ବିଧାନସଭା ନିର୍ବାଚନରେ ମହାଗଠବନ୍ଧନର ଶୋଚନୀୟ ପରାଜୟ ପରେ ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବଙ୍କ ପରିବାରରେ ଝଡ଼ ସୃଷ୍ଟି ହୋଇଛି। ପ୍ରଥମେ ପୁଅ ତେଜ ପ୍ରତାପ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଏନଡିଏ ନେତାଙ୍କୁ ପ୍ରଶଂସା କରିଥିବା ବେଳେ ଫଳାଫଳ ଆସିବା ପରେ ତେଜସ୍ୱୀଙ୍କୁ ବିଫଳ ନେତା ବୋଲି କହିଥିଲେ। ଏବେ, ଝିଅ ରୋହିଣୀ ଆଚାର୍ଯ୍ୟ ଶନିବାର ସୋସିଆଲ ମିଡିଆ ପୋଷ୍ଟରେ ରାଜନୀତି ଛାଡ଼ିବା ଏବଂ ତାଙ୍କ ପରିବାର ସହିତ ସମ୍ପର୍କ ଭାଙ୍ଗିବାର ନିଷ୍ପତ୍ତି ଘୋଷଣା କରିଛନ୍ତି।

ଏକ୍ସରେ ଲେଖି ରୋହିଣୀ ଆଚାର୍ଯ୍ୟ ଏହି ଘୋଷଣା କରିଛନ୍ତି। ରୋହିଣୀ  ନିଜର ଟ୍ୱିଟ୍‌ରେ ସଞ୍ଜୟ ଯାଦବଙ୍କ ଉପରେ ଗୁରୁତର ଅଭିଯୋଗ ଲଗାଇଛନ୍ତି। ରୋହିଣୀ ଲେଖିଛନ୍ତି ଯେ, ସଞ୍ଜୟ ଯାଦବ ଓ ରମିଜ ତାଙ୍କୁ ଏମିତି କରିବାକୁ କହିଛନ୍ତି। ସେ ଲେଖିଛନ୍ତି ଯେ ମୁଁ ସବୁ ଅଭିଯୋଗକୁ ନିଜ ଉପରକୁ ନେଉଛି। ଆଶ୍ଚର୍ଯ୍ୟର କଥା ଏହା ଯେ, ରୋହିଣୀ ପ୍ରଥମେ କେବଳ ରାଜନୀତି ଛାଡ଼ିବା କଥା ଲେଖି ଥିଲେ। କିନ୍ତୁ ପରେ ସେ ଏହାକୁ ଏଡିଟ୍‌ କରି ସଞ୍ଜୟ ଯାଦବ ଓ ରମିଜଙ୍କ ଉପରେ ଅଭିଯୋଗ ଲଗାଇଛନ୍ତି।

ଦଳ କିମ୍ବା ପରିବାର ପକ୍ଷରୁ ଏହା ଉପରେ କୌଣସି ଆନୁଷ୍ଠାନିକ ପ୍ରତିକ୍ରିୟା ଦିଆଯାଇ ନାହିଁ। ତେବେ ସଞ୍ଜୟ ଯାଦବ ଆରଜେଡିର ରାଜ୍ୟସଭା ସାଂସଦ ଏବଂ ତେଜସ୍ୱୀ ଯାଦବଙ୍କ ସବୁଠାରୁ ବିଶ୍ୱସ୍ତ ସମର୍ଥକମାନଙ୍କ ମଧ୍ୟରୁ ଜଣେ। ଅନ୍ୟପକ୍ଷରେ ରମିଜଙ୍କୁ ତେଜସ୍ୱୀଙ୍କ ଭଲ ବନ୍ଧୁ ବୋଲି କୁହାଯାଏ ଏବଂ ସେ ପଡ଼ୋଶୀ ଉତ୍ତରପ୍ରଦେଶର ଏକ ରାଜନୈତିକ ପରିବାରରୁ ଆସିଛନ୍ତି।

Powered by Froala Editor