ଭୁବନେଶ୍ଵର: କିଛି ଦିନର ନୀରବତା ପରେ ଯାତ୍ରାରେ ପୁଣି ବିବାଦ ସୃଷ୍ଟି ହୋଇଛି। ପୁଣି ତୁଳସୀ ଗଣନାଟ୍ୟର ମାଲିକ ଅନନ୍ତ ନାରାୟଣ ଧଳ ବା ନାଣ୍ଡୁ ବାବୁଙ୍କ ନାମରେ ଆସିଛି ସାଂଘାତିକ ଅଭିଯୋଗ। ଜଣେ ଯାତ୍ରା ଅଭିନେତ୍ରୀ ମାମୁନି ଷଡଙ୍ଗୀ ଅନନ୍ତ ନାରାୟଣଙ୍କ ବିରୋଧରେ ଆକ୍ରମଣ ଓ ହଇରାଣର ଅଭିଯୋଗ ଆଣିଛନ୍ତି। ଏହି ଘଟଣା ଅଭିନେତ୍ରୀଙ୍କ ବକେୟା ପାଉଣା ଦାବି କରିବା ପରେ ଘଟିଥିବା ଜଣାପଡ଼ିଛି।

‘ଅଶୋକ ସମ୍ରାଟ’ ଯାତ୍ରା ଦଳରେ କାମ କରୁଥିବା ଅଭିନେତ୍ରୀ ମାମୁନି ଷଡ଼ଙ୍ଗୀ ଭୁବନେଶ୍ୱରର ମହିଳା ଥାନାରେ ଏକ ଏଫ୍‌ଆଇଆର୍‌ ଦାଖଲ କରିଛନ୍ତି। ସେ ଅଭିଯୋଗ କରିଛନ୍ତି ଯେ, ଯାତ୍ରା ଦଳର ମାଲିକ ଅନନ୍ତ ନାରାୟଣ, ଯିଏ ‘ନାଣ୍ଡୁ ବାବୁ’ ନାମରେ ପରିଚିତ, ଏବଂ ତାଙ୍କର ତିନି ଜଣ ସହଯୋଗୀ ତାଙ୍କୁ ଆକ୍ରମଣ କରିଛନ୍ତି। ମାମୁନି ଓ ତାଙ୍କ ସ୍ୱାମୀ ବାପି ପଣ୍ଡା ଦାବି କରିଛନ୍ତି ଯେ, ବାଲିଆପାଳ ଯାତ୍ରା ଶିବିରରେ ସେମାନଙ୍କ ଉପରେ ଏକ ଯୋଜନାବଦ୍ଧ ଆକ୍ରମଣ ହୋଇଥିଲା। ଏହାସହ, ସେମାନଙ୍କୁ ଗାଡ଼ିରେ ନିଆଁ ଲଗାଇ ଦେବାର ଧମକ ମିଳିଥିଲା।

ମାମୁନି କହିଛନ୍ତି, “ମୋର ୭ ଲକ୍ଷ ଟଙ୍କା ବକେୟା ରହିଛି। ଯେତେବେଳେ ମୁଁ ଅନନ୍ତଙ୍କୁ ପାଉଣା ମାଗିଲି, ସେ ଦେବାକୁ ମନା କରିଦେଲେ। ପରେ ତାଙ୍କ ଭାଇ ଫୋନଫେ ଜରିଆରେ ୨୦ ହଜାର ଟଙ୍କା ପଠାଇ ବାକି ଟଙ୍କା ପରେ ଦେବେ ବୋଲି କହିଥିଲେ। କିନ୍ତୁ କମିଟିର କିଛି ସଦସ୍ୟ ମୋ ସ୍ୱାମୀଙ୍କ ସହ ଦୁର୍ବ୍ୟବହାର କରି ଆକ୍ରମଣ କଲେ। ଯାତ୍ରା ଦଳର ମ୍ୟାନେଜରମାନେ ଏହାର କୌଣସି ପ୍ରତିକ୍ରିୟା ପ୍ରକାଶ କଲେ ନାହିଁ। ଯେତେବେଳେ ମୁଁ ନାଣ୍ଡୁ ବାବୁଙ୍କୁ ଫୋନ କରି ଘଟଣା ବିଷୟରେ ଜଣାଇଲି, ସେ ମୋତେ ଅଶ୍ଳୀଳ ଭାଷାରେ ଗାଳି ଦେଲେ ଓ କହିଲେ ଯେ କମିଟି ସଦସ୍ୟମାନେ ତାଙ୍କ ଇଙ୍ଗିତରେ ମୋତେ ଆକ୍ରମଣ କରିଛନ୍ତି। ସେ ଆହୁରି ଆକ୍ରମଣ କରିବା ଓ ମୋ ଗାଡ଼ିରେ ନିଆଁ ଲଗାଇ ଦେବାର ଧମକ ଦେଇଛନ୍ତି।”

ଅନ୍ୟପକ୍ଷରେ, ଅନନ୍ତ ନାରାୟଣ ଏହି ଅଭିଯୋଗକୁ ଅସ୍ୱୀକାର କରିଛନ୍ତି। ସେ ଦାବି କରିଛନ୍ତି ଯେ, ଏହା କେବଳ କମିଟି ସହ ମାମୁନିଙ୍କର ଏକ ମୌଖିକ ବିବାଦ ଥିଲା ଏବଂ କୌଣସି ଶାରୀରିକ ଆକ୍ରମଣ ହୋଇ ନାହିଁ। ସେ କହିଛନ୍ତି, “ମାମୁନିଙ୍କ ସହ କମିଟିର କିଛି ବଚସା ହୋଇଥିଲା। ତାଙ୍କର ସମସ୍ତ ପାଉଣା ପରିଶୋଧ କରାଯାଇଛି ଏବଂ ତାଙ୍କ ଅଭିଯୋଗ ମିଥ୍ୟା ଓ ଭିତ୍ତିହୀନ।”

ଏହା ପୂର୍ବରୁ ମଧ୍ୟ ଅନନ୍ତ ନାରାୟଣଙ୍କ ବିରୋଧରେ ଏକାଧିକ ଅଭିଯୋଗ ଉଠିଛି। କମେଡ଼ିଆନ ନରୀ ପଣ୍ଡା ମଧ୍ୟ ତାଙ୍କ ବିରୁଦ୍ଧରେ ସମାନ ଧରଣର ଅଭିଯୋଗ ଆଣିଥିଲେ। ସେହିଭଳି ନାଣ୍ଡୁ ବାବୁ ଜଣେ ମହିଳାଙ୍କୁ ଅପହରଣ କରି ତାଙ୍କ ସ୍ୱାମୀ ଓ ପୁତ୍ରଙ୍କୁ ଛାଡ଼ିବାକୁ ବାଧ୍ୟ କରିବାର ଅଭିଯୋଗ ମଧ୍ୟ ଉଠିଥିଲା।

Powered by Froala Editor