ତିନି କୁନି ପୁଅଙ୍କୁ ଚିକିତ୍ସା ପାଇଁ ଆଣି ମେଡ଼ିକାଲରେ ଛାଡ଼ି କେଉଁଆଡ଼େ ଚାଲିଯାଇଛନ୍ତି ବାପା । ଏଭଳି ଏକ ଘଟଣା ଦେଖିବାକୁ ମିଳିଛି ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ।

ପାର୍ଶାଲି ପଞ୍ଚାୟତ ପାରାମାଲି ଗ୍ରାମର ଡଙ୍ଗରିଆ ଲାଚା କାଡ୍ରାକାଙ୍କ ବଡ ପୁଅ ଦିବ୍ୟାଙ୍ଗ ବିଜୁ(୬)ର ସ୍ୱାସ୍ଥ୍ୟାବସ୍ଥା ଖରାପ ଥିଲା। ବାପା ଲାଚା କାଡ୍ରାକା ବିଜୁ ସହିତ ଅନ୍ୟ ୨ ପୁଅଙ୍କୁ ସାଙ୍ଗରେ ଧରି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆସିଥିଲେ। ଏଠାରେ ଡାକ୍ତର ପ୍ରମୋଦ କୁମାର ମିଶ୍ର ବିଜୁକୁ ଆଡମିଶନ କରାଇ ଚିକିତ୍ସା କରିଥିଲେ। ଅପରାହ୍ନରେ ବାପା ଲାଚା କେଉଁଆଡ଼େ ଚାଲିଯାଇଥିଲେ। ଅନେକ ସମୟ ଧରି ସେ ନ ଆସିବାରୁ ସ୍ୱାସ୍ଥ୍ୟ ବିଭାଗ ପକ୍ଷରୁ ଥାନାକୁ ସୂଚନା ଦିଆଯାଇଥିଲା। ଥାନା କର୍ମଚାରୀ ଏବଂ ସ୍ୱାସ୍ଥ୍ୟ ବିଭାଗ କର୍ମଚାରୀମାନେ ବହୁ ଖୋଜାଖୋଜି କରିବା ପରେ ମଧ୍ୟ ଲାଚାର କୌଣସି ସନ୍ଧାନ ମିଳି ନ ଥିଲା। ଲାଚାଙ୍କୁ କଲ୍ୟାଣସିଂହପୁରରେ ବହୁ ଖୋଜାଖୋଜି ପରେ ମଧ୍ୟ ନ ପାଇବାରୁ ତିନି ପିଲାଙ୍କୁ ନେଇ ପାରାମାଲି ଯାଇ ସେଠାରେ ତାଙ୍କ ପରିବାରବର୍ଗଙ୍କୁ ହସ୍ତାନ୍ତର କରିଥିବା ଆଇଆଇସି ବେହେରା ସୂଚନା ଦେଇଛନ୍ତି ।

ଅନ୍ୟପଟେ ତିନି ଶିଶୁ କାନ୍ଦୁଥିବାବେଳେ ପିଲାଙ୍କ ଦୁଃଖ ସହି ନ ପାରି  ନିକଟରେ ଥିବା ଅଙ୍ଗନଓ୍ବାଡି କର୍ମୀ ଓ ଗ୍ରାମବାସୀ ପିଲାଙ୍କୁ କ୍ଷୀର, ବିସ୍କୁଟ, ପାଉଁରୁଟି ଦେଇଥିଲେ। 

Powered by Froala Editor