ନୂଆଦିଲ୍ଲୀ: କେନ୍ଦ୍ର ସରକାରଙ୍କ ପକ୍ଷରୁ ୩୫ଟି ଫିକ୍ସଡ-ଡୋଜ୍ ଔଷଧର ଉତ୍ପାଦନ, ବିକ୍ରୟ ଓ ବିତରଣ ଉପରେ ନିଷେଧାଦେଶ ଜାରି କରାଯାଇଛି। ଏସବୁ ଔଷଧଗୁଡ଼ିକର ଅନୁମୋଦନ ପୁର୍ବରୁ ସମୀକ୍ଷା କରାଯିବା ସହିତ ଏହାର ଉତ୍ପାଦନ, ବିକ୍ରୟ ଓ ବିତରଣ ବନ୍ଦ କରିବାକୁ ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ଭେଷଜ ନିୟନ୍ତ୍ରକଙ୍କୁ କେନ୍ଦ୍ର ସରକରଙ୍କ ପକ୍ଷରୁ ନିର୍ଦେଶ ଦିଆଯାଇଛି।

କେନ୍ଦ୍ରୀୟ ଔଷଧୀୟ ମାନକ ନିୟନ୍ତ୍ରଣ ସଂଗଠନ(ସିଡିଏସସିଓ) ପକ୍ଷରୁ ପେନକିଲର, ପୁଷ୍ଟିକର ସପ୍ଲିମେଣ୍ଟ ଏବଂ ଆଣ୍ଟି-ଡାଇବେଟିସ୍ ସମେତ  ଅଣଅନୁମୋଦିତ ୩୫ଟି ଫିକ୍ସଡ୍ ଡୋଜ ମିଶ୍ରଣ ଔଷଧର  ଉତ୍ପାଦନ, ବିକ୍ରୟ ଏବଂ ବିତରଣକୁ ବନ୍ଦ କରାଯିବା ନେଇ ନିର୍ଦେଶ ଜାରି କରାଯାଇଛି। ଏସବୁ ଫିକ୍ସଡ୍ ଡୋଜ ମିଶ୍ରଣ ଔଷଧ(ଏଫଡିସି)ର ମାନକ ଠିକ ଅଛି କି ନାହିଁ ଅନୁମୋଦନ ଦେବା ପୂର୍ବରୁ ସମୀକ୍ଷା କରାଯିବା ଆବଶ୍ୟକ। ଏହାସହିତ  ଡ୍ରଗ୍ସ ଆଣ୍ଡ କସମେଟିକ୍ସ ଆକ୍ଟ ୧୯୪୦  ନିୟମର କଡ଼ାକଡ଼ି ଅନୁପାଳନ ନିଶ୍ଚିତ କରିବାକୁ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ଭେଷଜ ନିୟନ୍ତ୍ରକଙ୍କୁ ନିର୍ଦେଶ ଦିଆଯାଇଛି।

ଏଫଡିସି ଔଷଧଗୁଡ଼ିକ ହେଉଛି ଯେଉଁଗୁଡ଼ିକରେ ଏକ ସ୍ଥିର ଅନୁପାତରେ ଦୁଇ କିମ୍ବା ତତୋଧିକ ସକ୍ରିୟ ଔଷଧ ଉପାଦାନ (ଏପିଆଇ)ର ମିଶ୍ରଣ ଥାଏ। ନିୟାମକ ଏହି ନିର୍ଦ୍ଦେଶନାମା ଜାରି କରିଛନ୍ତି ଯେ ସୁରକ୍ଷା ଏବଂ ପ୍ରଭାବର ପୂର୍ବ ମୂଲ୍ୟାଙ୍କନ ବିନା କିଛି ଏଫଡିସି ଔଷଧକୁ ଉତ୍ପାଦନ, ବିକ୍ରୟ ଏବଂ ବଣ୍ଟନ ପାଇଁ ଲାଇସେନ୍ସ ଦିଆଯାଇଛି, ଯାହା ଜନସ୍ୱାସ୍ଥ୍ୟ ଏବଂ ସୁରକ୍ଷା ପାଇଁ ଏକ ଗମ୍ଭୀର ବିପଦ ସୃଷ୍ଟି କରୁଛି।

ଏପ୍ରିଲ ୧୧ ତାରିଖରେ ପଠାଯାଇଥିବା ଏକ ଚିଠିର ସୂଚନାକୁ ଆଧାର କରି ଭାରତର ଡ୍ରଗ୍ସ କଣ୍ଟ୍ରୋଲର ଜେନେରାଲ (ଡିସିଜିଆଇ) ଡକ୍ଟର ରାଜୀବ ରଘୁବଂଶୀ ଜାନୁଆରୀ ୨୦୧୩ରେ ତାଙ୍କ କାର୍ଯ୍ୟାଳୟ ଦ୍ୱାରା ଜାରି କରାଯାଇଥିବା ଚିଠିକୁ ଉଲ୍ଲେଖ କରିଛନ୍ତି; ଯେଉଁଠାରେ ଡିସିଜିଆଇ ଠାରୁ ଉପଯୁକ୍ତ ଅନୁମୋଦନ ବିନା ଦେଶରେ “ନୂତନ ଔଷଧ” ପରିଭାଷା ଅଧୀନରେ ଆସୁଥିବା ଏଫଡିସି ଔଷଧର ବିକ୍ରୟ ପାଇଁ ଉତ୍ପାଦନ ଲାଇସେନ୍ସ ପ୍ରଦାନ ସମ୍ପର୍କରେ ଆପତ୍ତି ପ୍ରକାଶ କରାଯାଇଥିଲା।

ଅନୁମୋଦିତ ଏଫଡିସିଗୁଡ଼ିକର ଉତ୍ପାଦନ ଏବଂ ବିପଣନ ପାଇଁ ଅନୁମତି ପ୍ରଦାନ କରିଥିବା ସମ୍ପୃକ୍ତ ରାଜ୍ୟ ଲାଇସେନ୍ସିଂ କର୍ତ୍ତୃପକ୍ଷଙ୍କୁ ଏକାଧିକ ଚିଠି ଜାରି କରାଯାଇଛି। ଏହି ବର୍ଷ ଫେବୃଆରୀରେ ଏପରି ସାମ୍ପ୍ରତିକ ଚିଠି ଜାରି କରାଯାଇଥିଲା ବୋଲି ଡିସିଜିଆଇ ପକ୍ଷରୁ ସୂଚନା ଦିଆଯାଇଛି।

Powered by Froala Editor