ଭୁବନେଶ୍ବର: ଏଣିକି ନେତା କିମ୍ବା ଅଧିକାରୀ ମନଇଚ୍ଛା ଗାଡ଼ିରେ ନାଲି/ନୀଳ ବତି ବ୍ୟବହାର କରିପାରିବେ ନାହିଁ। ଏହାକୁ କିଏ ବ୍ୟବହାର କରି‌ବେ ତାହା ପରିବହନ ବିଭାଗ ନିର୍ଦ୍ଧାରଣ କରିବ। ଏଥିପାଇଁ ସ୍ବତନ୍ତ୍ର ଅନୁମତି ନେବାକୁ ହେବ। ଏନେଇ ପରିବହନ ବିଭାଗ ପ୍ରମୁଖ ସଚିବ ଉଷା ପାଢ଼ୀ ରାଜସ୍ବ, ଗୃହ, ନଗର ଉନ୍ନୟନ ବିଭାଗର ସଚିବଙ୍କ ସମେତ ପୁଲିସ ମହାନିର୍ଦେଶକ ଏବଂ ଗୃହରକ୍ଷୀ ଓ ଅଗ୍ନିଶମ ମହାନିର୍ଦେଶକଙ୍କୁ ପତ୍ର ଲେଖିଛନ୍ତି। ଏଥିରେ କୁହାଯାଇଛି ଯେ ଗାଡ଼ିରେ ନାଲି, ନୀଳ କିମ୍ବା ବିବିଧ ରଙ୍ଗର ବତି ବ୍ୟବହାର ସମ୍ପର୍କରେ ସରକାର ପୂର୍ବରୁ ସ୍ପଷ୍ଟ କରି ସାରିଛନ୍ତି। କିନ୍ତୁ ଏହି ନିୟମର ଉଲ୍ଲଙ୍ଘନ କରାଯାଉଥିବା ଜଣାପଡ଼ିଛି। ପୁଣି ଥରେ ଏହା ସ୍ପଷ୍ଟ କରାଯାଉଛି ଯେ, ଗାଡ଼ିରେ ରଙ୍ଗ ବେରଙ୍ଗର ବତି ବ୍ୟବହାର ପାଇଁ ପରିବହନ କମିସନରଙ୍କଠାରୁ ଅନୁମତି ନେବା ଜରୁରୀ। ଯେଉଁମାନେ ଏହି ବତି ବ୍ୟବହାର ପାଇଁ କ୍ଷମତାପ୍ରାପ୍ତ ସେମାନଙ୍କୁ ଏକ ଷ୍ଟିକର୍ ଜାରି କରାଯିବ। ଏ ସମ୍ପର୍କରେ ବିଭାଗଗୁଡ଼ିକ ନିଜ ଅଧିକାରୀଙ୍କୁ ସ୍ପଷ୍ଟ ନିର୍ଦେଶନାମା ଜାରି କରାଇବା ଜରୁରୀ ବୋଲି ଶ୍ରୀମତୀ ପାଢ଼ୀ ପତ୍ରରେ ଉଲ୍ଲେଖ କରିଛନ୍ତି।

ସୂଚନାଯୋଗ୍ୟ ଯେ, ଅଦାଲତଙ୍କ ନିର୍ଦେଶ ଅନୁସାରେ ଭାରତ ସରକାର ଗାଡ଼ିରେ ନାଲି କିମ୍ବା ବିଭିନ୍ନ ରଙ୍ଗର ବତି ବ୍ୟବହାର ଉପରେ କଟକଣା ଜାରି କରିଥିଲେ। ଫଳରେ କେନ୍ଦ୍ର ଓ ରାଜ୍ୟ ସରକାରରେ ସର୍ବୋଚ୍ଚ ପଦରେ ଥିବା ବ୍ୟକ୍ତିବିଶେଷ, ମନ୍ତ୍ରୀ, ଅଧିକାରୀ ତଥା ସାମ୍ବିଧାନିକ ପଦରେ ଥିବା ବ୍ୟକ୍ତିବିଶେଷ ଆଉ ନାଲି ବତି ବ୍ୟବହାର କରୁନାହାନ୍ତି। କିନ୍ତୁ କିଛି କ୍ଷେତ୍ରରେ ପ୍ରଶାସନିକ ଅଧିକାରୀ ଏବଂ ସାଧାରଣ ଲୋକ ଗାଡ଼ିରେ ଏପରି ରଙ୍ଗିନ ବତି ବ୍ୟବହାର କରୁଥିବା ଜଣାପଡ଼ିବା ପରେ ବିଭାଗ ପକ୍ଷରୁ ଏପରି ନିର୍ଦେଶ ଜାରି କରାଯାଇଛି।

Powered by Froala Editor