ପୂର୍ବତନ ସାଂସଦ ତଥା ପଶ୍ଚିମବଙ୍ଗ ବିଜେପିର ପୂର୍ବତନ ରାଜ୍ୟ ସଭାପତି ଦିଲୀପ ଘୋଷ ୬୦ବର୍ଷ ବୟସରେ ବିବାହ କରିଛନ୍ତି। ସେ ତାଙ୍କର ଭାଜପା ସହଯୋଗୀ ରିଙ୍କୁ ମଜୁମଦାରଙ୍କୁ ବିବାହ କରିଛନ୍ତି। ସୂତ୍ର ଅନୁସାରେ, କୁନାଲ ଘୋଷ ଏବଂ ଦେବାଂଶୁ ଭଟ୍ଟାଚାର୍ଯ୍ୟଙ୍କ ସମେତ ଅନେକ ତୃଣମୂଳ କଂଗ୍ରେସ ନେତା ଭାଜପା ନେତାଙ୍କୁ ଏହି ଅବସରରେ ଅଭିନନ୍ଦନ ଜଣାଇଥିଲେ।

ଦିଲୀପଙ୍କର ଏହା ପ୍ରଥମ ବିବାହ ହୋଇଥିବାବେଳେ ରିଙ୍କୁଙ୍କର ଏହା ଦ୍ବିତୀୟ ବିବାହ। ରିଙ୍କୁର ପ୍ରଥମ ବିବାହରୁ ଏକ ପୁତ୍ର ସନ୍ତାନ ଅଛି। ୨୦୨୧ରେ ଉଭୟଙ୍କର ପ୍ରଥମ ସାକ୍ଷାତ ହୋଇଥିଲା। ପରେ ସେମାନେ ବିବାହ କରିବାକୁ ନିଷ୍ପତ୍ତି ନେଇଥିଲେ।

ଦିଲୀପ କହିଛନ୍ତି ଯେ ଚଳିତ ମାସରେ କଲକାତାରେ ଅନୁଷ୍ଠିତ ଆଇପିଏଲ୍‌ର ଏକ ମ୍ୟାଚ ‌ବେଳେ ସେ ରିଙ୍କୁଙ୍କୁ ବିବାହ ଲାଗି ପ୍ରସ୍ତାବ ଦେଇଥିଲେ। ଦିଲୀପଙ୍କ ପ୍ରସ୍ତାବକୁ ରିଙ୍କୁ ଗ୍ରହଣ କରିଥିଲେ। ପୂର୍ବରୁ ଦିଲୀପ ଘୋଷ ଏକ ନ୍ୟୁଜ ଚ୍ୟାନେଲକୁ କହିଥିଲେ ଯେ ମୋ ମାଆ ଚାହୁଁଥିଲେ ମୁଁ ବିବାହ କରେ, ତେଣୁ ତାଙ୍କ ଇଚ୍ଛାକୁ ସମ୍ମାନ ଦେଇ ମୁଁ ବିବାହ କରୁଛି। ମୁଁ ପୂର୍ବପରି ସକ୍ରିୟ ରାଜନୀତିରେ ରହିବି। ମୋର ବ୍ୟକ୍ତିଗତ ଜୀବନ ମୋର ରାଜନୈତିକ କାର୍ଯ୍ୟ ଉପରେ କୌଣସି ପ୍ରଭାବ ପକାଇବ ନାହିଁ।

ମୁଖ୍ୟମନ୍ତ୍ରୀ ମମତା ବାନାର୍ଜୀ, ବିଜେପି ନେତ୍ରୀ ଲକେଟ୍‌ ଚାଟ୍ଟାର୍ଜୀ, ବିଜେପି ରାଜ୍ୟ ସଭାପତି ସୁକାନ୍ତ ମଜୁମ୍‌ଦାର, ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ ପ୍ରମୁଖ ନବଦମ୍ପତିଙ୍କୁ ଶୁଭେଚ୍ଛା ଜଣାଇଛନ୍ତି।

Powered by Froala Editor