ଭାରତୀୟ ଜନତା ପାର୍ଟି ଏକ ବଡ଼ ସାଂଗଠନିକ ପରିବର୍ତ୍ତନ କରିଛି । ନୀତିନ ନବୀନ ହେଲେ ବିଜେପି ନୂଆ ରାଷ୍ଟ୍ରୀୟ କାର୍ଯ୍ୟକାରୀ ସଭାପତି । ବିଜେପି ସଂସଦୀୟ ବୋର୍ଡରେ ନୀତିନ ନବୀନଙ୍କ ନାଁ ଘୋଷଣା କରାଯାଇଛି । ବିହାର ସରକାରରେ ମନ୍ତ୍ରୀ ଅଛନ୍ତି ନୀତିନ ନବୀନ । ତାଙ୍କର ନିଯୁକ୍ତି ତୁରନ୍ତ କାର୍ଯ୍ୟକାରୀ ହେବ।  ନୂଆ କାର୍ଯ୍ୟକାରୀ ଅଧ୍ୟକ୍ଷ ନୀତିନ ନବୀନଙ୍କ ଦିଲ୍ଲୀ ସ୍ଥିତ ପାର୍ଟି ମୁଖ୍ୟାଳୟରେ ଜୋରଦାର ସ୍ୱାଗତ କରାଯାଇଛି।

ଅମିତ ଶାହ ଓ ଜେପି ନଡ୍ଡା ତାଙ୍କୁ ଶୁଭ କାମନା ଦେଇଛନ୍ତି। ବହୁ ସଂଖ୍ୟାରେ ପାର୍ଟି କାର୍ଯ୍ୟକର୍ତ୍ତା ତାଙ୍କୁ ଶୁଭେଚ୍ଛା ଜଣାଇବାକୁ ପହଞ୍ଚିଛନ୍ତି। ଅନ୍ୟପଟେ ସଞ୍ଜୟ ସରାଗଭୀଙ୍କୁ ବିହାର ବିଜେପିର ଅଧ୍ୟକ୍ଷ କରାଯାଇଛି। ସେ ଦରଭଙ୍ଗାରୁ ବିଧାୟକ ଅଛନ୍ତି ଏବଂ ପୂର୍ବତନ ମନ୍ତ୍ରୀ ରହି ସାରିଛନ୍ତି। ଏବେ ସେ ଦିଲୀପ ଜାୟସୱାଲଙ୍କ ସ୍ଥାନ ନେବେ।

ରାଷ୍ଟ୍ରୀୟ ସଭାପତି ହେବା ପୂର୍ବରୁ ଜେପି ନଡ୍ଡାଙ୍କୁ ମଧ୍ୟ କାର୍ଯ୍ୟକାରୀ ସଭାପତି ନିଯୁକ୍ତ କରାଯାଇଥିଲା। ନୀତିନ ନବୀନଙ୍କ ବୟସ ୪୫ ବର୍ଷ ଏବଂ ତାଙ୍କର ସରକାର ଏବଂ ସଂଗଠନରେ ଯଥେଷ୍ଟ ଅଭିଜ୍ଞତା ରହିଛି ।

ନୀତିନ ନବୀନଙ୍କ ପିତା ନବୀନ କିଶୋର ପ୍ରସାଦ ସିହ୍ନା ଜଣେ ଦୃଢ଼ ବିଜେପି ନେତା ଥିଲେ। ତାଙ୍କ ମୃତ୍ୟୁ ପରେ ଉପ-ନିର୍ବାଚନ ଅନୁଷ୍ଠିତ ହୋଇଥିଲା। ଜନସାଧାରଣ ସେହି ପରିବାରର ପୁଅ ଉପରେ ସେମାନଙ୍କର ବିଶ୍ୱାସ ପ୍ରକାଶ କରିଥିଲେ। ଏହି ମୁହୂର୍ତ୍ତରେ ନୀତିନ ନବୀନଙ୍କ ରାଜନୈତିକ ଯାତ୍ରା ଆରମ୍ଭ ହୋଇଥିଲା। ପରବର୍ତ୍ତୀ ସମୟରେ ଏହା ବିହାର ରାଜନୀତିରେ ଏକ ଉଜ୍ଜ୍ୱଳ ଅଧ୍ୟାୟ ହୋଇଗଲା।

Powered by Froala Editor