ପାଟନା: ବିହାର ନିର୍ବାଚନରେ ଲାଲୁପ୍ରସାଦ ଯାଦବଙ୍କ ରାଷ୍ଟ୍ରୀୟ ଜନତା ଦଳ (ଆରଜେଡି)ର ବିପର୍ୟ୍ୟୟ ତାଙ୍କ ପରିବାରରେ ଅଶାନ୍ତ ଝଡ଼ ସୃଷ୍ଟି କରିଛି। ଲାଲୁଙ୍କୁ ନିଜର ଗୋଟିଏ କିଡ୍‌ନୀ ଦେଇ ଅତୀତରେ ରାଜନୀତିରେ ଚର୍ଚ୍ଚାକୁ ଆସିଥିବା ତାଙ୍କ ଦ୍ବିତୀୟ ଝିଅ ରୋହିଣୀ ଆଚାର୍ୟ୍ୟ ଦଳର ଏଭଳି ଶୋଚନୀୟ ପ୍ରଦର୍ଶନ ପାଇଁ ସିଧାସଳଖ ଭାଇ ତେଜସ୍ବୀଙ୍କୁ ଦାୟୀ କରିଛନ୍ତି। ଏପରିକି ପରିବାର ସହ ସମ୍ପର୍କ ଛିନ୍ନ କରିସାରିଛନ୍ତି। ରୋହିଣୀ ଏଭଳି ଚରମ ନିଷ୍ପତ୍ତି ସମ୍ପର୍କରେ ଘୋଷଣା କରିବା ପୂର୍ବରୁ ସାନ ଭାଇ ତେଜସ୍ବୀଙ୍କ ସହ ପ୍ରବଳ ଯୁକ୍ତିତର୍କ ହେବା ଏବଂ ତେଜସ୍ବୀ ଉତ୍‌କ୍ଷିପ୍ତ ହୋଇ ତାଙ୍କୁ ଚପଲ ଫିଙ୍ଗିଥିବା ଭଳି ଘଟଣା ସାମ୍ନାକୁ ଆସିଛି। କେବଳ ସେତିକି ନୁହେଁ, ଲାଲୁଙ୍କ ଅନ୍ୟ ତିନି ଝିଅ ନିର୍ବାଚନ ବିପର୍ୟ୍ୟୟ ଓ ପାରିବାରିକ ଅଶାନ୍ତି ପରେ ଘର ଛାଡିଥିବା ଜଣାପଡିଛି। ମିଳିଥିବା ସୂଚନାନୁଯାୟୀ, ଦଳର ପ୍ରଦର୍ଶନ ପାଇଁ ତେଜସ୍ବୀ କୁଆଡେ ରୋହିଣୀଙ୍କୁ ପ୍ରଥମେ ଦାୟୀ କରିଥିଲେ। ‘ତୁମ ଯୋଗୁଁ ଆମେ ନିର୍ବାଚନ ହାରିଲୁ, ଆମ ଉପରେ ତୁମର ଅଭିଶାପ ପଡିଛି’ ବୋଲି ତେଜସ୍ବୀ କହିଥିଲେ। ଏହାପରେ ତେଜସ୍ବୀଙ୍କ ବଡ଼ ଭଉଣୀ ରୋହିଣୀଙ୍କ ଉପରକୁ ଚପଲ ଫୋପାଡିଥିଲେ। ସୂଚନାଯୋଗ୍ୟ ଏକଦା ରାଜନୀତିରେ ସକ୍ରିୟ ଥିବା ରୋହିଣୀ ଅଭିଯୋଗ କରିଛନ୍ତି ଯେ ତେଜସ୍ବୀଙ୍କ ଅତି ଘନିଷ୍ଠ କୁହାଯାଉଥିବା ସଞ୍ଜୟ ଯାଦବ ଓ ରମିଜ୍‌ ନିମତ ଖାନ ଦଳର ପରାଜୟ ପାଇଁ ଶହେ ପ୍ରତିଶତ ଦାୟୀ। ପରାଜୟ ପରେ ଏ ଦୁଇଜଣ ଦୋଷ କାହିଁକି ମୁଣ୍ଡାଉ ନାହାନ୍ତିି ବୋଲି ରୋହିଣୀ ପ୍ରଶ୍ନ କରିବାରୁ ତେଜସ୍ବୀ ଏଥିରେ ଉତ୍‌କ୍ଷିପ୍ତ ହୋଇପଡିଥିଲେ। ରାଜନୀତିରେ ଚାଣକ୍ୟ ସାଜିଥିବା ଲୋକ ଉତ୍ତରଦାୟୀ ରହିବା ଉଚିତ ବୋଲି ରୋହିଣୀ କହିଥିଲେ। ତେଜସ୍ବୀଙ୍କ ଦୁଇ ରାଜନୈତିକ ପରାମର୍ଶଦାତାଙ୍କୁ ଦୋଷ ଦେବା ରୋହିଣୀଙ୍କ ପାଇଁ ମହଙ୍ଗା ପଡିଛି। ଏହି କାରଣରୁ ତାଙ୍କୁ ଘରୁ ତଡି ଦିଆଯାଇଛି ବୋଲି ରୋହିଣୀ ଅଭିଯୋଗ କରିଛନ୍ତି।ଶନିବାର ଘଟଣାକୁ ନେଇ ରୋହିଣୀ ତାଙ୍କର ଏକ୍ସ ଆକାଉଣ୍ଟରେ ଲେଖିଛନ୍ତି ଯେ ‘ଆଜି ଜଣେ ଝିଅ, ଭଉଣୀ, ବିବାହିତା ମହିଳା ଏବଂ ଜଣେ ମାଆଙ୍କୁ ଅପମାନିତ ହେବାକୁ ପଡିଛି’। ତେଜସ୍ବୀ ତାଙ୍କ ଉପରକୁ ଚପଲ ଫୋପାଡିବା ଘଟଣା ରୋହିଣୀଙ୍କ ସ୍ବାଭିମାନରେ ଆଞ୍ଚ ଆଣିଥିବା ସେ କହିଛନ୍ତି। ବାପମାଆ ଓ ଭଉଣୀମାନେ କାନ୍ଦୁଥିବାବେଳେ ଘର ଛାଡିବା ଅତ୍ୟନ୍ତ କଷ୍ଟଦାୟକ ଥିଲା ବୋଲି ରୋହିଣୀ କହିଛନ୍ତି। ତେଜସ୍ବୀ ଓ ତାଙ୍କ ସହଯୋଗୀମାନେ ମୋତେ ବାପଘର ସହ ସମ୍ପର୍କ ଛିନ୍ନ କରିବାକୁ ବାଧ୍ୟ କରିଥିବା ସେ ଅଭିଯୋଗ କରିଛନ୍ତି। 

Powered by Froala Editor