ରୋଗୀଙ୍କ ସାଲାଇନରେ ଫୋଡ଼ା ହେଲା ବ୍ୟବହୃତ ରକ୍ତ ଲଗା ସିରିଞ୍ଜ
ଟିଟିଲାଗଡ଼: ଟିଟିଲାଗଡ଼ ଉପଖଣ୍ଡ ସରକାରୀ ଡାକ୍ତରଖାନାରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଜଣେ ରୋଗୀଙ୍କୁ ସାଲାଇନ ଦିଆଯାଇଥିବା ବେଳେ ସାଲାଇନରେ ରକ୍ତ ଲଗା ସିରିଞ୍ଜ ଫୋଡା ଯିବା ଚାଞ୍ଚଲ୍ୟ ସୃଷ୍ଟି କରିଛି । ଅଭିଯୋଗରୁ ଜଣାପଡିଛି ଯେ, ଟିଟିଲାଗଡ଼ ବ୍ଲକ ଅନ୍ତର୍ଗତ ଦିଗସିରା ଗ୍ରାମର ନିରାକାର ବେହେରା(୬୨)ଙ୍କ ରକ୍ତଚାପ କମ ହେବାରୁ ଟିଟିଲାଗଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଉପସ୍ଥିତ ଡାକ୍ତରଙ୍କ ପରାମର୍ଶ କ୍ରମେ ପରିବାର ଲୋକେ ତାଙ୍କୁ ୱାର୍ଡରେ ଭର୍ତ୍ତି କରିଥିଲେ। ଅସୁସ୍ଥ ନିରାକାରଙ୍କୁ ଡାକ୍ତରଖାନା ସ୍ୱାସ୍ଥ୍ୟ କର୍ମଚାରୀ ପ୍ରଥମେ ଏକ ସାଲାଇନ ଦେଇଥିଲେ। ଏନେଇ ସ୍ୱାସ୍ଥ୍ୟ କର୍ମଚାରୀ ସାଲାଇନର ଉପର ଅଂଶରେ ଏକ ସିରିଞ୍ଜ ଫୋଡିଥିଲେ। କିଛି ସମୟ ପରେ ୱାର୍ଡରେ ଉପସ୍ଥିତ ନିରାକାରଙ୍କ ପୁଅ ରୋହିତ ସାଲାଇନରେ ସିରିଞ୍ଜ ଫୋଡ଼ା ଯିବା ସ୍ଥାନରେ ରକ୍ତ ଲାଗିଥିବା ଦେଖି ବିସ୍ମିତ ହୋଇଥିଲେ । ରୋହିତ ଏନେଇ ଉକ୍ତ କର୍ମଚାରୀଙ୍କୁ ପଚାରିବାରୁ ଭୁଲରେ ଏକ ବ୍ୟବହୃତ ରକ୍ତ ଲଗା ସିରିଞ୍ଜ ଫୋଡିଥିବା ସ୍ୱୀକାର ସହ କ୍ଷମା ପ୍ରାର୍ଥନା କରିଥିବା ଜଣାଯାଇଛି।
Powered by Froala Editor
