ବାଙ୍କୀ : ଡମପଡ଼ା ଚନ୍ଦକା ଅଭୟାରଣ୍ୟ ଅନ୍ତର୍ଗତ ତାଳବସ୍ତ ଫରେଷ୍ଟ ସେକ୍‌‌ସନ୍‌‌ ଅଧୀନ ଅଭୟାରଣ୍ୟ ନିକଟସ୍ଥ ତାଳବସ୍ତ ପଞ୍ଚାୟତ ମୁଣ୍ଡା ସାହି ନିକଟ କାଜୁ ବଣରେ ଆହତ ଅବସ୍ଥାରେ ଏକ ଦନ୍ତାହାତୀ ସକାଳେ ଚଲା ବୁଲା କରୁଥିବା ଦେଖି ବନ ବିଭାଗ କର୍ମଚାରୀ ଦେଖି ତା’ର ଚିକିତ୍ସା ପାଇଁ ପଦକ୍ଷେପ ନେଇଥିଲେ। ରେଞ୍ଜର ନିରଞ୍ଜନ ମହାପାତ୍ରଙ୍କ ସୂଚନାକ୍ରମେ ନନ୍ଦନକାନନସ୍ଥିତ ପ୍ରାଣୀ ଚିକିତ୍ସାଳୟକୁ ଖବର ଦିଆଯିବା ପରେ ବନ ସେଠାକାର ଚିକିତ୍ସକ ଦଳ ପହଞ୍ଚି ହାତୀର ଚିକିତ୍ସା ଆରମ୍ଭ କରିଥିଲେ। ତେବେ ହାତୀଟିର ଚିକିତ୍ସାଧୀନ ଅବସ୍ଥାରେ ଅପରାହ୍ନ ୪ଟାରେ ମୃତ୍ୟୁ ହୋଇଥିବା ଖବର ମିଳିଛି। ଖବର ପାଇ ଡିଏଫଓ ଶରତ କୁମାର ବେହେରା, ଏସିଏଫ୍‌‌ ସଂଗ୍ରାମ ମହାନ୍ତି, ଆରସିସିଏଫ୍‌‌ ଏମ୍‌‌.ଯୋଗଦାନନ୍ଦ ପ୍ରମୁଖ ପହଞ୍ଚି ହାତୀର ମୃତ୍ୟୁ ସମ୍ପର୍କରେ ଅନୁଧ୍ୟାନ କରିଥିଲେ। ଗୁରୁବାର ସକାଳେ ଶବ ବ୍ୟବଚ୍ଛେଦ କରାଯିବ ବୋଲି ସୂଚନା ମିଳିଛି। ରିପୋର୍ଟ ଆସିଲେ ହାତୀର ମୃତ୍ୟୁର କାରଣ ଜଣାପଡ଼ିବ। ଏ ସମ୍ପର୍କରେ ଡମପଡ଼ା ରେଞ୍ଜର ନିରଞ୍ଜନ ମହାପାତ୍ର କହିଛନ୍ତି ୧୯ ତାରିଖରେ ତାଳବସ୍ତ ସେକ୍‌‌ସନ୍‌‌ ଅନ୍ତର୍ଗତ ବୋଲଗାଡ଼ ଜଳାଶୟ ନିକଟରେ ୨ ଦନ୍ତାହାତୀ ମଧ୍ୟରେ ଲଢେଇ ହୋଇ ଏହି ହାତୀଟି ଆହତ ହୋଇଥିଲା। ବନବିଭାଗ ପକ୍ଷରୁ ହାତୀକୁ ଚିକିତ୍ସାସେବା ଯୋଗାଇ ଦିଆଯାଇଥିଲା। ହାତୀଟି ସ୍ୱାଭାବିକ ଭାବରେ ବଣରେ ବୁଲୁଥିଲା ବେଳେ ବୁଧବାର ତା’ର ମୃତ୍ୟୁ ହୋଇଛି।

Powered by Froala Editor