଭାଗ, ଦକ୍ଷତା ବିକାଶ ଓ ବୈଷୟିକ ଶିକ୍ଷା, ପର୍ଯ୍ୟଟନ ବିଭାଗ, ପଂଚାୟତିରାଜ ଓ ପାନୀୟ ଜଳ ବିଭାଗ ଏବଂ ରାଜସ୍ବ ଆଦି ବିଭାଗ ପ୍ରତ୍ୟେକରୁ ଗୋଟିଏ ଲେଖାଏଁ, ଖାଦ୍ୟ ଯୋଗାଣ ଏବଂ ଖାଉଟି କଲ୍ୟାଣ ବିଭାଗର ୩ଟି ଏବଂ ଜଳସମ୍ପଦ ବିଭାଗର ୨ଟି ପ୍ରସ୍ତାବକୁ କ୍ୟାବିନେଟ ଅନୁମୋଦନ ଦେଇଛି । ମୁଖ୍ୟ ଶାସନ ସଚିବ ଅନୁ ଗର୍ଗ ଏନେଇ ସୂଚନା ଦେଇଛନ୍ତି ।

ରାଜ୍ୟ କ୍ୟାବିନେଟ ଓଡ଼ିଶା ଦକ୍ଷତା ବିକାଶ ପ୍ରକଳ୍ପ (OSDP) ପର୍ଯ୍ୟାୟକୁ ଅନୁମୋଦନ କରିଛି । ଯାହା ଆଗାମୀ ପାଞ୍ଚ ବର୍ଷ ୨୦୨୫-୨୬ରୁ ୨୦୨୯-୩୦ ମଧ୍ୟରେ Asian Development Bank ସହାୟତାରେ କାର୍ଯ୍ୟକାରୀ ହେବ । ଓଡ଼ିଶା ଭିଜନ 2036 ଏବଂ 2047 ସହିତ ସମନ୍ଵୟ ରଖି ଓଡ଼ିଶାର ଦକ୍ଷତା ବିକାଶ ଇକୋସିଷ୍ଟମକୁ ସୁଦୃଢ଼ ଏବଂ ଆଧୁନିକୀକରଣ କରିବା ଲକ୍ଷ୍ୟ । ଭୁବନେଶ୍ବରରେ ଥ‌ିବା ବିଶ୍ଵ ଦକ୍ଷତା କେନ୍ଦ୍ରର ସମ୍ପ୍ରସାରଣ ସହିତ ନୂତନ ପାଠ୍ୟକ୍ରମ ଲଜିଷ୍ଟିକ୍ସ, ଡିଜିଟାଲ ଆନିମେସନ ଏବଂ ସ୍ଵାସ୍ଥ୍ୟସେବାର ପ୍ରଚଳନ ହେବ । ଏହା ସମେତ ତିନିଟି ନୂତନ କ୍ୟାମ୍ପସ ପ୍ରତିଷ୍ଠା ହେବ । ସେମିକଣ୍ଡକ୍ଟର, IT/ITeS ଏବଂ ଏରୋସ୍ପେସ କ୍ଷେତ୍ର ପାଇଁ ଭୁବନେଶ୍ବରରେ କ୍ୟାମ୍ପସ I, ଆତିଥ୍ୟ ଏବଂ ସାମୁଦ୍ରିକ କ୍ଷେତ୍ର ପାଇଁ ବ୍ରହ୍ମପୁରରେ କ୍ୟାମ୍ପସ III ଏବଂ କୃଷି ପ୍ରଯୁକ୍ତିବିଦ୍ୟା, ନବୀକରଣୀୟ ଶକ୍ତି, ରିଟେଲ ଏବଂ ଭିଜୁଆଲ୍ ମର୍କେଣ୍ଡାଇଜିଂ ପାଇଁ ସମ୍ବଲପୁରରେ କ୍ୟାମ୍ପସ IV । ସମାନ୍ତରାଳ ଭାବରେ ରାଜ୍ୟର ପାଞ୍ଚଟି ସରକାରୀ ITIକୁ ଉତ୍କର୍ଷ ITI ଭାବରେ ଉନ୍ନୀତ କରାଯିବ । ପ୍ରକଳ୍ପ ପାଇଁ ବ୍ୟୟ ଅଟକଳ 1,140 କୋଟି । ADB ରୁ 570 କୋଟି ଋଣ ସହାୟତା ଏବଂ ରାଜ୍ୟ ବଜେଟରୁ 570 କୋଟିକୁ ମିଶାଇ 50:50 ପାଣ୍ଠି ବ୍ୟବସ୍ଥା ମାଧ୍ୟମରେ ପାଞ୍ଚ ବର୍ଷ ମଧ୍ୟରେ କାର୍ଯ୍ୟକାରୀ କରାଯିବ ।

Powered by Froala Editor