ଜମ୍ମୁ-କାଶ୍ମୀରର ରାମବନରେ ଭୂସ୍ଫଳନ ଯୋଗୁଁ ଅନେକ ଲୋକଙ୍କ ଜୀବନ ଯାଇଥିବା ବେଳେ ଅନେକ କ୍ଷୟକ୍ଷତି ମଧ୍ୟ ହୋଇଛି । ଏନଏଚ-୪୪ରେ ପାହାଡ ଧସି ପଡିଛି । ଫଳରେ ରାସ୍ତା ବନ୍ଦ ହୋଇପଡିଛି । ହାଇୱେର ୨ ପାର୍ଶ୍ବରେ ହଜାର ହଜାର ଗାଡି ଅଟକିଥିବା ବେଳେ ସାମ୍ନାକୁ ଆସିଛି ଏକ ଅଭାବନୀୟ ଦୃଶ୍ୟ । ଯେଉଁଠି ବାହାହେବାକୁ ଯାଉଥିବା ମଶକୁର ନାମକ ଜଣେ ଯୁବକ କନ୍ୟା ଘରକୁ ଚାଲି ଚାଲି ଯାଉଛି ।

ତେବେ ରାମବନ ନିବାସୀ ମଶକୁର ଅହମ୍ମଦ ନିଲ ଗଗନାନ ଗାଁକୁ ବିବାହ ପାଇଁ ଯାଉଥିବା ବେଳେ ରାସ୍ତା ଖରାପ ପାଇଁ ଚାଲି ଚାଲି ଯିବାକୁ ବାଧ୍ୟ ହୋଇଛନ୍ତି । ମଶକୁର ଏବଂ ତାଙ୍କ ସମ୍ପର୍କୀୟମାନଙ୍କର ଏକ ଭିଡିଓ ମଧ୍ୟ ସାମ୍ନାକୁ ଆସିଛି। ଏହି ଭିଡିଓରେ, ସେ ଭୂସ୍ଖଳନ ଯୋଗୁଁ ବନ୍ଦ ହାଇୱେ ମଧ୍ୟରେ ପାହାଡ଼ ଦେଇ କନ୍ୟା ଘରକୁ ଯାଉଛନ୍ତି । ଏହାର ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।

ମଶକୁର କଣ କହିଥିଲେ- ଆଜି ମୋର ବିବାହ ଦିନ । ଗତକାଲି ପ୍ରବଳ ବର୍ଷା ଯୋଗୁଁ ଏହି ପରିସ୍ଥିତି ହୋଇଛି । ଆମକୁ ଚାଲିବାକୁ ପଡିବ । ଆମେ ସକାଳ 6 ଟାରେ ଯାତ୍ରା ଆରମ୍ଭ କରିଥିଲୁ । ଆମେ ଆମର ଗାଡ଼ି ପଛରେ ରଖିଥିଲୁ ଏବଂ ଏବେ ଆମେ ବାକି ରାସ୍ତା ଚାଲିବୁ ।

ଆମକୁ ଏବେ ବି ପ୍ରାୟ 7-8 କିଲୋମିଟର ଚାଲିବାକୁ ପଡିବ । ରାସ୍ତା ସଫା ହୋଇନଥିବାରୁ ଆମେ ଏହି ରାସ୍ତା ଦେଇ କନ୍ୟାକୁ ଆଣିବୁ । ଆମେ ସରକାରଙ୍କୁ NH-44 ଯଥାଶୀଘ୍ର ସଫା କରିବାକୁ ଅନୁରୋଧ କରୁଛୁ ବୋଲି ମଶକୁର କହିଛନ୍ତି। କାରଣ ରାସ୍ତାର ୨ ପାର୍ଶ୍ବରେ ଶହଶହ ଗାଡି ଅଟକିଛି ଯେଉଁଥିଲେ ବୃଦ୍ଧବୃଦ୍ଧା, କୁନିକୁନି ପିଲା ଏବଂ ଗର୍ଭବତୀ ମହିଳାମାନେ ଫସି ରହିଛନ୍ତି । ତେଣୁ ସରକାର ଏବଂ ପ୍ରଶାସନକୁ ଶୀଘ୍ର ରାସ୍ତାସଫା କରିବାକୁ ବର ଜଣଙ୍କ ଅନୁରୋଧ କରିଛନ୍ତି ।

Powered by Froala Editor