ଦଣ୍ଡଯାତ୍ରା ଆମ ଓଡ଼ିଆ ସଂସ୍କୃତିର ଏକ ଅଂଶ । ଆମ ପରମ୍ପରା । ଓଡ଼ିଶାରେ ଦଣ୍ଡଯାତ୍ରା ଅନୁଷ୍ଠିତ ହେଉଥିବାବେଳେ ଗଞ୍ଜାମ ଜିଲ୍ଲାରେ ଏହା ପ୍ରସିଦ୍ଧ । ଯାହାକି ଦଣ୍ଡଯାତ୍ରା ଚଳିତ ମାସ ଶେଷ ସପ୍ତାହରୁ ଆରମ୍ଭ ହେବ । ତେବେ ଦଣ୍ଡଯାତ୍ରା ପୂର୍ବରୁ ପୁଣି ଅଶ୍ଲୀଳତାକୁ ନେଇ ସ୍ୱର ଉଠାଇଛି ଗଞ୍ଜାମ ଜିଲ୍ଲା ଦଣ୍ଡନାଚ ମହାସଂଘ ।

ଦଣ୍ଡନାଚରେ ଚଳିତବର୍ଷ ଅଶ୍ଲୀଳତାକୁ ବିରୋଧ କରାଯିବ ବୋଲି ହିଞ୍ଜିଳିକାଟୁ ନିକଟ ଶ୍ୟାମଳାଇ ପୀଠରେ ମହାସଂଘର ବୈଠକରେ ନିଷ୍ପତ୍ତି ହୋଇଛି । ଦଣ୍ଡନାଚରେ ସାମାଜିକ ନାଟକ ପରିବେଷଣ ହେବ ନାହିଁ ଏବଂ ମହିଳା କଳାକାରଙ୍କୁ ନିଆଯିବ ନାହିଁ ବୋଲି କହିଛନ୍ତି ମହାସଂଘ ସଭାପତି ଶିବରାମ ପ୍ରଧାନ ।

ଗଞ୍ଜାମ ଜିଲ୍ଲାର ପ୍ରସିଦ୍ଧ ଦଣ୍ଡଯାତ୍ରା ସଂସ୍କୃତି, ପରମ୍ପରା ଓ ପୌରାଣିକ କଥାକୁ ନେଇ ହୋଇଥାଏ । ଧିରେ ଧିରେ ଏଥିରେ ଅପସଂସ୍କୃତି ପଶି ଦଣ୍ଡଯାତ୍ରା ପରମ୍ପରାକୁ ନଷ୍ଟ କରିବାକୁ ଯାଉଛି । ଆମ ପରମ୍ପରାକୁ ବଞ୍ଚାଇ ରଖିବା ପାଇଁ ଆମକୁ ଉଦ୍ୟମ କରିବାକୁ ହେବ ବୋଲି ଶିବରାମ କହିଛନ୍ତି । ଦଣ୍ଡନାଚରେ ସାମାଜିକ ନାଟକ ହେବା ଦ୍ୱାରା ମାନସିକଧାରୀ ଖର୍ଚ୍ଚାନ୍ତ ହେଉଛନ୍ତି । ଫଳରେ କିଛି ମାନସିକଧାରୀ ଦଣ୍ଡନାଚ କରିପାରୁନାହାନ୍ତି । ସଂସ୍କୃତି ଭିତରେ ଏବେ ସାମାଜିକ ନାଟକ ଏବଂ ରେକର୍ଡ ଡ୍ୟାନ୍ସ କରି ଏହାର ଅପଭ୍ରଂଶ କରାଯାଉଛି ବୋଲି ଅଭିଯୋଗ କରିଛନ୍ତି ବୁଦ୍ଧିଜୀବୀ ।

Powered by Froala Editor