ବ୍ରହ୍ମପୁର: ବିଜେପି ନେତା ପୀତବାସ ପଣ୍ଡା ହତ୍ୟା ମାମଲାର ଅନ୍ୟତମ ଅଭିଯୁକ୍ତ କୋରାପୁଟ ଜୟପୁରର ଫାର୍ମ ହାଉସ ମାଲିକ ସୁନିଲ ହୋତାଙ୍କୁ ପୁଲିସ ଗିରଫ କରିଛି। ସୁନିଲ ଗିରଫ ହେବା ପରେ ଏହି ବହୁ ଚର୍ଚ୍ଚିତ ହତ୍ୟା ମାମଲାର ଅଭିଯୁକ୍ତ ସଂଖ୍ୟା ୧୩ରେ ପହଞ୍ଚିଛି । ସେହିପରି ଏହି ହତ୍ୟା ମାମଲାର ଅନ୍ୟତମ ଅଭିଯୁକ୍ତ ସୁଦର୍ଶନ ଜେନା ଏବେ ପୁଲିସ କବ୍ଜାରେ ରହିଛି। ସୁଦର୍ଶନ ଏହି ହତ୍ୟା ପାଇଁ ଟଙ୍କା ଖର୍ଚ୍ଚ କରୁଥିଲା ବୋଲି ପୁଲିସ ତଦନ୍ତରୁ ଜାଣିବାକୁ ପାଇଛି। ସେହିକ୍ରମରେ ସୁଦର୍ଶନଙ୍କୁ ଅଟକ ରଖି ପଚରାଉଚରା କରାଯାଉଛି ।

ପୁଲିସ ବୁଧବାର ପୂର୍ବତନ ବିଧାୟକ ବିକ୍ରମ ପଣ୍ଡାଙ୍କ ସମେତ ପୂର୍ବତନ ମେୟର ଶିବଶଙ୍କର ଦାସ, ବିଏମ୍‌ସିର ୪୧ ନଂ ୱାର୍ଡ କର୍ପୋରେଟର ମଳୟ ବିଷୋୟୀ, ବିଜେଡି ନେତା ମଦନ ଦଳାଇ ସମେତ ମୋଟ ୧୨ ଜଣଙ୍କୁ ଗିରଫ କରି ଅଦାଲତ ଚାଲାଣ କରିଥିଲା। ପୀତବାସଙ୍କୁ ଗୁଳି କରିବା ପରେ ଜୟପୁର ଚାଲି ଯାଇଥିବା କୁରୁପତି ଭୂୟାଁ ଓ ଏହି ମାମଲାର ଅନ୍ୟତମ ମାଷ୍ଟରମାଇଣ୍ଡ ଉମା ବିଷୋୟୀଙ୍କୁ ଫାର୍ମ ହାଉସ ମାଲିକ ସୁନିଲ ଆଶ୍ରୟ ଦେଇଥିଲେ। ଏହି ସମୟରେ ଅଭିଯୁକ୍ତ ମଳୟ ବିଷୋୟୀ ଓ ମଦନ ଦଳେଇ ନିୟମିତ ସୁନିଲଙ୍କୁ ଫୋନ କରି ଅଭିଯୁକ୍ତ ଉମା ଓ କୁରୁପତି ବିଷୟରେ ବୁଝାସୁଝା କରୁଥିଲେ। କୁରୁପତି ଓ ଉମା ହତ୍ୟା କରି ଏଠାରେ ଆଶ୍ରୟ ନେବାକୁ ଆସିଥିବା ଜାଣିଥିଲେ ମଧ୍ୟ ସୁନିଲ ସେମାନଙ୍କୁ ଆଶ୍ରୟ ଦେଇଥିଲେ। ସୁନିଲ ଓ ବିକ୍ରମଙ୍କ ମଧ୍ୟରେ ପୂର୍ବରୁ ସମ୍ପର୍କ ରହିଥିଲା। ସେହି ଫାର୍ମ ହାଉସରେ କିଛିଦିନ ରହିବା ପରେ ଉମା ବିଷୋୟୀ ଓ ହତ୍ୟାକାରୀ କୁରୁପତି ଭୂୟାଁ କେଉଁଆଡେ ଫେରାର ହୋଇ ଯାଇଥିଲେ। ଅନ୍ୟପକ୍ଷରେ ବିକ୍ରମ, ମଳୟ ଓ ମଦନ ନିଜ ଓକିଲଙ୍କ ଜରିଆରେ ବ୍ରହ୍ମପୁର ଏସଡିଜେଏମ ଅଦାଲତରେ ଜାମିନ ଆବେଦନ କରିଛନ୍ତି। 

Powered by Froala Editor