ଅନୁଗୁଳ ଜିଲ୍ଲାରେ ଜଙ୍ଗଲ ନିଆଁ ଅଣାୟତ୍ତ ହୋଇପଡିଛି । କଣିହାଁ ଓ ଛେଣ୍ଡିପଦା ବନାଞ୍ଚଳରେ ଅସମ୍ଭାଳ ସ୍ଥିତି । ଶୁକ୍ରବାର ଅନୁଗୁଳ ବନଖଣ୍ଡର ୩୪ଟି ଜଙ୍ଗଲରେ ଲାଗିଥିବା ବେଳେ ବନବିଭାଗ ନାକେଦମ ହୋଇଗଲାଣି । ଛେଣ୍ଡିପଦାର ପାତ୍ରପଡ଼ା ବିଟ୍‌ରୁ ନେଇ କଣିହାଁର ଖିଣ୍ଡୋ ବିଟ୍ ଯାଏଁ, ସବୁଠି ଜଙ୍ଗଲ ଜଳୁଥିବା ଫରେଷ୍ଟ ସର୍ଭେ ଅଫ୍ ଇଣ୍ଡିଆର ତଥ୍ୟ କହୁଛି ।

ତଥ୍ୟ ମୁତାବକ, ଅନୁଗୁଳ ସର୍କଲରେ ଅନୁଗୁଳ ଜିଲ୍ଲାର ଅନୁଗୁଳ, ଆଠମଲ୍ଲିକ ଓ ସାତକୋଶିଆ ବନଖଣ୍ଡକୁ ମିଶାଇ ମୋଟ୍ ୭ଟି ବନଖଣ୍ଡ ରହିଛି । ଏଥିରୁ ଅଧିକ ନିଆଁ ଲାଗିଛି ଅନୁଗୁଳ ବନଖଣ୍ଡରେ । ଅନୁଗୁଳରେ ଗତ ମାସକ ମଧ୍ୟରେ ୯୧ଟି ଟି ସ୍ଥାନରେ ନିଆଁ ଲାଗିସାରିଛି । ଅନୁଗୁଳ ବନଖଣ୍ଡ ମୋଟ୍ ୨୯୧୦ ବର୍ଗ କିଲୋମିଟର ପର୍ଯ୍ୟନ୍ତ ପରିବ୍ୟାପ୍ତ । ଏଥିରୁ ୧୦୪୫ବର୍ଗ କିଲୋମିଟର ବିଭିନ୍ନ ଜଙ୍ଗଲ ରହିଛି । ଗ୍ରାମ୍ୟ ଜଙ୍ଗଲ ଓ ରାଜସ୍ୱ ଜଙ୍ଗଲଗୁଡ଼ିକରେ ମନୁଷ୍ୟକୃତ ନିଆଁ ବନ ବିଭାଗ ପାଇଁ ଚ୍ୟାଲେଞ୍ଜ୍ ସୃଷ୍ଟି କରିଛି ।

ଏ ନେଇ ବନ ବିଭାଗର ଅଧିକାରୀ କହିଛନ୍ତି, ବନାଗ୍ନି ନିୟନ୍ତ୍ରଣ କରିବାକୁ ବନ ବିଭାଗ ଏକଦମ୍ ସଜାଗ ରହିଛି ।  ନିଆଁ ଲାଗିଥିବା କଣିହାଁ ବନାଞ୍ଚଳର ୨ଟି ଓ ଅନୁଗୁଳ ବନାଞ୍ଚଳର ୨ଟି ସ୍ଥାନରେ ନିଆଁ ଲିଭାକାର୍ଯ୍ୟ ଜାରି ରହିଥିବା ବେଳେ ଆୟତ୍ତକୁ ଆସିଛି । ଅନୁଗୁଳ ବନଖଣ୍ଡରେ ଧିରେ ଧିରେ ଜଙ୍ଗଲ ନିଆଁ ବଢ଼ୁଛି । ମାତ୍ର ଏହି ହାର ଗତବର୍ଷ ତୁଳନାରେ ଢେର୍ କମ୍ ରହିଛି ।

ସୂଚନା ଅନୁଯାୟୀ, ବ୍ୟାପକ ସଚେତନତା ସତ୍ତ୍ୱେ ଲୋକ ଚେତୁନାହାନ୍ତି । ଅନୁଗୁଳ ବନଖଣ୍ଡରେ ୬୭୬ କିଲୋମିଟର ଫାୟାର ଲାଇନ୍ କଟାଯାଇଛି । ଫାୟାର ୱାଚର୍‌ମାନେ ତୀକ୍ଷ୍ଣ ନଜର ରଖିଥିଲେ ହେଁ ଅମାନିଆ ଲୋକଙ୍କୁ ରୋକି ହେଉନି । କିଏ କେତେବେଳ କେଉଁଠି ନିଆଁ ଲଗାଉଛି ଧରିବା ମୁସ୍କିଲ ହୋଇପଡ଼ିଛି ।

Powered by Froala Editor