ରାଜସ୍ଥାନର ଝାଲାବାଡ଼ ଜିଲ୍ଲାସ୍ଥିତ ପିପଲୋଡ଼ ଗ୍ରାମରେ ଶୁକ୍ରବାର ସକାଳେ ଏକ ପ୍ରାଥମିକ ସ୍କୁଲ୍‌ ଛାତ ଭୁଶୁଡ଼ି ପଡ଼ିଥିଲା। ଏହା ଫଳରେ ୭ ଜଣ ଛାତ୍ରଙ୍କ ମୃତ୍ୟୁ ହୋଇଥିବା ସହ ୨୯ରୁ ଅଧିକ ଜଣ ଆହତ ହୋଇଥିଲେ। ତେବେ ପିଲାମାନେ କହିଛନ୍ତି ଯେ ଛାତରୁ ପଥର ଖସୁଥିବା କଥା ସେମାନେ ଶିକ୍ଷକଙ୍କୁ କହିଥିଲେ। କିନ୍ତୁ ଶିକ୍ଷକମାନେ ସେମାନଙ୍କ କଥାକୁ ଅଣଦେଖା କରି ଗାଳି ଦେଇଥିଲେ। ସେ ସମୟରେ ଶିକ୍ଷକମାନେ ଜଳଖିଆ କରୁଥିଲେ ଏବଂ ପିଲାମାନଙ୍କ କଥାକୁ ସେମାନେ କର୍ଣ୍ଣପାତ କରିନଥିଲେ। ଓଲଟା ମାଡ ମାରି ପିଲାମାନଙ୍କୁ ଶ୍ରେଣୀଗୃହକୁ ପଠାଇ ଦେଇଥିଲେ। ପିଲାମାନେ ଶ୍ରେଣୀଗୃହ‌ରେ ଥିବାବେଳେ ହଠାତ୍‌ ଛାତ ଭୁଶୁଡ଼ି ପଡ଼ିଥିଲା।

"ଯେତେବେଳେ ଆମେ ସ୍କୁଲରେ ପହଞ୍ଚିଲୁ, ଶିକ୍ଷକ ଆମକୁ ସକାଳ ପ୍ରାର୍ଥନା ପାଇଁ ଶ୍ରେଣୀଗୃହରେ ଅପେକ୍ଷା କରିବାକୁ କହିଥିଲେ। ତା'ପରେ ଛାତରୁ କିଛି ପଥର ଖଣ୍ଡ ପଡ଼ିବାକୁ ଲାଗିଲା। ଜଣେ ଛାତ୍ର ତୁରନ୍ତ ଶିକ୍ଷକଙ୍କୁ ଜଣାଇଲେ। ହେଲେ ଶିକ୍ଷକ କହିଲେ, 'କିଛି ପଡ଼ିନାହିଁ। ଚିନ୍ତା ନକରି ଶ୍ରେଣୀଗୃହରେ ରୁହ।' ଏହାର କିଛି ସମୟ ପରେ ଛାତ ଭୁଶୁଡ଼ି ପଡ଼ିଲା। ମୁଁ ଅଳ୍ପକେ ବର୍ତ୍ତିଗଲି। କିନ୍ତୁ ଅନ୍ୟମାନେ ଫସିଗଲେ" ବୋଲି ଜଣେ ଛାତ୍ରୀ କହିଛନ୍ତି।  

ବିଦ୍ୟାଳୟର କାନ୍ଥ ଓ ଛାତ ଜର୍ଜରିତ ଅବସ୍ଥାରେ ଥିଲା। ମାସେ ତଳେ ସିମେଂଟ ଓ ପ୍ଲାଷ୍ଟର କାମ କରାଯାଇଥିଲା। ଯଦି ଶୁକ୍ରବାର ଛାତ୍ରମାନଙ୍କୁ ବାହାରକୁ ନିଆଯାଇଥାନ୍ତା, ତେବେ ଏହି ଦୁର୍ଘଟଣା ଘଟିନଥାନ୍ତା। ଏଥିପାଇଁ ସ୍କୁଲର ୫ ଜଣ ଶିକ୍ଷକଙ୍କୁ ଅପରାଧିକ ଅବହେଳା ପାଇଁ ନିଲମ୍ବନ କରାଯାଇଛି।

Powered by Froala Editor